3 Gwe go Muwaha Mulungu kulihulikaga lizi lyangu hakali mitondo muno muno, nane nghulavizyaga likumbiko lyangu hakali mitondo, hanyuma niwa nghulanjiliye.
Wakuwanoza waciwa sunga wamulilile Mulungu nayo Mulungu yakucihulika cililo cawo co kulondola wutazi.
Mhinjilaga hakali mitondo muno muno, nghulomba wutazi wako, nokwitumbilila lukulu zinghani zako.
Holeka go Muwaha, wuhulice cililo cangu, wuhulicize wulombe wangu wunhaze.
Nimulindiye Muwaha Mulungu, kuciza walindilizi vyono walanjililaga, wele wa hakali mitondo, heya, kuciza walindilizi wa hakali mitondo.
Gwe go Mulungu, ane nozanza zo wuwaha wako, go mutemi wangu, nolikumya litagwa lyako, nhondo zose cibitilila.
Mulungu wangu! Mu misi nghukulilila ninga hamba si wukuhuliciza, na ku cilo nako nhavivyo, ninga hamba singhutuga wucehe yaye.
Nase, mu vilungo vyako, mo cikuwasumila walugu wetu, heya, sunga cikusuma kuwakanyanjila ku soko ye vilungo vyako.
Ane nikalaga du nghulila ko wukalale, cinyamihe, hakali mitondo, na mu misi mugati, ninga mwene kolihulika lizi lyangu du.
Wuhulicize 'gwe go Muwaha Mulungu, so wuswanu we lihewa lyako, wunanje ku so winji wo lusungu lwako.
Agwe go Mulungu, yo gwegwe mono wuli mutemi wetu ku wulawa katali na katali, mono kunozaga mhonelo mono'nze yose.
Wamoti wono wekalaga mu Nyumba yako, mono wosuma kukukumya cibitilila.
Ninga ane nghulililaga agwe go Muwaha Mulungu, nane nghuletelaga wulombe wangu, hakali mitondo nhondo zose.
Nane nikalaga nghukwihwesa gwegwe du cilo cose kwe nhumbula yangu yose, nagwe kolo wukuyiling'aniza yinze hamonga ne wanhu wayo, baho ho wolomanyila ze ling'ani yako vyono yinha.
Nane nali neza kukulomba wuhulice cililo cangu, nagwe wukahulika.
I mitondo yaco lono kwali kukali nadandawuka, Yesu yakenuka yakabita kulomba i hanhu ha cilejeho hono hasina wanhu.