2 Vakorintho 6:10 - KITABU KITAKATIFU

¹⁰ kali nikovererizwa, koveeye nu vusangali kazozo; kololeka kuli avadaka, navuzwa kokoraa vanyingi kuva vatugi; kololekaa kuli avataveeye ni kindu, navuzwa koveeye ni vindu viosi.

2 Vakorintho 6:10 ပူးပေါင်းရင်းမြစ်များ

Zaburi 84:11

Yahova Nyasaye aveeye mukingi wiitu kandi mwami wu vukumi, akugaasizaa nuvulahi kandi nu luyali. Ahaanaa choosi ekeveeye kilahi ku yavo avakolaa uvulungi.

Tsing'ano 13:7

Avandu valala vekola kuva vatugi, navuzwa sivaveeye ni kindu mba. Avandi vekola kuva vadaka, navuzwa vaveeye avatugi.

Tsing'ano 16:16

Ni vulahi ligali kuva no vogeri kandi ni limanya kuvita kuva ni zahabu harara ni ifeza.

Matayo 5:12

Muyanze kandi musangare ligali, kigira amadanyi ginyu gaveeye amanene mwigulu; nindio vadambiza avaporofeti avaari imbiri winyu.

Matayo 5:4

“Vaveeye nuvugasu avaveeye no vovereri, kigira valakaleminywe mioyo.

Luka 6:21

“Muveeye nu vugasu avaveeye ninzara kalunu; kigira mulakutizwa!” Muveeye nuvugasu avaliranga kalunu; kigira mulakaseke!

Yohana 16:22

Munyi kandi muveeye novovereri kalunu; navuzwa ndakavalole kandi, na munyi mulizula vusangali mu mioyo jinyu, nu vusangali vwinyu vwene yivwo sihaveeyeho numundu ulivutuliza ku munyi mba.

Vikolwa 16:25

Ahimbi vudiku hagati, Paolo na Sila vaali nivasaara nivimba zinyimbu ziu kwizominya Nyasaye, na avahambe vandi nivavahuliriza.

Vikolwa 3:6

Navuzwa Petero ya muvooleraa, “Inzi simbeeye na mabese mba, navuzwa ndakuha choosi icha mbeeye nacho. Mulieta lia Yeso Kristo wa Nazareti, ngulaga, singira ogeende!”

Vikolwa 5:41

Kunangwa avatumwa vaatura mu kiyaalo ni vayaanza ligali kigira Nyasaye yalora sivadukanaa kuvikwa mu zisoni kigira lieta lia Yeso mba.

Varumi 11:12

Vwoni vwa Vayuda vwaleeta uvutugi vwu vugasu ku lirova liosi, kandi ovogeheru vwavo vwaleeta vugasu vunyingi ligali ku vandu vizihiiri. Kulwayago, vulava vugasu vonene ki ligali lwa vandu vosi vi Vuyuda valiviikwa harara!

Varumi 12:15

Musangare harara na yavo avasangalaa, musiome harara na yavo avasioma.

Varumi 15:13

Nyasaye oveeye uvutangiliru vwi lisuuvirizwa amukole mwizuli uvuyanzi vwosi ni mirembe kuvitira mu lisuuvira lienyu muye, kunangwa lisuuvirizwa zana liduuki kuzizagilira kuviruka mu zinguru zia Roho Mutakatifu.

Varumi 8:32

Nyasaye siyigalira Mwana weve mwene muderwa, navuzwa yamuhaana kuli kisiuviriru kigira kunyi kwosi. Niiva yakola ndio, sialakuha ivindu viosi harara naye?

Varumi 9:2

Lwa mboraa kuli vovereri vwange voveeye vonene, kandi kuli mbeeye nu vusaliri vutaveeye ne kegero mu mwoyo gwange kigira avandu vange,

1 Vakorintho 1:5

Kigira mu lihambanywa harara na Kristo, mumali kokolwa avatugi mu vindu viosi mu limoloma liosi kandi mu limanya liosi.

2 Vakorintho 2:4

Ndaamung'odera ibarwa yeyo kuturana nu vudinyu vonene no vovereri mu mwoyo kandi namaliga manyingi. Lienya liange si liali kumuvereriza mba, navuzwa kokora munyi mumanye ndi ndaamuyaanza ligali vosi.

2 Vakorintho 4:15

Yaga goosi gaveeye kigira munyi; kandi kuli zimbavasi zia Nyasaye zilandaa ku vandu vanyingi kandi avandu yavo valameeda lisaala linyingi lie lisandiza kigira vukumi vwa Nyasaye.

2 Vakorintho 4:7

Navuzwa kunyi avakoveeye ni livikiru liu mu Roho yili, koveeye vuzwa kuli zinyingu zio vodohi, gaduuki kololeka havulavu ndi, zinguru zinene yizio zitulaa ku Nyasaye; sizitulaa ku kunyi mba.

2 Vakorintho 8:9

Munyi mumanya zimbavasi ziu Mwami wiitu Yeso Kristo. Kali niyaali mutugi, yekola kuva mudaka kigira munyi. Na kigira uvudaka vwivwe, munyi muduuki kuva avatugi.

Vafeso 3:16

Inzi saalanga ku Nyasaye kutura ku vuhinda vwu vukumi vwivwe ahaane zinguru kumunyi kuvitira mu Roho weve, muduuki kuva nizinguru mu liiva lienyu liu mugati.

Vafeso 3:8

Kali nimbeeye mukekeeke ligali ku vandu va Nyasaye vosi, Nyasaye yamba zimbavasi zizie yizi, nduuki kwilwaazira vandu vizihiiri kigira uvutugi vwokogenyia vwa Kristo uvutanyala kwenyelerizwa;

Vafilipi 2:17

Hawundi amasahi gi livamwoyo liange gaduukanaa gasundulwi kuli kihanwa ku kisiuviriru chi lisuuvira lienyu lihaana ku Nyasaye. Niiva gaveeye ndio, inzi nyanza, kandi sangala harara ni munyi mwosi.

Vafilipi 4:4

Mu sangale mu Mwami kazozo. Mboraa kandi musangare!

Vakolosai 1:24

Kalunu sangala mu vusaliri vwange kigira munyi, kuvitira mu vusaliri vwange vwu muviri, ngonyanilaa cha ligala mu vusaliri vwa Kristo kigira muviri gwigwe, ogoveeye likanisa.

Vakolosai 3:16

Muleke likuva lia Kristo limenye mu mioyo jinyu ligali. Mwigizane nokogerihizana aveene naveene mu vogeri vwosi. Mwimbi kandi zizaburi ni zinyimbu zindakatifu. Musandiza Nyasaye mu mioyo jinyu.

1 Vatesalonike 1:6

Mwiga ku kunyi kandi kutura ku Mwami, kali niiva mwasalirizwa ligali kuvita, mwanyoola likuva nu vusangali kutura ku Roho Mutakatifu.

1 Vatesalonike 5:16

Musangare kazozo,

Vahebraina 10:34

Mwasanga mu likindukizwa harara na yavo avaari mu vuhambe, kandi mwa vugilira kunuurwa vindu vienyu, kigira mu manya vulahi ndi munyi aveene muveeye ni vindu vilahi ligali kuvita, navio ni vitahera mba.

Yakobo 2:5

Muhuliri, avaamitu vange avayaanze! Nyasaye yatovola avadaka vu mukivala vave avatugi mu lisuuvira, kandi vanyoore vwami vwa yasuuviriza yavo ava muyanzaa.

1 Petro 4:13

Nitali musangare kulwo kuva avasangi mu vusaliri vwa Kristo kunangwa muduuki kwizura uvusangari kuvita kegero, lwu uvukumi vwivwe vu liloreka.

Likunula 2:9

Inzi manyi vudinyu vuvwo, kandi manyi uvudaka vuvwo, navuzwa mu giligali ivi oveeye umutugi! Manyi amanyego ga yavo avevooraa vaveeye Avayuda; navuzwa sivaveeye ndio mba. Vaveeye vuzwa muganda gwa Setani.

Likunula 21:7

Mundu woosi uliguuta alakanyoole imiandu yiji kutura ku inzi: Inzi ndava Nyasaye weve, naye alakave umwana wange.