Isaya 66:3 - Luganuzi Luswanu Kuli Wanhu Wose 2002

³ “Hambi i wanhu nha wetumaga nha vyono wendile weneco. Hambi wene nha wakuwona co cimonga du, hono mu makumbiko gawo wawulaje ng'ombe hamba munhu, hamba wawulaje ngholo, hamba kubena singo ye 'mbwa, hamba hono walavye cilavywa co wusaje, hamba sakami ye magubi, hamba na hono walavye wuvumba, hamba wavitogoze vihwani. Heya! Wene wendile zinzila zono ziwuhodangaga wuhembi.

Isaya 66:3 ပူးပေါင်းရင်းမြစ်များ

Zimbazi 15:8

Nayo Muwaha Mulungu, kendezwaga no wulombe we wanhu we ling'ani. Ninga yagasulile makumbiko gono wamulavizyaga i wanhu wabi.

Zimbazi 21:27

Nayo Muwaha Mulungu, hamba si yendile i wanhu wabi, wamulavizye makumbiko, ko muno, gono gakulawa mu wuhile wawo wubi.

Isaya 44:19

Nayo yuyo mono kasesaga vivyo vihwani, yasina hamba lihweso lyo kutya, “Alu mwene mabici ganji ge libici lili, nha nigapembela. No moto wayo nhelecela ndigwa yangu, kanyhi nghasicila ne nyama yangu, niwa kuyilya. Hanyuma libici lyono lisigaye niwa kusesa cihwani. Naluno nicifugamiye cihwani ciseswe co mubici wu wulya!”

Isaya 53:6

Ase wose cinha zingholo zono zajiliye, munhu yakubita na nzila yakwe mweneco. Ninga Muwaha Mulungu yakamulipiciza so sese, u wulipicizwe wono wali wucinojeye sese co weneco.

Isaya 57:17

Nali niwakoleywe likuwo, ku soko yo wubi wawo hamonga ne masulumizi gawo, holeka nane nghawalipiciza no kuwaleka. Nawo ho wakacila kuwa wasina cihuliko hamba nhavi, wakajendelela du kwituma nha vyono wasakaga weneco.

Isaya 65:12

Nanye vyo mokongomela nhavivyo mu nzila yo kuwulagwa, vyono lono nali kumucemenyi, hamba si mwasaka kunyidika yaye, hamba kuhuliciza lono nghulonga. Hambi nha mweyihagulila nyo weneco muwe musina cihuliko kuli'ne no kwituma zimbi.

Isaya 65:2

Nane nha niwikanize du nhondo zose ho niwabocele wanhu wangu wono wasina cihuliko, kanyhi wendile kwituma zimbi nha vyono wendile weneco, no kubita kono wendile.

Isaya 66:17

U Muwaha Mulungu yakutya nhavi, “Alu ndumilizo yawo yeza yili behi, kuli wose wono wakwiyavufya weneco so wuhembi we wanhu wono si wamumanyile Mulungu, wono wabitaga mu zibusitani zisiwanulwe, wawo wono walizaga nyama ye magubi na ye magule, hamonga ne zindigwa zinji zinji ze liwifyo.

Yelemiya 6:20

Alu nane nowa nina cambuzici, hono niwubocele wuvumba wono wakundetela ku wulawa Sheba, hamba no wudi wa mhunjile swanu wono wukulawa ku zi'si zo kutali? Nane hamba si novibocelela lukulu i vilavywa vyawo, hamba si nokwendezwa yaye ne makumbiko gawo.

Walawi 2:2

ho yawe kuwuleta kuli wana wa Haluni i wakohani. Nayo Mukohani mono yakulongoza wuhembi, yasole yiganza limonga lyo wusaje wuwo, hamonga ne mafuta, no wuvumba wose, yavikongoje vyose mu cikumbicilo, ho ciwe citanjilo cono cikulajila nha vyono vyose vilavywa kuli Muwaha Mulungu. Ne cilavywa ci cino ce ndigwa, co cikwendeza kuli Muwaha Mulungu.

Hagayi 2:14

Hobaho Hagayi yakawatya, “U Muwaha Mulungu yakutya, azi vyo zinha kuli wanhu we likungugo lili, na kuli vilimwa vyose vyono wakuvilima, na kuli vinhu vyose vyono wakundavizya mu cikumbicilo, vyose vyakondya kwavufywa.”

Wukumbucize wo Wulajilize 14:8

Nayo ngubi hamba yiwe yikwasanuce mabangho gayo, ninga si yisindulaga yaye, holeka nyama yayo mulece kuyilya, hambi nayo, nha nyavufywe ku soko yiyo, hamba no mudunhu wayo mulece kuwupamiza.

Wukumbucize wo Wulajilize 23:18

Kanyhi ne zipesa zozose zono zikulawa mumo mu wumalaya, zilecele lukulu kulavywa mu Nyumba yo Muwaha Mulungu, u Mulungu wenyu, ziwe so wilahize wawo. Hambi Muwaha Mulungu, nha si kendezwaga no wumalaya.

Walamuzi 10:14

Langa mubite muyililile milungu yono mwayihagula, yiyo yo yomuponyenyi lone muli mu magazo.”

Walamuzi 21:25

Na mu vilo vivyo, mu Isilayeli, mwali mukali musina mutemi, holeka wanhu wetumaga du zono wehwesaga munhu na lwakwe.

Walamuzi 5:8

Lono Waisilayeli wehagulila milungu yinji mipya. Ale kukawa no wulugu mu yisi. Wule muli wanhu we cilume elufu makumi mane, ho yuli mono yebata ngula hamba mugoha?