Nahumu 2:2 - Luganuzi Luswanu Kuli Wanhu Wose 2002

² (U Muwaha Mulungu kolugomola lukumyo lwa Isilayeli nha vyono lwali, lono walugu wali wakali nawateka.)

Nahumu 2:2 ပူးပေါင်းရင်းမြစ်များ

Zefaniya 3:11

Na mwi'pango lilyo, anye nyo wanhu wangu, molowa musina soko yo kuwona cevu, vyono mwali mwambedegala. Hambi 'ne nha nowawusa i wewoni wose, hamonga ne wevuni wose. Nanye lulo, si molombedegalila lukulu kanyhi mwi'tunda lyangu lyono lyelile.

Ezekiyeli 37:23

Hamba si wolokwiyavufya weneco so wuhemba vihwani vye cevu, hamba kwiyinjiza mu wituma wubi yaye. Nane nolowawusiza lukulu mu zinzila zo wubi, na mu zinzila zono zosuma kuwambuza wangaluce'ne. Noloweza, nawo wolowa wanhu wangu, nane nolowa Mulungu wawo.

Isaya 60:15

“Na ku wulawa lulu, hamba si kololecelwa lukulu kanyhi; hamba kusulwa yaye ng'o, hamba si kolowa kanyhi likaya yiciwa lyono lihodanjice yaye. Hambi ane nha nolokunoza wuwe ne lilumbo yiwaha kanyhi wuwe wunojezize wuwe hanhu hono hamemile nyemo cibitilila na cibitilila.

Hoseya 10:1

Waisilayeli wali wenha kotya nha muzabibu wono wulelile zabibu nyinji muno. Mu nghango yo wumoteswe wawo, yikawa yo nghango yo wonjeleze wo kuzenga vikumbicilo vinji. Na mu nghango yo wulezi we yisi yawo vyono wali winha, ale, yo nghango yo wuswanu we masumbili ge mabwe maswanu gono wanoza, gono wahembaga.

Yelemiya 49:9

Nawo wanhu lono wakuhepa zi zabibu, wasigazaga zinji mu mizabibu, nawo wahizi kolo wakuza mu madaha ge cilo, nawo wasolaga du zono wendile weneco.

Yelemiya 25:29

Nane nowanza u mulimo wangu wo kongomeza, nowanziza mwi'kaya lyangu no mweneco. Alo wene wakwihwesa nha vyono si wolipicizwa lo? Ng'o yaye, langa wolipicizwa du. Hambi 'ne, nha nowaletela wulugu i wanhu wose wono wali mono'nze. Vyo nghutya ane no Muwaha Mulungu, we Mihanga.

Zabuli 47:4

Kacipela yisi yiyi yiwe wuhazi wetu, yisi yono wo lukumyo lwa Yakobo mono yamwendile.

Yelemiya 48:11

U Muwaha Mulungu yakatya, “Mowabu kekalaga yacehile du nhondo zose. Yakali si nasolwa hamba kamonga yategulwe ku wuhamywe. Mowabu yehwanile ne divayi yono yisunjile, yono yikali nayidwa mu wulawa mu ciya aci, yitajilwe kanyhi mu ciya cinji. Holeka ne ndaso yakwe, yikali nahodanjika, hamba mhunjile yakwe kukawanika yaye.

Ezekiyeli 37:21

Hanyuma wuwalonjele nha vyono, ane no Muwaha Mulungu, nowakonghola wanhu wangu mu wulawa mu makungugo gose kono weyagaliye. Nowakonghola niwawice hamonga, niwagomole sunga ko ku yisi yawo.

Nahumu 2:10

Ninawi yahodangwa nha vyono yali yinojeye, alu yekala nyhiwa. Ne zinhumbula ze wanhu wayo, zenjilwa no woga, ne mafugamilo gawo gakucicima, ne vilungo vyeza musina, no wusu wawo wawomba so woga.

Nahumu 3:14

Holeka muwikanize malenga menji, mwiwikanize so wulugu wono wukuza. Kanyhi musikamye ne magomawakali genyu! Mutiwe lilongo, muwumbe matofali, ho muwe ne matofali gono mawumbile lukulu.