Yoweli 3:20 - Luganuzi Luswanu Kuli Wanhu Wose 2002

²⁰ Holeka nane nowalipiciza wawo wono wawawulaga, hamba sinowawonela lusungu yaye, ku soko ye lisutya lyawo lilyo. Ninga Yuda na Yelusalemi wokwikala cibitilila.

Yoweli 3:20 ပူးပေါင်းရင်းမြစ်များ

Isaya 33:20

Ale, mulanje ta ku Sayuni, likaya lyono ho hanhu hono canozezaga zi sikukuu zetu. Muyilangaje ta Yelusalemi! Baho howa ho hanhu du hono cosuma kwikala ko mulamu! Hambi nha howa hehwanile lihema lyono si lilawuswa yaye, lyono sunga ne zimambo zalyo, si zilasumika hamba hadodo kuwukulwe. Hamba ne milejehe yalyo si yiladumuka yaye.

Ezekiyeli 37:25

“Nawo wolokwikala mu yisi yono namupela mwitumami wangu Yakobo, i yisi yono wekalaga walezi wawo. Nawo wolokwikala mu yisi yiyo cibitilila, wene ne wana wawo, hamonga ne wana we wana wawo. No mutemi mono yehwanile u mwitumami wangu Dawudi, yuyo yo kolotema muli wene cibitilila.

Amosi 9:15

Nane nolowagomola no kuwawika wanhu wangu, mu'si yono nawapela, hamba si wolowuswa kanyhi yaye.” Muwaha Mulungu, u Mulungu wenyu, vyo yakutya.