Mika 2:11 - Luganuzi Luswanu Kuli Wanhu Wose 2002

¹¹ “Wanhu awa, wakusaka muwizi mono yamemile wulambi no wukonji, mono yakutya ‘Nowila, divayi no wujimbi vilawile ko winji ku soko yenyu.’

Mika 2:11 ပူးပေါင်းရင်းမြစ်များ

1 Watemi 13:18

Nayo u muwizi mukombi munya Beteli yakamupitula yakatya, “Gwe muyangu, ane nane nha nili muwuzi cinya gwegwe, na ko wulajilize wo Muwaha Mulungu, malayika kanonjela nize nghusole cibitane ku kaya yangu, nghakupele ndigwa wulye.” Ninga hamba nhavivyo, yuyo muwizi mukombi yalambaga du, hamba si zali za mbeka yaye.

1 Watemi 22:6

Hodu Ahabu yakawakonghola wawizi waficile magana mane, yakawawuza yakutya, “Ati, wulenyi, mbite nghayihome Lamoti, hamba ng'o?” Nawo wawizi wakamutya, “Heya wubite, hambi u Muwaha Mulungu nha kokupela wusume.”

Jobu 31:5

Ane nelahiza nha vyono, si nokwitumila lukulu zimbi hamba si nokwijelela kuwalonjela wanji zinghani zo wulambi.

Zimbazi 25:14

Ne wanhu wono wehuwizaga vinhu ko wulambi, wehwanile mavunde ne mbeho, vyono visina mvula.

Isaya 28:7

Sunga ne wawizi, hamonga ne wakohani, wose wakupebesuka so ngholwe yo wujimbi. Hambi nha wang'wa muno wujimbi, nhondo sunga wakolwa, weza kwikobala hamba kumanya yaye. I wakohani wagalile muno muno, sunga luno, weza si wakuwumanya no wugubulilwe, wono Mulungu yakuwagubulila. Nawo wakohani nhavivyo, weza wang'wela muno wo wujimbi, sunga nhondo weza kulemwa no kulamula vyalo vyono wakuletelwa.

Isaya 9:15

I wakombi ne wanhu watambule, wawo wo mutwe. Nawo mucila, wo wawizi, wono wafundaga zo wulambi!

Yelemiya 14:14

U Muwaha Mulungu nayo yakapitula yakatya, “I wawizi walonjelaga mwi'tagwa lyangu, zinghani zo wulambi. Ninga 'ne hamba si niwatumile yaye, hamba kuwalajiliza nghani yinji yaye, hamba kuwalonjela nghani monga du. Holeka wene wakulonga zo wugubulilwe wono si wulawile kuli'ne yaye. Ku soko yiyo, u wuwile wawo, mbeka wusina cambuzi hamba cidodo bwete, hambi gago nha mahweso gawo du, gono wehwesize weneco.

Yelemiya 23:14

Nghondya kuwawona sunga ne wawizi, wono wali mu Yelusalemi, nawo wakwituma vibi muno muno, hambi nha wakwituma zo wusenyha, akuno wakulonga zo wulambi, wakuwatonga wanhu ku wituma zimbi du. Na ku soko yiyo, holeka hasina hamba monga, mono yakusuma kuleka kwituma zimbi. Holeka ku lubavu lwangu, ane nghuwawona vyono wose wabi du, wehwanile ne wanhu wa Sodoma na Gomola.

Yelemiya 23:17

Wene wakuwalonjela i wanhu wono wasina cihuliko kuli'ne, nha vyono zose zowawela swanu du. Na kanyhi wakuwalonjela wose wono wasina cihuliko, nha vyono magayo go gose si gowagana yaye.”

Yelemiya 23:25

Nane nha nizimanyile zose zo wulambi zono i wawizi wawo wakulonjela mwi'tagwa lyangu, akuno wakutya ati, yo nene mono niwalonjeleye zinghani zangu mu zindoto.

Yelemiya 23:32

Alu muhulicize ta, zono nghutya ane no Muwaha Mulungu! Ane mbeka, nili mulugu we wawizi wawo, wono wendile kulonga ze zindoto zawo, zono zimemile wulambi wose du. Hambi nha wakwitumamila zizo zindoto zawo, no kuwajiliza wanhu ku soko yo wulambi wawo, hamonga no widunhumuzi wawo. Ninga ane hamba si niwatumile yaye, hamba kuwalajiliza kose. Kanyhi wasina hamba nghani yo yose, yono yosuma kuwataza wanhu. Vyo nghutya ane no Muwaha Mulungu.”

Yelemiya 28:15

Namulonjela Hananiya zizi, ninga kanyhi nghonjeleza nghamutya, “Alu Hananiya! Wuhulicize ta! U Muwaha Mulungu hamba si yakutumile yaye, langa agwe wukuwanoza i wanhu wawa wawihuwile u wulambi wako.

Yelemiya 5:31

Hambi i wawizi nha weza wasina nghani zo kulonga, langa wakuwila zo wulambi du. I wakohani nawo, wakulondola zawo du weneco. I wanhu wangu nawo, wasina hamba zo kulonga muli zizo wene wakuwona zose swanu du. Ninga lu magu ta, hamba wolotendaci nhondo, kolo zeza kuza baho ku ndumo yayo?”

I Cililo 2:14

Sunga ne wawizi wako nawo, weza wasina cinji cono wokulonjela, langa zo wulambi-lambi du. No wuganule wawo wukukongaga du, hamba si wukuwa kukulajila zo wubi wako. Na mu nzila yiyo, wakukunoza agwe, ho wiwone nha vyono wusina soko yo kunena.

Ezekiyeli 13:22

“Alu, mulanje ta, ku soko yo wulambi wenyu, mwakondya kuwahodanga i wanhu wanji i waswanu, wono nali si nyendile niwatamise. Na kanyhi, mukuwemila i wanhu wabi, walece kunena zo wubi wawo, ho wawuponye wumi wawo.

Hoseya 7:14

Hambi nha si wakusuma kulomba kuli 'ne kwe nhumbula yo winenenyhezi yaye, langa wakwigwisa no kwigalagaza hasi nha vyono wanozaga wono si wamumanyile Mulungu. Na lono wakulomba so wuhemba ne divayi, wakwisalanga-salanga mu miwili no kwipela nghomele nha wono si wamumanyile Mulungu. Nhondo hamba watye, wo wubedegazici waco wuwu.

Mika 3:11

Nawo i walongola, wakulitema likaya kwe mafupo, nawo wakohani, wakuwejiza wanhu Wulajilize ho watuje musahala, nawo wawizi, wakulonga zo wugubulilwe wawo ho walipwe mapesa. Nawo wawa wose wakwiyitya ti, vyono Muwaha Mulungu yali hamonga nawo. Kanyhi wakutya, “Hasina zimbi zono zocagana, hambi Muwaha Mulungu nha yali hamonga nase.”

Mika 3:5

Wanhu wangu nha wakukongwa ne wawizi wo wulambi, wono wakuwehuwiziza vyono wokwikala wapolile, wawo wono wakuwalipa, na wono siwakwituma zizo, wakuwakajiziza wulugu. Ninga kuli wawizi wawa, u Muwaha Mulungu yakuwatya.

Walumi 16:18

Hambi iwanhu wono wenha wawo, nha si wakumwitumamila Mutwa wetu Kilisito, langa wakuzitumamila izinda zawo weneco du. Kanyhi so zinghani zawo, no wuganule wawo wo wupepeleze, wakuwa kuwakonga iwanhu we zinhumbula zimhelu mhelu.

Wafilipi 3:19

Ninga u mudumo wawo wowa ku moto, vyono zinda zawo nha yo mulungu wawo, wakuwona nha lukumyo muli zinghani zono ziwanojeye waziwonele cevu, wehwesaga za kononze du.

1 Yohana 4:1

Mo wendece wangu, mulece kumwihuwila munhu wo wose mono yakwiyitya yena Muhe wo Mulungu, langa mwamulaje mumulanjilile muno muno, ho muwone hono u munhu yuyo yakutongwa no Muhe wo Mulungu, hamba ng'o. Hambi i wawizi wenji wo wulambi nha wakwijela mononze.