Nehemiya 4:2 - Luganuzi Luswanu Kuli Wanhu Wose 2002

² Yakawa kucilonga ha mwande ye wendece wakwe, ne cipuga ce wasilikale we Cisamaliya yakutya, “Alu i wayahudi wawa, wono watimbile nhavivi wakunoza ci? Mwene wakujela kuzenga kanyhi likaya lili? Wakwihwesa so wulavya makumbiko, wowusuma mulimo wuwu mwi'zuwa limonga? Hamba wakwihwesa, vyono wadahile kugahimbula mabwe mu wulawa mumo mu malundo ge malongo, nago ninga ho gakondya kutakamila ho moto?”

Nehemiya 4:2 ပူးပေါင်းရင်းမြစ်များ

Ezila 4:4

Hobaho i wanhu wono wekalaga mu yisi yiyo wakanza kuwogofya no kuwatukuwika mitima Wayahudi, no kuwemila walongola wawaha wo wutemi wa Pelisiya ko kuwafupa zisawo ho wasume kuwemila u wuzenji wuwu.

Nehemiya 12:27

Hobaho lono majinji ge likaya lya Yelusalemi gasiwanulwaga, wakaletwa i Walawi wono wali wekaye kunze ye likaya, ho wahangane ne wayawo mu sikukuu yiyo, no kwimba zinyimbo ze malumbo, ne zinyimbo ze misesele ne vidananda ne masumbi.

Nehemiya 12:43

Mwi'zuwa lilyo, makumbiko menji gakalavywa ne wanhu wali wena nyemo mbaha, hambi Mulungu nha yo yawapela wusangalale wuwo. We cicekulu ne wana wao, wose wakelunza mu sikukuu yiyo, ne lizozo lye nyemo lyono lyali baho ha Yelusalemi, lyali yiwaha muno muno.

Nehemiya 4:10

Ne wanhu wa Yuda wose wakawa na lwimbo lono wemba, lwimbo aluno. “Ase cikutimba so wudinghula mizigo mizito, malowanjila geza menji sicosuma kugawusa. Alu cogazenga wule zuwali, i majinji gaga?”

Nehemiya 6:15

U mulimo wose wuketumwa vilo makumi mahano na vyejete, majinji gose gakawa gakondya. Cikawumala mulimo wuwu, mwi 'zuwa lye makumi mejete ne hano, lya mu mwezi wa Eluli.

Zabuli 83:4

Wakutya nhavi, “Alenyi muze cilyongomezeze lukulu likungugo lyawo, ne litagwa lya Isilayeli lyajililile lukulu.”

Yelemiya 26:18

“Nye wayetu, mu vilo lono Hezekiya yali mutemi we yisi ya Yuda, yakaza muwizi yunji, mono yacemwaga Mikaya, munya Molesheti, u muwizi yuyo yawalonjela wanhu nha vyono, u Muwaha Mulungu, we mihanga yalonga yakutya, ‘Agwe go Sayuni kololimwa nha mugunda, Nagwe Yelusalemi kolowa yilundo lye matongo, Ne litunda lye Nyumba yo Mulungu, lyolowa mbago.’

Yelemiya 33:24

“Wule, wakondya kuwawona i wanhu wono wakutya, nha vyono ane nakondya kuwaleka i wanhu wa Isilayeli na Yuda, zimhuga zizi zinyejete zono nakondya kuzihagula? Na mu nzila yiyo, wakuwabedegala wanhu wangu, no kuwehweseza vyono si yikungugo kanyhi yaye.

Danyeli 9:25

Holeka wuzimanyaje zizi, kanyhi wuzizuce, vyono ku wulawilila mu madaha lono u wulajilize wulalajilizwa, nha vyono Yelusalemi yizengwe kanyhi, sunga mu mapango gono kolokuziza u mulongola muwaha u muhagulwa wo Mulungu, yolowa yakondya kupuluta majuma mupunghati. Na Yelusalemi mu madaha gago, yolowa yakondya kuzengwa wupya, hamonga ne mabalabala gayo, yolowa yakondya kuzenjelwa sunga ne magomawakali gono gali vilungo. Nayo yolokondya kuzengwa mu majuma makumi mutandatu na nyejete. Ninga i vilo vivyo, vyolowa vilo vyo wugaye.

Habakuki 3:2

Gwe Muwaha Mulungu, ane hulika zono wetuma, nane nhuga woga wuwaha. Ale, alu'kanyhi mu vilo vyetu, witumaje metumo mawaha gono wagetuma lulo. Na lono wuli mwi'kuwo lyako, ninga weze no lusungu.

Zakaliya 12:8

Mu vilo vivyo, u Muwaha Mulungu kolowadima i wanhu wose wono wekaye mu Yelusalemi, sunga na wono wasoceye muli wene, nawo wolotuga vilungo kotya vyono yali yenha Dawudi. Na we ndelo ya Dawudi wolowalongoza kotya nha malayika wo Muwaha Mulungu, kanyhi kotya Mulungu mweneco.

Zakaliya 4:10

Aluno wakukalala lono wakuwona luzengo lukubita luli mhola mhola. Ninga luno wowona vyono zelubabeli yakulujendeleza luzengo lwe Nyumba yo Mulungu, nawo wosangalala muno muno.” Malayika yakamhitula yakatya, “Zitala mupunghati, go meso mupunghati go Muwaha Mulungu gono gakusuma kuyiwona yinze yose.”

1 Wakolinto 1:27

Nha cinji wo wutya, u Mulungu yagahagula agalya, gono yinze yigawonaga nha wulele du, ho yasume kuwakoza cevu i we mahala, na kanyhi yagahagula agalya gono yinze yigawonaga nha wusocele du, ho yawakoze cevu wawo wono wali vilungo.