Walawi 26:5 - Luganuzi Luswanu Kuli Wanhu Wose 2002

⁵ Ne nhwanga yenyu yokonjelezeka muno, nayo yomunozenyi mujendelele kududula du sunga na mu mapango go kuhepela zabibu. Nanye mowa mukali mujendeleye kuhepa zabibu, sunga na mwidaha lyono lyowa lyo kupanha no kuhadika wuhemba. Nanye movituga vyose vyono mukuvisaka ku wulye, kanyhi mokwikala mupolile mu yisi yenyu.

Walawi 26:5 ပူးပေါင်းရင်းမြစ်များ

Amosi 9:13

Muwaha Mulungu yakutya, “Ivilo vikuza. Lono vilimwa vilawiluka musunho kuciza mu nghango yono vyowa vyisumice ku wududule ne zizabibu zolowiluka mbela mbela kuciza mu nghango yono divayi yikusuma kunozwa, ne matunda golosuluza divayi swanu, ne vigongo vyose vyolosipa divayi.

Yoweli 2:26

Holeka nanye mowa na vinji vyo kulya, kanyhi mokwiguta. Nanye momukumya Muwaha Mulungu, u Mulungu wenyu, mono yetuma mapoto ku soko yenyu, nanye nyo wanhu wangu hamba simobedegalilwa lukulu kanyhi.

Yoweli 2:19

Muwaha Mulungu yakawapitula yakawatya, “Alu nomupelenyi wuhemba, ne divayi, ne mafuta, nanye momoteswa, sunga ne makungugo ganji sigomubedegalenyi kanyhi yaye.

Zimbazi 1:33

Ninga munhu wo wose mono kohuliciza'ne, yuyo kokwikala yapolile, kowa mutulano, hamba kowa yasina soko yo kogopa cinji co cose yaye.”

Wukumbucize wo Wulajilize 11:15

ne mahanze gono mozilisa mitugo zenyu. Nanye mowa mwina ndigwa nyinji muno, mu nghango nha vyono mosaka nyenye.

1 Timoteyo 6:17

Wuwalonjelaje iwanhu wagoli we vinhu vye mikalile ya lulu, walece kwidunhumula, hamba kuwika u witumbilo wawo mu sawo yono siyidahile kwitumbilwa, langa wamwitumbilaje Mulungu, mono ko wuswanu wakwe, kacipela i vinhu vyose civisangalalile.

1 Petelo 1:5

Zizo zolowa zenyu nyenye mono ko wihuwilo, mukudimwa viswanu telele, kwe vilungo vyo Mulungu, so mhonelo yono yikondizye kugubulwa ku ndumo ye vilo.

Metumo ge Watumwa 14:17

Hamba nhavivyo, u Mulungu si yaleka kwilajila, so metumo maswanu gono yakumunozezenyi, yakumupelenyi mvula ya ku wulanga, kanyhi ya kumupelenyi ne vipango vye matika, yakumupelenyi zi ndigwa, no kuzigutya zinhumbula zenyu na nyemo.”

Matayo 23:37

“Gwe Yelusalemi, Yelusalemi, mono wukuwa kuwawulaga iwawizi, sunga no kuwatowanga ne mabwe awalya wono watumwagwa u kwako. Kalinga kono nasakaga kuwakongholela iwanago kono kwangu, nha vyono nghuku yivikunyanjililaga viziyoziyo vyayo hasi ye mabawa gayo, ninga hamba si wenda yaye.

Yelemiya 23:6

No mutemi yuyo kolo yatema, i wanhu wa Yuda, wolowa wekaye wapolile. Hambi u mutemi yuyo nha kolocemwa, ‘U Muwaha Mulungu Muponyi wetu.’ ”

Zimbazi 18:10

Nayo Muwaha Mulungu, wo munala we vilungo, hono i wanhu we ling'ani, wosuma kwihundika no kuwa wapolile.

Zabuli 90:1

Gwe go Muwaha Mulungu, agwe yo gwegwe kuwezaga wikalo wetu, vilo vyose mu zindelo zose.

Wutuluce 16:8

Musa yakatya kanyhi, “Muwaha Mulungu, i cinyamihe, komupelenyi nyama, na hakali mitondo komupelenyi mikate ho mulye mwigute, hambi mwene Muwaha Mulungu nha kakondya kuwuhulika wung'ung'ulice wenyu, wono mukumung'ung'ulicila. Ase 'mbi cili wanani ho mucing'ung'ulicile? Hono mukucing'ung'ulicila ase, mumanye vyono mukumung'ung'ulicila Muwaha Mulungu.”

Hoseya 2:18

Mu vilo vivyo, nolonoza cilagane ne vilimu vyose vya mu mbago ne zindeje, ho vilece kuleta wugaye muli wanhu wangu. Nane nolowusa vitwalo vyose vyo wulugu mu'si, mimaje yose no wupinde. Nolowaleka wanhu wangu wekale wapolile.

Zabuli 144:13

Ne madongha getu nago, gamemywe nhwanga ye mawala gose, ne zingholo zetu nazo mu migunda yetu, zilele kali maelufu na maelufu.

Isaya 1:19

Na hono muhulice 'ne, nanye molya vinhu viswanu vyono vikulawa mu'si.

Isaya 30:23

Nanye kolo mwahadika zimbeyu mu migunda yenyu, Muwaha Mulungu komutonyezezenyi mvula ho zicindice, no kumuletelenyi nhwanga mbaha muno. Ne mitugo zenyu zowa no wudimo winji muno.

Hoseya 2:20

Nane nolowukamisa wilahize wangu, no kukunoza agwe wuwe wuli wangu, nagwe kolomanya 'ne, vyono yo nene Muwaha Mulungu.

Yoweli 2:22

Nyo vilimu nanye nhavivyo, mulece kogopa, hambi wudimo wenyu nha wasipuka, ne mibici nayo yikulela mikalo yayo, hamonga ne mikuyu, ne mizabibu yose, alu vyenjipa muno.