Wugubule 9:2 - Luganuzi Luswanu Kuli Wanhu Wose 2002

² Ale, inyelezi yiyo yikalidigula lilyo i likombo lyo wuninyina, na mumo mwikombo mukalawa lyosi, likawa lyosi lye 'lambi yiwaha. Lizuwa no mwanya vikatukuwazwa no wutitu we lyosi lilyo lya mwikombo lyo wuninyina.

I CILAGANE CIPYA 1991

² Ale, inyelezi yiyo yikalidigula lilyo i likombo lyo wuninyina, na mumo mwikombo mukalawa lyosi, likawa lyosi lye ʼlambi yiwaha. Lizuwa no mwanya vikatukuwazwa no wutitu we lyosi lilyo lya mwikombo lyo wuninyina.

Wugubule 9:2 ပူးပေါင်းရင်းမြစ်များ

Mwamulizo 15:17

Kukawa lizuwa lyaza kuwa lyagwila, ne citi cenjila, lanje, kwa nhinicizo du, likejela likombo lyono lyafunghaga lyosi, hamonga ne lizinga lyono lyakaga moto, vikakolela hagati ye zisanho zizilya ze zinyama.

Mwamulizo 19:28

Nayo lono yali yemile baho, yaza kulanga lubavu lwa ku Sodoma na Gomola na ku lubavu lose lwe lilolo, yakezina muno muno kuwona lyosi lyono lyabitaga kucanyha, lyosi lyono linha lye nyanyilo yiwaha.

Wutuluce 19:18

Nalyo litunda lya Sinayi likawa yigubikwe ne malyosi, hambi Muwaha Mulungu nha yatima mucanyha yalyo ko moto. Ne lyosi lyo moto wuwo likabita kucanyha muno nha lyosi lye 'kozo yiwaha muno. Sunga ne litunda lyose likacicima muno muno.

Isaya 14:31

Holeka anye nyo Wafilisiti, mulile mu makaya genyu gose mulondole wutazi! Wose mogope! Hambi livunde lye manghundi, nha likuza likulawilila kusumuka, lipuga lye wasilikale wo wulugu, wakali, kanyhi wasina woga.

Danyeli 3:6

No munhu wo wose mono sikokwinama no kucihemba cihwani cico, munhu yuyo kogumilwa mwi'lambi lyo moto wono wukwaka muno muno.”

Yoweli 2:10

Sunga ne yisi nayo yikucicima, no wulanga nawo wukusinjisika, ne lizuwa nalyo no mwezi vyatukuwala, sunga ne zinyelezi, hamba sizikusana yaye.

Yoweli 2:2

Nalyo kanyhi lyolowa yizuwa lya citi no wukalale, yizuwa lye mavunde no wutitu tuku. Hambi litewa yiwaha lye zinzije, nha lyologubika matunda kotya citi. Cikali hamba si nejela cinhu cono cinha vivi, mu vilo vyono vyapuluta, hamba mu vilo vyono vikuza si cilejela yaye.

Yoweli 2:30

“Nane nololajila citanjilo ce lizuwa lilyo ku wulanga, na kono'nze kolowa sakami no moto ne mavunde ge nghungulyosi.

Metumo ge Watumwa 2:19

Kanyhi nololajila imezino ku wulanga kucanyha, ne vitanjilo kono'nze hono hasi, kolowa na sakami, no moto ne nghungulyosi yizito.

Wugubule 14:11

Lyosi lyo moto wo wugazwe wawo, lifunghaga cibitilila ne cibitilila. I wanhu wawo langa wono walihembaga lilimu lilyo hamonga ne cihwani calyo, kanyhi wakawicilwa ne citanjilo ce litagwa lyalyo, wawo wolowa wasina wucehe wo wose ku misi na ku cilo.

Wugubule 16:10

Malayika we hano nayo yakalijidila libakuli lyakwe mu wikalo wuwaha wa lililya lilimu. Uwutitu wukawa kudinda mu wutemi walyo, wanhu wakawa kwilumanga i zinimi zawo ku soko yo wusungu,

Wugubule 8:12

Malayika we kane nayo yakayitowe ndulele yakwe. Na hobaho libimha lye kadatu lye lizuwa, na lyo mwezi, na lye zinyelezi likatowa, sunga no wuzelu wayo, wukatukuwazwa libimha lye kadatu lyo wung'alale wayo. Ne libimha lye kadatu lye misi likawa lisina wuzelu, sunga ne libimha lye kadatu lye cilo, nalyo nhavivyo.

Wugubule 9:1

Hanyuma malayika we hano nayo yakayitowa ndulele yakwe. Nane nghayiwona nyelezi yono yali yigwiye mono yisi, yilawiliye ku wulanga. Nayo nyelezi yiyo yikapegwa funguwo ye likombo lyo wuninyina.

Wugubule 9:11

Kanyhi zene zina no mutemi mono yazitemile, nayo yo malayika wa ku wuninyina, ne litagwa lyakwe ku nonga ye Cihebelaniya, wamucemaga, Abadoni, na kunonga ye Cigiliki kacemwaga, Apoliyoni, nha cinji “Muwulaji.”

Wugubule 9:17

Ale, nhavivyo vyo naziwona zizo zifwalasi, hamonga na wawo wono wali wazipandile zizo zifwalasi. Nawo wali wena ngula mu zimhambaga zawo zono zali ndunghu nha moto, zono zali zina liwala lye bulu nhe libwe lyo wuguzi wukamu, lyono lina liwala lye mavunde, ne liwala lye henjelu, nhe cibiliti. Ne mitwe ye zifwalasi zizo, yali yinha nha mitwe ye zisimba, nawo moto ne lyosi, ne cibiliti, vyalawilaga mu milomo yazo.