Isaya 7:13 - Luganuzi Luswanu Kuli Wanhu Wose 2002

¹³ Ku soko yiyo, nayo Isaya yakapitula yakatya, “Ale, hulicizenyi ta anye mo mhuga yo mutemi Dawudi. Yo nghani 'mbi muno kuli'nye lono mukuwuhodanga wukangalizi we wanhu, alu mukwihwesa mosuma kuwuwusa no wukangalizi wo Mulungu hongo?

Isaya 7:13 ပူးပေါင်းရင်းမြစ်များ

Mwamulizo 30:15

Ninga mwene Leya yakamukalipila yakutya, “Mwene hongo wukwihwesa vyono nghani ndodo yo kumboka mulume wangu, alu kanyhi wukusaka wusole sunga ne zinyanya za mu mbago zono yaziletile mwanangu?” Laheli nayo yakamupitula yakatya, “Hono wumhele zizo zinyanya za mu mbago zo mwanago, holeka Yakobo kokuza yagone kuli'gwe zuwali.”

2 Zinghomo 21:7

Ninga Muwaha Mulungu si yenda yawongomeze wutemi wa Dawudi, hambi nha yali yehuwiza kuli mwitumami wakwe Dawudi, nha vyono lulelo lwakwe, lojendelela kutema vilo vyose.

Zabuli 45:5

Ne zisonga zako nha nghali muno muno, nazo zipuguzaga mu zinhumbula ze walugu wo mutemi, sunga ne makungugo gakugwa hasi yako.

Isaya 1:14

Nane hamba si nghuzisacila lukulu, zi sikukuu zenyu ze Ndawo yo Mwezi, na ze vilo vyono vyelile. Hambi nha zeza nha mutegulo du kuli'ne, wono si nosuma kuwudinghula yaye.

Isaya 1:24

Nalu muhulicize zono yakulonga u Muwaha Mulungu u Mudaha vyose, u Mulungu wa Isilayeli yakutya, “Alu, nowalipiciza walugu wangu, nawo si wongaza kanyhi.

Isaya 22:22

Nomupela wulajilize wose yawe hasi yo mutemi, u mwana wa Dawudi. Mwene yo kokamisa zifunguwo zose ze nyumba ya Dawudi. Nayo hono yadigula, hasina munhu mono kodinda, na hone yadinda, hasina munhu mono kodigula.

Isaya 25:1

Gwe go Muwaha Mulungu, yo gwegwe go Mulungu wangu. Nane nokupela cogopo, no kulikumya litagwa lyako. Hambi nha wetuma metumo go wizine kugafisiliza ko wihuwilwa i mahweso gako gono wagawikaniza ku wulawa katali na katali.

Isaya 43:24

Nanye hamba si mwangulila wuvumba yaye, hamba kunyigutya ne mhama ye mitugo zenyu. Langa anye mwamhela mutegulo muzito muno wo wubi wenyu, mukasakaza ne zimbi zono mwetuma.

Isaya 63:10

ninga wene wakamubeza Mulungu, wakamukalaza muhe wakwe mono yelile. Holeka nayo Muwaha Mulungu yakawapitucila yakawa mulugu wawo, yakawahoma.

Isaya 7:12

Nayo mutemi Ahazi yakapitula yakatya, “Aa, ng'o! Ane si nosaka wundajile citanjilo, hambi nha si nghwenda nimujele Muwaha Mulungu.”

Isaya 7:2

Nayo Ahazi mutemi wa Yuda, yali yeza kuhulika nha vyono walugu walawa Siliya, nawo wakondya kwinjila mu yisi ya Isilayeli, hodu mwene Ahazi, hamonga ne wanhu wakwe, wakawa kutuga woga wuwaha muno, wakawa kwanza kucicima kotya mibici yono yikuputwa ne libeho.

Yelemiya 21:12

Munojeye muwe kuling'aniza wuling'anizi we ling'ani nhondo zose. Kanyhi mweze kumutaziza munhu wo wose, mono yakukongwa-kongwa no kwiwonelwa no munhu yunji. Na hono mulece kwituma nhavivyo, u wubi wono mukwituma, wonghoza likuwo 'ne, nalyo lyokwaka nha moto, wono si wosumika no kuzimywa yaye.

Yelemiya 44:22

Kanyhi mulanje nha vyono, ne yisi yenyu yakondya kuwa matongo, hasina hamba munhu mono yekaye mumo. Hambi nha ceza cinhu ca kogofya muno. Sunga ne wanhu weza kulitumamila litagwa lyayo nha wulijitwe. Hambi u Muwaha Mulungu, nha si kosuma kujendelela kuwukangalila u wubi wenyu, hamonga ne mabi genyu gono mukwituma.

Yelemiya 6:11

Hambi nane nha memile likuwo lyako kuli wene, 'gwe go Muwaha Mulungu. Nane hamba si nosuma kwiyimila yaye.” Nayo u Muwaha Mulungu yakanonjela yakatya, “Alu wulimwagaje likuwo lyangu mu wana, wono wali mu zinzila, na mu wikongholelo we wazelelo. Nawo i walume hamonga ne wagolece zawo, wolosolwa no kutegulwa kutali, hamonga ne wakombi wose, nawo hamba si wolosigazwa yaye.

Ezekiyeli 16:20

“Hanyuma kanyhi, wukawasola i wanago we cilume, ne we cicekulu wono wandelela, no kuwalavya kuli vihwani. Wule, zizi si zikulajila u wubi wono wukwituma, nha vyono weza si wuli mwihuwilwa kuli'ne,

Ezekiyeli 16:47

Ninga wule, wazityatya zinzila zawo hamba wetuma mu nghango ye mawifyo gawo? Aa, ng'o! Agwe si wetuma nhavivyo, langa nagwe wukahodanjika hadodo du, kuciza wene vyono wali wenha muli zose zono wetuma.

Ezekiyeli 34:18

Ninga hamba nimulisenyi mu mahanze maswanu, yowa nha nghani ya bwete, hambi nha mogakanyanjila du ne migulu yenyu, i mahanze gono gowa gakali gasigaye. Nha vyono mwang'wa i malenga maswanu, no kugatibula gono gali gasigaye.

Ezekiyeli 6:9

wolokwiyagalila mu zinghungugo zinji, wakekale kuko nha wafungwa. Nawo lono wowa wali kuko, wolonghumbucila lono wali mugati ye makungugo, no kumanya nha vyono yo nene mono niwalipicize no kuwakoza cevu, ku soko yo wuwula wihuwilwa wawo. Hambi nha wakondya kundeka 'ne, no kwenda vihwani si nha nene. Holeka ku soko yiyo, wolowa wakondya kwiyavufya weneco ku soko yo wubi, hamonga ne makani ge cevu gono wetumaga.

Amosi 3:13

Alu muhulicize, mukawakaje wo lulelo lwa Yakobo zo yakutya, Muwaha Mulungu u Mulungu we Mihanga.

Malaki 2:17

Mwamukataza u Muwaha Mulungu ne zinghani zenyu zono mukulonga. Ninga kanyhi mukuwuza mukutya, “Camukataza nhawule?” Mwamukataza no wulonje wenyu wono mukutya, “Muwaha Mulungu kehwesaga i wetuma vibi wose waswanu, kanyhi yakuwenda.” Hamba lono mukutya, “Yali hayi Mulungu mono koling'aniza?”

Wuwale 16:13

Agwe wukwihwesa nghani yiyi ndodo yo kuciwusa mu yisi yono yina moso, yisi ya Misili, no kucileta ahano hono nyika, ho wuciwulaje? Alu hongo wukusaka kwitemezya muli sese?

Wuwale 16:9

Alu mwene, anye mukwihwesa nha vyono nghani yiyi ndodo hongo, vyono u Mulungu we Waisilayeli yamusiwanulenyi nyenye mu wulawa mu mhuga ye wanhu, ho mumusejelele no kunoza wuhembi wenyu mwi 'Hema lyo Muwaha Mulungu, no kuwetumamila mhuga yose ye Waisilayeli lo?

Luka 1:69

Kacipela Mukombozi we vilungo mu mhuga ya Dawudi u mwitumami wakwe.

Metumo ge Watumwa 7:51

“Anye mo wakamu ku wuhulice! Izinhumbula ne makutu genyu vinha vye wanhu we makungugo. Anye mwinha i wakuku zenyu. Nhondo zose mumwimilaga u Muhe Mono Yelile.

Wahebelaniya 3:10

Ku soko yiyo nane nghawakolelwa likuwo i wanhu wawa, nghawa kutya, “I mahweso ge wanhu wawa gajiliye, wakali si nazimanya zinzila zangu.”