Nehemiya 7:1 - Luganuzi Luswanu Kuli Wanhu Wose 2002

¹ Ale, lono majinji gali gakwila, ne milango yose yawicilwa, i walidilizi wa mu Nyumba yo Mulungu, hamonga ne cipuga cono celile ce wembi, ne Walawi, wakawikwa.

Nehemiya 7:1 ပူးပေါင်းရင်းမြစ်များ

2 Watemi 7:10

Hobaho wakawa kutuluka, wakawa kubita ko ku Samaliya, wakawalomba walindilizi we milango ya mwi'kaya, wakawatya, “Ase cibita sunga ko ku nghambi yono wali wapanjile wanhu wa Siliya, nase si cagane, hamba kuwona munhu wo wose. Ne zifwalasi hamonga ne zindogowe zose, vyo ziwopigwe du, sunga ne mahema gose, nago malekwe du hamonga na vyose vyono vili mugati yago, hambi Wasiliya nha wakondya kuwuka.”

2 Zinghomo 31:2

Mutemi Hezekiya, yakawika, no kunozeleza wiwalile we milimo ye Wakohani ne Walawi, nha vyono wali wanojeye munhu na mulimo wakwe. Hamonga no mulimo wo wulavya vilavywa vinyanywe hamonga ne vilavywa vyo mulamu. No mulimo wo wulongoza wuhembi mu Nyumba yo Mulungu. Hamonga no kumulumba no kumukumya Muwaha Mulungu, mu Nyumba yakwe.

Ezila 3:8

Ale waza kufika mwezi we kejete wa mu mwaka we kejete, ku wulawa lono wawuyila ku Yelusalemi, wakawa kwanza mulimo wo kuyizenga Nyumba yo Mulungu. Zelubabeli, na Yoshuwa hamonga ne wandugu zawo wa mu 'si, ne Wakohani wose, ne Walawi, na wose wono wawuya ku Yelusalemi ku wulawilila ku wuhamywe, wakelunza hamonga mu mulimo wuwu. Iwalawi wono wali waficile myaka makumi mejete hamba kuciza, wawo wo wawikwa wawe wo walanjilizi mu mulimo wuwo wo kuyizenga Nyumba yo Mulungu.

Nehemiya 10:39

I wanhu wose wa Isilayeli hamonga ne Walawi, yiwanojeye wasole i vilavywa vyose vye zaka, waviwice mu vinyumba vyono viwikwaga viwutwa vya mu Nyumba yo Mulungu. Vilavywa vyo wuhemba, vye divayi na vye mafuta. Ho viwikwe hamonga ne viya vyose vye Nyumba yo Mulungu, lono ne Wakohani wono wali mu witumami wali baho, ne walanjilizi, hamonga ne cipuga ce wembi, nawo ho wasole lobo ye zi zaka zose, wetumamile. Nase si coyileka Nyumba yo Mulungu wetu.

Nehemiya 11:3

Mu makaya ganji ne matumbi ganji, i wanhu wa Isilayeli hamonga ne wakohani ne Walawi, ne wetumami wa mu Nyumba yo Mulungu, hamonga ne wetumami, ne wetumami we wana wa Solomona, awa wose, wekalaga hanhu hawo, mu matumbi gawo. Liwalo lye walongola, wono wekalaga mu Yelusalemi, likaya lyono lyelile, wono wali wo walongola we wanhu, wono wekalaga mu matumbi ga Yuda, lyo alino.

Nehemiya 12:24

Ale, so mahweso ge walongola, Hashibiya, Shelebiya, Yeshuwa, Binuyi na Kadimiyeli. I Walawi wose, wakawikwa mu vipuga vipuga, wawikwaga vipuga vyejete vyejete mu wilecele, ho vimukumye no kumulumba Mulungu, mu wutyatya wutemye wo Mutemi Dawudi munhu wo Mulungu.

Nehemiya 6:1

Sanibalati, na Tobiya, na Geshemu u Mwalabu, hamonga na wanji wa muli walugu wetu, wakahulika vyono, alu, cakondya kuzenga majinji, kanyhi musina malanga gono gakumuce. Hamba ha yiwe cali cikali nawicila milango mu winjililo.

Nehemiya 6:15

U mulimo wose wuketumwa vilo makumi mahano na vyejete, majinji gose gakawa gakondya. Cikawumala mulimo wuwu, mwi 'zuwa lye makumi mejete ne hano, lya mu mwezi wa Eluli.

Nehemiya 6:19

Nawo wakazilonga zinghani zakwe ziswanu hali'ne, zono yetuma, kanyhi wakamulonjela sunga ne zinghani zangu. Baho Tobiya, yakajendelela kunyandicila zibaluwa zo kujela kunyogofya.