Nehemiya 9:29 - Luganuzi Luswanu Kuli Wanhu Wose 2002

²⁹ Wukawasugula wagavumile mafundo gako, ninga so cibede cawo, wakagalema ne malajilizo gako, hamba yiwe, mu wibata wulajilize wako, yo nzila yo wumi. Ninga wene so cibede cawo wakafyula wakalema no kukuhulika.

Nehemiya 9:29 ပူးပေါင်းရင်းမြစ်များ

2 Watemi 17:13

Ninga Muwaha Mulungu yali yakondya kuwasugula Isilayeli na Yuda, mu nzila ye wanhu wono yawatumaga, hamonga ne wawizi, yakuwalonjela yakutya, “Mupituce muzilece zinzila zenyu zimbi, mwibate wuhile wangu, ne mejizo gangu gono gali mu wulajilize, wono nawalajiliza walezi wenyu, nghamulonjelelenyi nanye mu nzila ye wetumami wangu wawizi.”

2 Watemi 17:14

Ninga wene hamba si wahulika yaye, wakawa wasina cihuliko nhe walezi wawo, wono wali si wakumwihuwila Muwaha Mulungu, u Mulungu wawo.

2 Zinghomo 24:19

Ninga hamba nhavivyo, u Muwaha Mulungu, yakawategulila wawizi, wawasugule wamuwuyile mwene. Ninga i wanhu wakalema hamba si wawahuliciza yaye.

2 Zinghomo 33:10

Holeka hamba yawe Muwaha Mulungu yamusugula Manase hamonga ne wanhu wakwe, ninga wene wakalema, hamba si wasaka kumuhuliciza yaye.

2 Zinghomo 36:15

Ninga u Muwaha Mulungu, u Mulungu we walezi wawo, yakajendelela kuwatumila wawizi, wawasugule wanhu wakwe. Hambi nha yakawawonela lusungu wanhu wakwe, hamonga ne Nyumba yakwe.

Nehemiya 13:15

Mu vilo vivyo, nghawawona wanhu wa ku Yuda wakuminya zabibu, ho watuje mulengu wayo mwi'zuwa lye Sabato. Wanji wakawa wadinghuye wuhemba, divayi, ne mikalo minji, mu zindogowe zawo, wa kuleta ku Yelusalemi. Nghawasugula ho walece kuguza co cose mwi'zuwa lye Sabato.

Nehemiya 9:10

Walajila vitanjilo vyo wizine kuli mutemi Falawo, hamonga ne walongola wakwe, ne wanhu wa mu yisi yakwe. Hambi 'gwe nha wukamanya vyono wawewonelaga wanhu wako, wuketujila lukumyo lono wina nalo sunga nalu.

Nehemiya 9:16

Ninga walezi wetu wakekumya muno, wakawa wasina cihuliko mu mikalile yawo, wakalema sunga no kugatyatya ne malajilizo gako.

Nehemiya 9:26

“Ninga hamba nha vivyo i wanhu wako siwakuhulika yaye. Wene wakakugaluka, wakataga ne malajilizo gako. Wakawawulaga sunga ne wawizi wono wawasugulaga, no kuwalonjela wakupitucile gwegwe. Wakakutovula kenji na kenji.

Nehemiya 9:30

Mu myaka yose, agwe wawasugulaga ko wukangalile. Wukawejiza wawizi, ho wawalonjele, ninga wanhu wako wakawa wali ciziwi. Holeka nagwe wukawaleka, wakatowa ne walugu wawo wa mu makungugo ganji.

Wutuluce 10:3

Nawo Musa na Haluni wakamubitila mutemi Falawo wakamulonjela wakatya, “U Muwaha Mulungu, u Mulungu we Wahebelaniya, yakutya nhavi, ‘Alu kojendelela kuwa wusina cihuliko kuli'ne sunga nili? Wuwakombole wanhu wangu wabite, ho wakahembe nene.

Yelemiya 17:23

Ninga i walezi wawo, hamba si wahulika 'ne yaye, hamba kuzitajila mu zinhumbula zawo ng'o. Langa wene wakacila kuwa wasina cihuliko du kuli'ne, hamba si wasaka kugabocela ne mafundo gangu yaye.

Yelemiya 19:15

nha vyono u Muwaha Mulungu, u Mulungu wa Isilayeli katya nhavi, “Alu nane noliletela likaya lili, wulipicizwe wuwaha muno, hamonga ne vikaya vye behi behi, u wulipicizwe wono nali nawulonga. Hambi anye, nha muli wawanji muno, musina cihuliko, hamba si mosuma yaye kuzihulika zono 'ne nghuzilonga.”

Yelemiya 42:19

Nghawalonjela kanyhi nghatya, “Ninga mumanye vyono u Muwaha Mulungu, yakondya kumulonjelenyi, nha vyono, anye nyo wanhu mono musigazwe mu yisi ya Yuda, mulece kubita ku Misili yaye. Holeka ku soko yiyo, nane nghumusugulenyi, vyono, alu,

Yelemiya 43:2

Nane nali neza kondya kuzilonga zizo zose, hobaho Azaliya u mwana wa Hoshaya, na Yohanani, u mwana wa Kaleya, hamonga ne wanhu wose i wedunhumuzi, wakawa kunonganga wakutya, “Gwe Yelemiya, awo wulambi wako du. U Muwaha Mulungu, u Mulungu wetu, hamba si yakulajilize yaye wuze wucilonjele, cilece kubita kwikala ku Misili ng'o.

Yelemiya 44:10

Ninga sunga nalu baha, anye mukali si mukulajila nhumbula yo winenenyhezi yaye. Hamba si mukusaka kumhela cogopo yaye, hamba kuwa ne mikalile yo kutyatya ze malajilizo gangu gose, gono namupelenyi nyenye hamonga ne walezi wenyu.

Yelemiya 7:26

Ninga hasina hamba munhu monga, mono yawahulika, hamba kuzicelelela bwete zono wazilongaga. Ninga 'nye mukajendelela kuwa musina cihuliko kuli'ne, no kuwa wabezi muno si nhe walezi wenyu.

Ezekiyeli 20:11

Nghawapela malajilizo gangu, no kuwalajila wuling'anizi wangu, wono munhu wo wose kosuma kuwumipa, hono yawitumame.

Danyeli 5:20

Ninga 'lu, vyono yalajila wivuni no wukali, hamonga no wu wula cihuliko, hodu yakawa kuwuswa mu wutemi, no kuwajiliza mukumbo wakwe wo wutemi, yakalyajiliza ne lilumbo lyakwe.

Hoseya 6:5

Ayi yo soko yono yaleka nghamutumilenyi wawizi wangu, hamonga no luganuzi lo wuling'anizwe, no wongomezwe kuli'nye. Na yono nghusaka kuli'nye yoyi.

Walawi 18:5

Holeka muyityatyaje mikalile hamonga ne malajilizo gono nghumupelenyi, holeka nanye mowumipa hono mugakamise. Hambi ane nha yo nene Muwaha Mulungu.”

Matayo 19:17

Yesu yakamutya, “Alu nhawule wukumbuza kuli za ya hayi nghani swanu? Hambi nha koyuli yumonga du u muswanu. Na hono wusace kwinjila mu wumi, ale wugebataje i malajilizo.”

Luka 10:28

Yesu yakamutya, “Kupitula viswanu. Ale, wuketume nhavivi, nagwe kowumipa.”

Walumi 10:5

Musa yandika zizi zo munhu mono kovumilwa hali Mulungu so kuwituma u Wulajilize, yakatya; “U munhu wo wose mono kokwituma nha vyono u Wulajilize wukutya, yuyo kowumipa.”

Wagalatiya 3:12

Hambi u Wulajilize no wihuwilo, siyo cinhu cimonga yaye, langa i Mandiko gakutya, “Mono kozifisiliza zose zono zikusakwa mu Wulajilize, yuyo kowumipa.”

Wukumbucize wo Wulajilize 31:21

Ninga kolo i zimbi zikuwaziza hamonga ne magazo mawaha, ale, u lwimbo lulo lolohomelela nha wuhomelezi kuli wene. Ninga hamba nhavivyo nghondizye kuzimanya za mu mahweso gawo sunga na lono nghali hamba nawafisa mu yisi yono nawehuwiziza.”

Wukumbucize wo Wulajilize 31:27

Ane manyile vyono wali cibede kanyhi wasina cihuliko hamba hadodo bwete. Hambi nha manyile vyono wasina cihuliko hali Muwaha Mulungu mu wulawa mu mikalile yangu yose. Kanyhi manyile du vyono wocila kuwa wasina cihuliko sunga na hono niwe nakondya kufwa.

Wukumbucize wo Wulajilize 4:26

Nane nghuwutambula wulanga ne yisi, viwe wuhomelezi kuli 'nye izuwali, nha vyono, hono mwikale si muhulice 'ne, hodu, mokwajililila lukulu ku wulawa mu yisi yiyi, hamba si molokwijela kanyhi yaye. Kanyhi hamba si mosuma kwikala vilo vinji, mu yisi yiyo yono yili ku nhumbi ya Yoludani yono moyisola.

Walamuzi 6:10

Nghamulonjelenyi vyono ane yo nene du u Muwaha Mulungu, u Mulungu wenyu, nghatya, mulecele lukulu kuhemba milungu yinji ye Waamoli wono anye mwikaye mu yisi yawa. Ninga 'nye simwenda kuzihulika zangu.”