2 Vakorintho 6:14 - KITABU KITAKATIFU

¹⁴ Mutahambani mulikola lienyu harara na vatasuuvira mu Kristo kigira yaga siganyala kunyalika mba. Haveeye na lisanga ki hagati hu vulungi nu vudamanu? Anoho haveeye na lisanga ki hagati hu vulavu ni kisundi?

2 Vakorintho 6:14 ပူးပေါင်းရင်းမြစ်များ

Litanga 24:3

Nyenya wisuhi ku Yahova, Nyasaye wu mwigulu kandi wi lirova, ndi si ulatovolera muyaayi wange mukali kutura mu vakana va Kanaani ava inzi menyaa hagati haavo mba.

1 Avami 18:21

Elija yazia ku vandu zana navoora, “Galavugula lohono ki kunangwa munyi muduuki ku likalaga? Niiva Yahova ni Nyasaye, mumusigamiri; navuzwa niiva Baali aveeye nyasaye, mumusigamiri!” Navuzwa vandu sivativula likuva kali lilala mba.

2 Kyetsinyinga 19:2

Muporofeti Jehu muyaayi wa Hanani, yazia kwaganira mwami Jehoshafati namuvolera, “Sivoveeye uvulungi okokoonya yavo avaveeye avadamanu nokolomba vulina nayavo avadunyiranga Yahovamba? Agokoli gamali koleta uvutima vwa Yahova ku ivi.

Ezara 10:19

Vosi visuhizana kandi nivalaga ndi valaleka vakali vaavo. Vahaana magondi mamigu kuva kuli kisiuviriru chu vwoni vwavo.

Zaburi 106:35

Navuzwa valetana, kandi niviyigiza kokora miima jaavo.

Zaburi 119:63

Inzi mbeeye mulina wa yavo vosi avatumikiraa, kandi yavo vosi avahulira lilaga liilio.

Zaburi 16:3

Avatakatifu avaveeye mu lirova, nivo avaveeye vuvukumi ligali na liyaanzilira liange linene liveeye muvene yavo.

Kutwula 34:16

Avayaayi vinyu vanyara koleta avakali vageni, avanyala kuvakola vavuli kuva avasuuvirifu ku Inzi, kandi vasigamiri avanyasaye vaavo.

Tsing'ano 22:24

Utalomba vulina nu mundu wuvutima vululu ligali mba,

Tsing'ano 29:27

Mundu mulungi adunyiraa mundu muchamu, kandi mundu muchamu adunyiraa mundu mulungi.

Kyavalevi 19:19

“Mugumiri malago gange mutaleki mitugu jinyu kwivulana nizinyama ziu lugano lundi mba. Mutataaga zing'ano ziviri ziuvuguza mu mulimi mulala mwere mba. Mutiviiki zinguvu zianavwa kutura ku zing'ano ziviri zieviraka mba.

Malaki 2:11

Avandu vi Ivuyuda vamali kuvunaga lilagana lia Nyasaye kandi vakora vudamanu ligali mu Jerusalemi kandi mu kivala choosi. Vayonogonyia litembeli lia Yahova ya yaanza. Avasaza valeta vakali vasigamira vanyasaye avageni.

Malaki 2:15

Nyasaye yalomba munyi vosi kuva muviri mulala kandi Roho mulala. Lienya lilie liali ndi muduuki konyoora avana vaveeye vandu va giligali va Nyasaye. Kunangwa mulole ndi mutavunaga lilagana lienyu na vakali vienyu mba. Vuli mundu agumili lilagana lilie nu mukali weve.

Yohana 7:7

Avandu vu mu kivala sivanyala kuva ni kivuni chu kusuura nu kudunyira munyi mba, navuzwa vandunyiraa kigira mbavooleraa havulavu ndi miyinzi jaavo ni midamanu.

Vikolwa 4:23

Nonoho, lwa Petero na Yohana valakulwa, virana ku muganda gwaavo, nivavivaalira goosi aga avasaalisi vanene na vakulundu vaali nivavooye.

1 Vakorintho 10:21

Simunyala kunwera mu kekombe chu Mwami kandi munwere mu kekombe cha mademoni mba; simunyala kusanga iliilia komesa yu Mwami kandi komesa ya mademoni mba.

1 Vakorintho 15:33

Mutagadwa mba. “Avalina vadamanu vononyiaa miima milahi.”

1 Vakorintho 5:9

Ndamwiganihiza mu ibarwa yange yukutanga ya ndamung'odera ndi mutahambani na vandu vaheyi mba.

1 Vakorintho 6:6

Mu vogono yivwo, Mukristayo mulala ayaara Mukristayo wache mu kiyaalo nokoleka avatasuuvira vakalage makuva gi kiyaalo.

1 Vakorintho 7:39

Mukali waletwa siaveeye muvoholore kuzia lukali lundi ing'inga yoosi yu musaza weve aveeye mwoyo mba. Navuzwa niiva musaza weve alakuza, aveeye muvoholore koleetwa nu musaza wundi woosi wu mwene ayaanza; navuzwa niiva musaza zana aveeye Mukristayo

Vafilipi 2:15

kunangwa muduuki kuva avataveeye nimbara, kandi avasereze kuli avana avadukiru va Nyasaye, avamenyaa mu kivala cha avandu avagoyanu kandi avoni. Kuduuka mung'ereng'ane hagati haavo kuli zing'ereng'ani mwigulu,

Yakobo 4:4

Munyi avandu avataveeye vasuuvirifu! Simumanyi ndi kuva umulina wi lirova, gaveeye kovora kuva musigu wa Nyasaye? Woosi owenyaa kuva umulina wi lirova yekolaa umusigu wa Nyasaye.