Malaki 1:4 - Luganuzi Luswanu Kuli Wanhu Wose 2002

⁴ Na hono Waedomu u lulelo lwa Esawu watye, “Imakaya getu, heya gahodangwa, ninga cogazenga kanyhi.” Nayo Muwaha Mulungu kopitula yatye, “Heya, lece wagazenje kanyhi, ninga nane nogamwagulanga kanyhi. Ne wanhu wowacema watye, ‘Yisi yo wubi’ kanyhi ‘Lyo likungugo lyono Muwaha Mulungu yalikoleywe likuwo cibitilila.’ ”

Malaki 1:4 ပူးပေါင်းရင်းမြစ်များ

Jobu 12:14

Na hono Mulungu yamwagule, nani kanyhi mono kosuma kuzenga, hamba nani mono kosuma kumuwopolela mu jela, u munhu mono Mulungu yamudindiye?

Jobu 34:29

Na hono Mulungu yawe si yakusaka kwituma nghani yinji, alo nani mono kosuma kumuhosa. Na hono yawuhundice wusu wakwe, wanhu wowula wutazi.

Jobu 9:4

Hambi Mulungu nha yo we mahala gose kanyhi yali vilungo, hasina munhu hamba monga, mono kosuma kwima ho visumanize nayo.

Zabuli 127:1

Muwaha Mulungu hono yalece kuyizenga kaya, wono wakuyizenga wakwigaza bwete. Muwaha Mulungu hono yalece kulidima likaya, wono wakulilindiliza, wokwikala meso bwete.

Zabuli 137:7

Gwe go Muwaha Mulungu, wulece kuzisemwa yaye zono wazituma Waedomu, lono Yelusalemi yasolelwa ne walugu, wukumbucile vyono watya, “Yimwagulenyi Yelusalemi! Sunga ne mabwe go musinji gose!”

Zabuli 33:10

U Muwaha Mulungu kawuwembulaga wuhile we makungugo, no kugapata i mahweso gawo.

Zimbazi 21:30

I mahala go munhu, hamba lukumyo, hamba wizuce, si vyosuma kukutaza cinji, hono Muwaha Mulungu yo yalece kuwa hamonga nagwe.

Isaya 10:4

Hambi wose nha mowulajilwa ku wulugu, hamba mosolwa nhe wafungwa. Ninga hamba nhavivyo, likuwo lyo Muwaha Mulungu, si lyoduma ng'o, langa kojendelela kuwugolola muwoko wakwe ho yalipicize.

Isaya 11:14

Langa wene wolokwilunza hamonga, wabite wakayihome yisi ye Wafilisiti wa ku lubavu lwa kumwezi, wawatece ne wanhu wono wekaye ku cilima. Kanyhi wolowasuma i wanhu wa ku Edomu, na Mowabu. Nawo i wanhu wono wekaye mu yisi ya Amoni, wolowa wena cihuliko kuli wene.

Isaya 34:10

Nayo lami yolowa yigubice mu yisi yose misi ne cilo, ne malyosi gayo gowa kudoma kucanyha cibitilila. Nayo yisi yokwikala vyo yitongo du ndelo na ndelo. Hamba hasina yunji kanyhi mono kolokola mu yisi yiyo.

Isaya 34:5

Nayo Muwaha Mulungu yakondya kuwuwikaniza mumaje wakwe kuko ku wulanga, nawo woyitowa Edomu, i wanhu wono wawiciywe wongomele.

Yelemiya 31:17

Kanyhi, kowuli witumbilo ku vilo vyako vyo mudumo, ne wanago wolowuya ku yisi yawo weneco. Vyo nghutya, ane no Muwaha Mulungu.

Yelemiya 49:20

Alu, muhulicize ta, i mahweso gono nghusaka niwatendele i wanhu wa mwi'kaya lya Temani. Sunga ne wana wawo wolokwejenhwa, ne wanhu wose wolokwinjilwa no woga.

Yelemiya 49:7

Azi zo nghani zono u Muwaha Mulungu we mihanga, yakuzilonga kuli yisi ya Edomu, yakutya nhavi, “I wanhu wa Edomu, alo wakondya kwajiliza zinghani zawo zo wutonji lo? Ne watonji wawo nhondo, weza si wakuwalonjela lo zono ziwanojeye wetume? Ne mahala gawo gose nhondo gakondya kwajilila lo?

Yelemiya 49:8

Holeka anye nyo wanhu wa Dedani, aluno mutize, muwuye ku nyuma, mwihundice! Hambi nha nghuwongomeza luno i wana wa Esawu, vyono lipango lyangu lyakondya kufika lyo kuwongomezeza.

Yelemiya 5:17

Nawo wololya vya mu nhwanga yenyu, hamonga ne zindigwa zenyu. Wolowawulaga i wana wenyu we cilume hamonga na we cicekulu. Wololya matewa ge zing'ombe zenyu, ne zingholo zenyu. Woloyihodanga ne mizabibu yenyu, hamonga ne mibici yenyu ye mikuyu. Ne makaya genyu gono mwitumbiye, gono gena magomawakali, gose gago, golokongomezezwa lukulu ne wasilikale wo wulugu.

I Cililo 3:37

U wuhile wo Muwaha Mulungu du, wo wunojeye wuwe kwitumwa nhondo zose.

Ezekiyeli 11:10

Nanye wose molowulajilwa mu wulugu, mu yisi yenyu nyenye nyo weneco. Na mu nzila yiyo, nhondo i wanhu wose ho wolomanyila vyono, ane yo nene Muwaha Mulungu.

Ezekiyeli 25:13

Nane ku soko yiyo, holeka noyilipiciza Edomu, nowawulaga wanhu wose hamonga ne vilimu. Noyinoza Edomu yiwe nyhiwa, ku wulawilila kwi'kaya lya Temani, sunga ko kwi'kaya lya Dedani, ne wanhu wose wowulajilwa ku wulugu.

Ezekiyeli 25:14

Nawo i wanhu wangu Waisilayeli, wolowalipiciza ko wukali Waedomu ku soko yangu, no kuwanoza Waedomu wawuwone wukali we likuwo lyangu. Nawo Waedomu baho ho wolomanyila u wukali wo wulipicize wangu vyono winha.” Vyo yakutya u Muwaha Mulungu.

Ezekiyeli 26:14

Nololileka litalawe lili bwete, i hanhu hono wanimula 'somba wowa kwanika zinyavu zawo. Ne likaya, si lilazenjelwa lukulu kanyhi yaye. Vyo nghutya ane no Muwaha Mulungu.”

Ezekiyeli 35:4

Nologaleka makaya genyu matongo. Ne yisi yenyu yolowa mu wambuce. Nanye nhondo baho, ho molomanyila vyono ane yo nene Muwaha Mulungu.

Ezekiyeli 35:9

Nane nolokunoza wulekwe cibitilila, na holowa hasina munhu hamba monga, mono kolokwikala kanyhi mu makaya gako. Nagwe go yisi ya Edomu, baho nhondo, ho wulamanyila nha vyono ane yo nene Muwaha Mulungu.

Amosi 1:11

Muwaha Mulungu yakutya, “Wanhu wa Edomu, wetuma wubi kali kenji. Na ku soko yiyo, nane nowalipiciza. Hambi nha wawatendela vibi wandugu zawo, Waisilayeli, hamba kulajila lusungu yaye. Ne likuwo lyawo, likawa vyo lijendeleye du lisina wumalice yaye.

Amosi 3:15

Nane nolozihodanga zinyumba ze madaha ge cinyuli na ze madaha ge livuce. Ne zinyumba zo wihambo we meno ge zinhembo, zolokongomezwa ne zikaya zose zimbaha, zolohodanjicila lukulu.”

Amosi 5:11

Mukuwatema i waciwa no kuwahiziza wuhemba wawo. Na ku soko yiyo nanye simokwikala mu zikaya ziswanu zono muzenjile ne mabwe maswanu, hamba kung'wa divayi yono yikulawa mu zizabibu zenyu ziswanu zono mulimile.

Amosi 6:11

Lono Muwaha Mulungu yakulavya lilajilizo, zinyumba zimbaha ne zindodo obenanjika tici tici.

Amosi 6:2

Mubite mulanje ta mwikaya lya Kaline. Hamba mwi'kaya liwaha lya Hamati, sunga ko kwi'kaya lya Gati, mu yisi ye Wafilisiti. Wulenyi, wena cinji cono cicizize wutemi wa Yuda na Isilayeli? Hamba yisi yawo, wuwaha wayo wucicize yisi yenyu?

Obadiya 1:1

Awuno wo wugubulilwe wa Obadiya, wa zono Muwaha Mulungu yazilonga kuli likungugo lya Edomu. U Muwaha Mulungu yamutegula mutumwa wakwe kuli makungugo, nase cayihulika i nghani yakwe, yakutya, “Ale, wiwikanizaje! Cibite cikayihome Edomu!”

Obadiya 1:10

“Kolipicizwa agwe Edomu, ku soko vyono wali wuli muhizi, kanyhi wukawawulaga sunga ne wanduguzo, i wana wa Yakobo, holeka nagwe luno kohodangwa no kuwembulilwa lukulu cibitilila.

Malaki 1:3

no kumusula Esawu no lulelo lwakwe. Ne yisi yakwe ye matunda, nghayinoza yiwe wambuce, nghayileka yiwe wikalo we macewe ga mu mbago.”

Matayo 12:30

U munhu wo wose mono si yakwilunza nane, yuyo yali suta nane, yuyo keyagazaga.