Yoweli 2:21 - Luganuzi Luswanu Kuli Wanhu Wose 2002

²¹ “Nanye mo migunda, mulece kogopa langa musangalale, kanyhi mweze ne nyemo, so zose zono Muwaha Mulungu yamutendelenyi.

Yoweli 2:21 ပူးပေါင်းရင်းမြစ်များ

Mwamulizo 15:1

Hanyuma ya zizi, u Muwaha Mulungu yakamulonjelela Abulamu mu wulawilwe yakatya, “Gwe Abulamu, wulece kogopa, ane nili ngula yako. Ne cipegwa cako cowa ciwaha kuciza!”

Zabuli 71:19

Gwe go Mulungu i vilungo vyako, hamonga no wiling'ano wako, vificile ko ku mavunde. Agwe yo gwegwe mono wanoza zimbaha muno. Alu go Mulungu yo nani 'mbi, kanyhi mono yehwanile gwegwe?

Zabuli 98:8

Nanye mo makolongo, towenyi maganza, nanye mo matunda, mwimbe hamonga ne nyemo.

Isaya 35:1

Hambi nyika nha yosangalala. Ne maluwa gobonhola mu mbago.

Isaya 41:10

Holeka mulece kogopa, ane nha nili hamonga nanye! Ane yo nene Mulungu wenyu, holeka mulece kogofywa na cinji co cose! Ane nomupenyi vilungo, kanyhi nomutazenyi. Nomudimenyi, kanyhi nomuponyenyi.”

Isaya 44:23

Mwimbe ne nyemo 'nye nyo wulanga! Nanye nyo kusi ye 'si, mwimbe mwihindile muno! Nanye nyo matunda hamonga ne mabici gose ga mu mbago, mwimbe ne nyemo kwe mazi mawaha. Hambi Muwaha Mulungu nha kawulajila wuwaha wakwe, mu nzila yo kuwaponya wanhu wa Isilayeli.

Isaya 54:4

Holeka wulece kogopa, hambi nha si kokozwa cevu hamba kupuvywa yaye kanyhi. No wu wula wihuwilwa wako, kowusemwa nho mucekulu mono yakali mudodo, no wumondwe wo wufwile wako hamba si kowukumbucila kanyhi yaye.

Isaya 55:12

“Holeka nanye molowuka mu Babiloni musangalaye, kanyhi molotegulwa kunze ye likaya ko mulamu. Nago matunda ne vigongo mwi'pango lilyo vyolobahuka so wimbe, imibici nayo yolozoza ne nyemo mbaha.

Yelemiya 33:3

“Wunyheme 'ne, nane nokupitula, nane nokulajila zinghani zimbaha, zono si wuzimanyile yaye.

Hoseya 2:21

Mu vilo vivyo nolowupitula wulombe we wanhu wangu Isilayeli.

Yoweli 2:20

Noliwusa litewa lye zinzije lyono lyaza ku wulawa kusumuka. Noziwinjila ku nyika, nago matewa ga ku mwande, nogategula ko kwi'lenga lyo mwino, nago ga mu nyuma ko kwi'lenga lya Meditelaneya. Nazo zofwila mumo, ne miwili yazo, yolavya munungho mumo mwi'lenga. Nozihodanga ku soko ya zose zono zamutendelenyi.

Yoweli 2:26

Holeka nanye mowa na vinji vyo kulya, kanyhi mokwiguta. Nanye momukumya Muwaha Mulungu, u Mulungu wenyu, mono yetuma mapoto ku soko yenyu, nanye nyo wanhu wangu hamba simobedegalilwa lukulu kanyhi.

Zakaliya 8:15

Ninga 'lu, nghwiwikaniza niwapele wulugutizwe wanhu wa Yelusalemi na Yuda. Holeka mulece kogopa.

Wukumbucize wo Wulajilize 4:32

“Mujele ta kuzilanga, ze vilo vyono vyapuluta, ze vilo vyono mwali mukali nalelwa. Zinghani zono zejela katali muno muno, lono Mulungu yamuwumbila munhu mononze. Kanyhi mulanje no wuwaha we yinze vyono winha. Wulenyi! Yowa yejela nghani yinji mbaha yono yinha yiyi? Hamba ho yuli yunji muyenyu, mono kowa yayihulika nghani yono yihwanile yiyi?

1 Samwili 12:16

Holeka lu, mwime, nanye moziwona zimbaha zono Muwaha Mulungu kokwituma.

1 Samwili 12:24

Holeka mumuhulice Muwaha Mulungu, kanyhi mumwitumamile ko wihuwilwa kwe zinhumbula zenyu zose. Akuno mukukumbucila zimbaha zono mwene yamutendelenyi.