Yelemiya 10:5 - Luganuzi Luswanu Kuli Wanhu Wose 2002

⁵ Ne vihwani vivyo, vihwanile nhe cihwani ciseswe co munhu, cono ciwicigwe mu mugunda we matanga, ho cogofye zindeje. Ne vihwani vivyo, si vikusuma kulonga yaye, hamba kujenda, langa sunga wuvidinghule du. Holeka anye, mulecele lukulu kuvyogopa, hambi nha si vyosuma kumutamisenyi yaye, hamba kumunozezenyi nghani yo yose yono swanu.”

Yelemiya 10:5 ပူးပေါင်းရင်းမြစ်များ

1 Watemi 18:26

Ale, nawo wawizi wa Baali wakayisola ng'ombe yono wali waletelwa, wakayiwulaga. Wakalomba kuli Baali, sunga mu misi mugati. Wazozaga wakutya, “Gwe Baali wucipitulaje!” Nawo walombaga nhavivyo, akuno wakuzumhazumha wakupilima cikumbicilo cono wazenga. Ninga hakawa hasina hamba yipitulo lyolyose lyono watuga.

2 Zinghomo 25:15

Ne nghani yiyi, yikamukoza muno likuwo Muwaha Mulungu. Yakawa kumutuma muwizi kuli Amaziya. Nayo muwizi yakamutya Amaziya, “Alu 'gwe Amaziya, ho kosuma nhawule kuyitumbila milungu ye wanhu wanji, yono si yosuma hamba kuwaponya wanhu wayo, mu vilungo vyako?”

Isaya 16:12

Nawo wanhu wa Mowabu kolo wakwijela wakubita kwi'tunda lyawo wakahembe, wenjile mu wuhembelo wawo walombe, no wulombe wawo hamba si wohulikwa yaye.

Isaya 45:20

Muwaha Mulungu yakutya nhavi, “Ale! Mwikongholelaje hamonga, anye nyo wanhu we makungugo gose, wose mono muponile mu wugwe wo wutemi wa Babiloni, muze wose ku wuling'anizwe! Anye nyo wanhu mono mudinghulaga vihwani vyenyu vye mabici viseswe, muwa kulomba kuli milungu yono si yomuponyenyi yaye. Anye nyo wanhu walele!

Isaya 46:1

“Alu ayi yo ndumilizo ye milungu ya Babiloni! Hambi Beli na Nebo, vyono wavihembaga katali, ninga aluno vyeza vili mucanyha ye zindogowe, vyeza mutegulo muzito mu migongo ye zinimu zono zikataye.

Isaya 46:7

Na hanyuma yayo wawa kumupika mu mawega gawo mulungu yuyo wakumudinghula. Wakumusimya hanhu hanji, kawa kwima baho du hamba kusuma kutela hanji hamba hadodo. Na hono munhu yabite baho yakamulombe, mulungu yuyo we fweza, si yakusuma kumupitula, hamba kumupela wutazi wo wose wa mu magayo gakwe.

Yelemiya 10:14

Na muli zizi zose, i wanhu wakwijela walele, kanyhi wasina mahala, na wawo wono wakuvisesa vivyo vihwani, wakondya kukozwa cevu, ku soko ye vihwani vyawo, hambi i milungu yawo yono wakuyisesa, nha ya wulambi du, kanyhi yisina wehele muli yene.

Habakuki 2:19

Woyi hee kuli 'nye! Mono mulilonjelaga libici mukutya, “Usinhuce!” Hamba kwi'bwe lyono si likulonga mukutya, “Winuce!” Alo mukwihwesa vyono cihwani cosuma kumugubulilenyi nghani yo yose lo? Heya, cidahile kuwa cihiliwe ne fweza hamonga ne zahabu, ninga hamba nhavivyo vyo cisina wumi du.

1 Wakolinto 12:2

nanye mumanyile vyono lono mwali si munapituka, mwali mutemigwe no kwajilizwa ne vihwani vye bwete.

1 Wakolinto 8:4

Holeka kuli i zindigwa zono zikumbiciywe vihwani, ase cimanyile, vyono vihwani si cinji mono yinze, ase cimanyile vyono u Mulungu yo yumonga du.

Wukumbucize wo Wulajilize 4:28

Na kuko kono molokwiyagazizwa, molowa kuhemba milungu yono minozwe ne miwoko ye wanhu, i milungu ye mabici na ye mabwe, milungu yono si yosuma kuwona hamba kuhulika hamba kulya, hamba kunusa kose yaye.