I Cililo 2:14 - Luganuzi Luswanu Kuli Wanhu Wose 2002

¹⁴ Sunga ne wawizi wako nawo, weza wasina cinji cono wokulonjela, langa zo wulambi-lambi du. No wuganule wawo wukukongaga du, hamba si wukuwa kukulajila zo wubi wako. Na mu nzila yiyo, wakukunoza agwe, ho wiwone nha vyono wusina soko yo kunena.

I Cililo 2:14 ပူးပေါင်းရင်းမြစ်များ

Isaya 58:1

Muwaha Mulungu yakutya nhavi, “Alu wuzoze kwe lizi yiwaha munghango vyono kosuma! Wuwalonjele wanhu wangu Isilayeli zo wubi wawo!

Yelemiya 2:8

Ne wakohani nawo, hamba si wawuza watye, ‘Alu u Muwaha Mulungu yali hayi lo?’ Heya si wasuma kuwuza, hambi i wejizi wangu wo wulajilize nha si wali wamanyile 'ne. Nawo i walongola wakambedegala 'ne, i wawizi nawo, wakawa wakuwilila mwi'tagwa lya Baali, wakawa wakuvihemba vihwani, vyono si vikwiliye cinji co cose.

Yelemiya 20:6

Sunga na gwegwe Pashuli, hamonga na we mhuga yako, wose molotekwa mutegulwe ku Babiloni. Nagwe Pashuli, kolofwila kuko, wakuzice kuko, hamonga ne wayago wono wali wuwendile, wono wawalonjelaga nghani nyinji zo wulambi.’ ”

Yelemiya 23:22

Ninga mbeka hono wali wawe wagamanyile mahweso gangu ge cinyele, baho langa, ho wali wasume kuyiganula nghani yangu kuli wanhu wangu, no kuwanoza wasume kugaleka i metumo gawo mabi, gono wetumaga hamonga ne zinzila zawo zimbi.

Yelemiya 23:36

Ninga si yiwanojeye wajendelele kwitumamila zinghani zo wutya, ‘U mutegulo wo Muwaha Mulungu.’ Na hono munhu wo wose yejelele du yanoze nhavivyo, nane noyinoza nghani yangu mbeka yiwe mutegulo kuli munhu yuyo. Hambi i wanhu nha wakondya kuzileka zinghani zo Mulungu wawo, u Mulungu mumi, u Muwaha Mulungu, we mihanga.

Yelemiya 28:15

Namulonjela Hananiya zizi, ninga kanyhi nghonjeleza nghamutya, “Alu Hananiya! Wuhulicize ta! U Muwaha Mulungu hamba si yakutumile yaye, langa agwe wukuwanoza i wanhu wawa wawihuwile u wulambi wako.

Yelemiya 29:21

“U Muwaha Mulungu, we mihanga, u Mulungu wa Isilayeli, kuli zinghani za Ahabu mwana wa Kolaya, na Zedekiya mwana wa Maseya, wono wakumulonjelenyi zinghani zo wulambi mwi'tagwa lyakwe, yakutya nhavi, Nowatajila mu miwoko ya Nebukadineza u mutemi wa Babiloni, nayo yawawulajile ha meso genyu.

Yelemiya 37:19

Hamba wali hayi lu i wawizi wenyu wono wamuwililenyi wakutya vyono, mutemi wa Babiloni si kolokuza yakuhome yaye hamba kuyihoma yisi yiyi?

Yelemiya 5:31

Hambi i wawizi nha weza wasina nghani zo kulonga, langa wakuwila zo wulambi du. I wakohani nawo, wakulondola zawo du weneco. I wanhu wangu nawo, wasina hamba zo kulonga muli zizo wene wakuwona zose swanu du. Ninga lu magu ta, hamba wolotendaci nhondo, kolo zeza kuza baho ku ndumo yayo?”

I Cililo 4:13

Heya, zizi zejela, ku soko wawizi wawo wetuma wubi, ne wakohani nawo wakasutya, no kwambuza lifwa, kuli wanhu wono wasina masutya.

Ezekiyeli 13:22

“Alu, mulanje ta, ku soko yo wulambi wenyu, mwakondya kuwahodanga i wanhu wanji i waswanu, wono nali si nyendile niwatamise. Na kanyhi, mukuwemila i wanhu wabi, walece kunena zo wubi wawo, ho wawuponye wumi wawo.

Ezekiyeli 22:25

Hambi i walongola wayo nha wehwana zisimba zono zikolomelaga zinimu zono gakondya kuziwulaga. Hambi nha weza wawulaga wanhu, wakusola mapesa menji, hamonga ne vinhu vyo wuguzi wukamu. Na mu nzila ye wanhu wawulaji, wono wawapelaga pesa ho wawulaje wanhu, nalu wakondya kuleka wacekulu wenji wono wafwiliywe ne walume zawo.

Ezekiyeli 22:28

Nawo i wawizi, wazihundice zo wubi wuwu, wehwana ne wanhu wono wahiliwaga swakala mwi'jinji. Wawonaga zo wugubulilwe wo wulambi, no kuwila zo wulambi du. Wene weyitezaga nha vyono wakuganula nghani yo Muwaha Mulungu, na kumbe nane no Muwaha Mulungu ho si niwatumile yaye.

Ezekiyeli 23:36

Nayo Muwaha Mulungu yakanonjela kanyhi yakatya, “Gwe go munhu, wule, wakondya kwiwikaniza ho wuwaling'anize Ohola na Oholiba? Ale wuwalonjelaje ze makani ge mawifyo gono wali kwituma.

Hoseya 9:7

Ninga cipango co wulipicizwe cakondya kuza, icipango cono wanhu wolozituga zono ziwanojeye. Kolo zizi zikwijela, Isilayeli wolozimanya, nawo wololonga watye, “Muwizi ayu yapuwile! Munhu ayu mono yakutongwa no Mulungu yena lukwale.” Anye nyo wanhu, musulile 'ne ku soko yo winji wo wubi wenyu.

Mika 2:11

“Wanhu awa, wakusaka muwizi mono yamemile wulambi no wukonji, mono yakutya ‘Nowila, divayi no wujimbi vilawile ko winji ku soko yenyu.’

Mika 3:8

Ninga ane, Muwaha Mulungu kamhela vilungo vyo muhe wakwe, hamonga no wusume, no wuling'anizi, kamhela 'ne vilungo, ho niwalonjele Isilayeli u wubi wawo vyono winha.

Zefaniya 3:4

Ne wawizi wayo si wehuwilwa, kanyhi wakonji. Wakohani nawo, wahatajila wavu i hanhu hono helile, kanyhi wakulipitula ne lilajilizo lyo Mulungu ku soko ye cambuzi cawo weneco.