Malaki 4:2 - Luganuzi Luswanu Kuli Wanhu Wose 2002

² Ninga kuli'nye mono muhulicile 'ne, i vilungo vyangu vye mhonelo, vyolomulawilenyi nhe'zuwa, no kumuletelenyi mhono, nhe nyhenjezi ye lizuwa. Mowa muli welecele, akuno musangalaye, kotya nyehe ndigulile mu wulawa mwi'kumbo.

Malaki 4:2 ပူးပေါင်းရင်းမြစ်များ

2 Samwili 23:4

yehwanile lizuwa lyono likudula hakali mitondo, lizuwa lyono liganozaga mahanze gawa kucindika lono gatonyelwa na mvula.’

Zabuli 103:3

Mwene kanenela wubi wangu wose, kanyhi kamhonya ne matamwa gose.

Zabuli 147:3

Yakuwaponya wono wadejepe zinhumbula, no kuziwopa zinghomele zawo.

Zabuli 61:5

Hambi 'gwe go Mulungu, nha kuhulika zo wihuwizo wangu, kanyhi kumhela ne ziswanu, zono wawehuwiza wono wakogopile gwegwe.

Zabuli 67:1

Wuciwonele lusungu go Mulungu, wucilugute, wucilanje ko wuswanu.

Zabuli 84:11

U Muwaha Mulungu yo mudimi wetu, kanyhi yo mutemi wetu wo lukumyo, mwene kacimotyaga vye lihewa lyakwe, kanyhi yakucipela no lukumyo. Muwaha Mulungu si yakuwa kuwema cinji co cose ciswanu, wono wetumaga ze ling'ani.

Zabuli 85:9

Mbeka, mwene yewikanize kuwaponya wose, wono wamogopile, no lukumyo lwakwe, lokwikala mu yisi yetu.

Zimbazi 4:18

Nayo nzila yono wakolaga wanhu we ling'ani, yihwanile wuzelu we lizuwa lono likusosomoka, nalyo liwa kujendelela kutuga wuzelu muno sunga kolo welelecela.

Isaya 30:26

Nawo mwezi wolong'alala nhe lizuwa. Nalyo lizuwa lyolong'alala wung'alale wuwaha muno kali mupunghati kuciza wung'alale walyo we vilo vyose, lyolotowelela wung'alale wa vilo mupunghati mwi'zuwa lilyo limonga. Na zizi zolokwijela mwizuwa lyono Muwaha Mulungu yeza kuwawopa bandeji wanhu wakwe, mu zinghomele zono yawapela, hamonga no kuwaponya.

Isaya 35:6

Nawo we citewe, wolozumha-zumha no kuvina, nawo wono wali cibwibwi, wolokwimba na nyemo. Vikolongo vye malenga vyolohuluma mu nyika.

Isaya 49:6

Muwaha Mulungu yakanonjela yakutya, “Nina mulimo muwaha wono nghuwiciye agwe go mwitumami wangu. Ninga si mulimo wo kuwagomola du mu lukumyo i wanhu wa Isilayeli, wono wasigaye, langa nokunoza kanyhi wuwe wuzelu kuli makungugo, i yinze yose ho yisume kuponywa.”

Isaya 50:10

Nanye wose mono mumuhulice Muwaha Mulungu, no kuzihulika zinghani zo mwitumami wakwe, mumanye nha vyono mokola mu nzila yo wutitu tuku. Ninga anye mumwitumbile du Muwaha Mulungu mumwegamile Mulungu wenyu.

Isaya 53:5

Ninga yahomwa so wubi wetu yakatowangwa so mahodango getu gono cetuma, Nase cikuponywa so wulipicizwe wakwe wono yawutuga. Na so wutamiswe wakwe, ase mo ciponyezwe.

Isaya 9:2

I wanhu wono wajendelaga mu wutitu wawona wuzelu wuwaha, wali wekaye mu yisi ye citi ciwaha ninga lu, wuzelu wuwabulilila.

Yelemiya 17:14

Gwe go Muwaha Mulungu, nghukulomba wumhonye, nane noponela lukulu, wunhaze, nane nokwikala mholile. Hambi nha yo gwegwe du wuli wene, mono nghukumyaga!

Yelemiya 30:17

Hambi nha nolomugomolelenyi kanyhi u wuswanu wenyu, kanyhi nolomuponyenyi ne zinghomele zenyu, hamba i walugu wenyu wawe kutya, ‘Alu mulanje, Sayuni yakondya kulekwa hasina hamba yunji kanyhi mono yakuyitondowoza yaye.’ Vyo nghutya, ane no Muwaha Mulungu.”

Yelemiya 33:6

“Ninga hamba nhavivyo, nololiponya likaya lili, hamonga ne wanhu wayo, no kuwaleka wekale ne miwili miswanu. Nane nolowalajila zo mulamu, na ze mikalile yono yipolile.

Ezekiyeli 47:12

Na mu zinyenje zose ze likolongo ako na ako, molocindika mibici minji ye mawala gose, yono yolowa ndigwa. Ne mahamha gayo, hamba si golowa kunyala yaye, kanyhi yojendelela du kulela mikalo, hamba kuduma yaye. I mibici yiyo, yolowa kulela mikalo mipya mwezi na mwezi, hambi nha yikwitilwa malenga gono gakuhuluma mu cikolongo, cono cilawiliye mu Nyumba yo Mulungu. Ne mikalo ye mibici yiyo, yolowa yo ndigwa, ne mahamha gayo, golowa so miti yo kuponezya wanhu.”

Hoseya 6:1

Wanhu wakutya, “Alenyi ciwuye kuli Muwaha Mulungu! Mwene yacitamisa yakondya, ninga yamanyile vyono kociponya! Yacipela zinghomele, ninga kociponya zinghomele zetu.

Hoseya 6:3

Alenyi cimumanye Muwaha Mulungu. Mwene kokuza kuli'se lono wela hakali mitondo muno, nayo kokuza kuli'se kotya mvula ye mhinga yono yidedewazaga yisi.”

Malaki 3:16

Ne wanhu wono wamogopile Muwaha Mulungu, walonganaga weneco wose, nayo Muwaha Mulungu, yakawahuliciza, yakahulika zono walonganaga. Hali Mulungu, hakawa na citabu cono candikwe matagwa ga wose wono wamogopaga Muwaha Mulungu no kumuhulika.

Matayo 11:5

vyono i wabofu wakuwona kanyhi, we vitewe nawo, wakujenda, nawo wono wena wukoma, wakwezwa, na we ciziwi nawo wakuhulika, kanyhi sunga na wono wafwiye, nawo wakuzukulwa, ne waciwa nawo wakuganulilwa u Luganuzi Luswanu.

Matayo 23:37

“Gwe Yelusalemi, Yelusalemi, mono wukuwa kuwawulaga iwawizi, sunga no kuwatowanga ne mabwe awalya wono watumwagwa u kwako. Kalinga kono nasakaga kuwakongholela iwanago kono kwangu, nha vyono nghuku yivikunyanjililaga viziyoziyo vyayo hasi ye mabawa gayo, ninga hamba si wenda yaye.

Luka 1:50

No lusungu lwakwe luli kuli wanhu wose wono wamogopaga.

Luka 1:78

U Mulungu wetu mupolo, kanyhi yali lusungu. Koleta wuzelu wo wukombozwe, wucizize ku wulawa ku wulanga,

Luka 2:32

Wuzelu wo kuwagubulila wono si Wayahudi. No lukumyo lwe wanhu wako Waisilayeli.”

Yohana 1:14

I Nghani nayo yakawa munhu, yakekala mwetu. Nase cikayiwona i nhojo yakwe, i nhojo yakwe mwene mono mwana we ciwene wa Baba; yamemile lihewa ne mbeka.

Yohana 1:4

U Mwene yali yo mwamulizo wo wumi; no wumi wuwo wali wuzelu we wanhu wose.

Yohana 1:8

U mwene Yohana, yo si yali wuwo wuzelu weneco, langa yaza du, ho yawalonjele wanhu zo wuzelu wuwo.

Yohana 12:40

“U Mulungu kawabofuza meso gawo, Kawapuvya i mahala gawo Ho walece kuwona ne meso Hamba walece kwizuka mu mahala gawo Hamba kumhitucila ho niwaponye.”

Yohana 8:12

Yesu lono yaduwaga ne Wafalisayo kanyhi, yakawalonjela, yakutya, “Ane yo nene wuzelu we yinze. Mono yakunhyatya nene, si kojendela lukulu mu wutitu, langa kowa no wuzelu wo wumi.”

Yohana 9:4

Yicinojeye ciwitume u mulimo wa mono yanhuma lono hakali misi, hambi i cilo nha cikuza, lono munhu si kosuma kwituma.

Metumo ge Watumwa 13:26

“Nye wandugu zangu mo wana we mhuga ya Abulahamu, na nyenye wose mono mumogopile u Mulungu! Yo sese mono cileteywe inghani ye mhonelo yiyi.

Metumo ge Watumwa 13:47

Hambi Muwaha nha yacilajiliza yakatya, ‘Nghukuwika gwegwe wuwe wuzelu we makungugo, Wuwe nzila ye mhonelo mu yinze yose.’ ”

Metumo ge Watumwa 26:18

Kowabunzulula i meso gawo, ho wasume kuwuka ku wutitu, ho wapitucile kuzelu, wawuce mu vilungo vya Setani, wamupitucile Mulungu, na so wihuwilo, ho watuje wunenelwe wo wubi, ho watuje wuhazi, hamonga na walya wono wakondya kuwa wanhu wo Mulungu.’

2 Watesalonike 1:3

Nye wandugu zangu, yicinojeye ceze kumulumbo Mulungu nhondo zose ku soko yenyu. Kanyhi yicinojeye cinoze nhavivyo, vyono u wihuwilo wenyu wukucila muno muno, sunga no wiyendi wenyu wukucila konjelezeka muno muno.

2 Petelo 1:19

Kanyhi sunga ne zinghani ze wawizi zikuyihomelela nghani yiyi, nanye mukunoza viswanu hono mukuyibata, hambi nha yinha tala yono yikumulika hanhu hatitu, sunga lizuwa lililya kolo likusomoza, no wuzelu we nyelezi yimwacinghunghu, kolo wukubulila mu zinhumbula zenyu.

2 Petelo 3:18

Ninga mujendelele kuwilucila mwihewa no mu wumanyo Mutwa wetu no Mukombozi Yesu Kilisito. U lukumyo lweze kuli mwene, kulawa lulu na ku cibitilila Heya.

1 Yohana 2:8

Hamba nhavivyo i lilajilizo lili lyono nghumwandicilenyi, lye 'lajilizo lipya, ne mbeka yalyo, yikwijelela muli Kilisito na muli nyenye nhavivyo. Hambi u wutitu nha weza kuwuka, no wuzelu we mbeka weza kwamula kubulila.

Wugubule 11:18

Wanhu wono si wamumanyile Mulungu wakakolwa likuwo, vyono lidaha lye likuwo lyako lyakondya kuza, lyo kuwaling'aniza i wafu. Naco co cipango co kuwapelela ligawo lyawo wetumami wako wawizi wanhu wako, na wose wono walikumyaga, litagwa lyako, wawaha ne wadodo. Kanyhi co cipango co kuwongomeza wono wakuyongomeza yinze.”

Wugubule 2:28

Nawo wogatema makungugo no kugadimila nghome ya cuma, no kugatulanjiza nha ciya ce lilongo. Kanyhi nowapela i nyelezi yi mwacinghunghu.

Wugubule 22:16

Ane yo nene Yesu, nimutuma malayika wangu, yamuhomelelenyi i zinghani zizino mu makanisa. Ane nili wo lulelo lwa Dawudi: Ane yo nene i nyelezi i mwacinghunghu, yono ying'alalaga ya hakali mitondo!

Wugubule 22:2

Ne likolongo lilyo likuhuluma malenga, likolile hagati ye balabala mbaha ye likaya. Na mu mhelo ye likolongo lilyo, hali howuli mubici wo wumi, wono wukulela mikalo kali yikumi na nyejete kwa mwaka, wo wutya wukulela mwezi kwa mwezi, ne mahamha go mubici wuwo, yo miti yo kuponezya i wanhu we makungugo.

Lutu 2:12

Holeka Muwaha Mulungu, u Mulungu we Waisilayeli, yakumotye so zizo zono wetuma. Kanyhi wutuje cihumbilizwa cono cimemeleceye, ku wulawa kuli yuyo Muwaha Mulungu we Waisilayeli, yuyo mono wumuzize ho yakukamise.”