Hoseya 4:12 - Luganuzi Luswanu Kuli Wanhu Wose 2002

¹² Wakulomba wugubulilwe ku wulawa mu cihwani ce libici! Ne nghome yawo yo wuganga, yo yikuwalonjela zono wakuhila wene kuzimanya! Mbeka, wakondya kundeka 'ne. Wakondya kwiyilavya kuli milungu yinji, kotya mucekulu malaya.

Hoseya 4:12 ပူးပေါင်းရင်းမြစ်များ

2 Watemi 17:7

Samaliya yikagwa, vyono Waisilayeli wetuma wubi hali Muwaha Mulungu, u Mulungu wawo, mono yawaponya kuli mutemi wa Misili Falawo, yakawa kuwawusa mu yisi ya Misili. Ninga wene 'lu, wakahemba milungu yinji yo wulambi,

2 Zinghomo 21:13

Ninga agwe, kutyatya musambo mubi we watemi wa Isilayeli, no kuwatonga wanhu wa Yuda na Yelusalemi, wawe si wehuwilwa kuli Mulungu, nha vyono Ahabu yanoza hamonga ne wahazi wakwe, wono wawatonga vibi Waisilayeli, wakawa si wehuwilwa. Kanyhi agwe kuwawulaga ne wanduguzo, nawo kumbe wo wali wanhu waswanu si nha gwegwe.

Zabuli 106:39

Holeka wakehodanga ku soko ye metumo gawo, wakawa wasina wihuwilwa kanyhi kuli Mulungu, wakawa nhe wasenyha.

Zabuli 73:27

Na muli wose mono kokwitemanula nagwe, ale, yuyo mbeka kofwa du. Nayo mono si yakukuvumila, yuyo nayo agwe komongomezeza lukulu.

Yelemiya 10:8

Wose nha walele du, kanyhi wasina mahala. Ale wene, wakwihwesa hamba wosuma kwiyijiza cicici, mumo mu vihwani lo vye mabici?

Yelemiya 2:27

Nanye wose molokozwa cevu, anye wose mono mutezaga u mubici awulya, yo sogo yenyu, ne libwe alilya, yo nyina yenyu. Na zizi zolomwijelelenyi vyono anye mwakondya kundeka 'ne, hamba si mukusaka no kumbuyila yaye. Ninga kolo mwenjila mu wugaye, hobaho mukuwa kunondola ho nize nimuponyenyi.

Yelemiya 23:13

Nane nakondya kuwuwona u wubi we wawizi wa ku Samaliya. Hambi nha wakulonjela mwi'tagwa lya Baali, nalu wakondya kuwasutizya i wanhu wangu.

Ezekiyeli 20:32

Hambi nha mwadumula nghani, nha vyono anye mukusaka muwe nhe we makungugo ganji, cinye wanhu wono wekalaga mu ma'si ganji, muwe kuhemba mibici ne mabwe. Ninga mumanye nha vyono zizo, hamba si zolokwijelela lukulu yaye.”

Ezekiyeli 21:21

Hambi u mutemi wa Babiloni, nha yemile ha nzila panda, ho yayimanye nzila yono koyityatya, yakuzisinjisa zisonga zakwe mwi'pongolo, yakutowa cisangu, yakuviwuza vihwani vyakwe ho vimulonjele, yakulilanga litoga lye nimu yono yilavigwe so likumbiko.

Hoseya 14:3

Hambi Ashuli nha sikociponya yaye, hamba fwalasi zo wulugu sizosuma kucitaza. Hamba sicolotya kanyhi kuli vihwani vyetu vye milungu, vyono vyene yo Mulungu wetu. Gwe Muwaha Mulungu, wulajile lusungu kuli wawo wono wasina ku wubito.”

Hoseya 5:4

Wubi wono wanhu wetumile, wukuwemila ho walece kumuwuyila Mulungu wawo. Hambi wukumbika vihwani, nha wuwebate muno muno, holeka si wamumanyile no Muwaha Mulungu yaye.

Hoseya 6:10

Kanyhi niyiwene nghani 'mbi yo wogofye muli Isilayeli, wanhu wangu wetajila mu wavu weneco, so wuhemba vihwani.

Hoseya 9:1

Nye nyo Waisilayeli, mulece kusangalalila zi sikukuu zenyu nhe makungugo ganji, mwapituka mwamuleka Mulungu wenyu, mweza si muli wehuwilwa kanyhi kuli Mwene. Hambi nha mweyiguza nyo weneco mu yisi yose kuli mulungu Baali kotya muli wasenyha, mukenda zo wuhemba wono mwehwesa vyono go malipo genyu!

Walawi 17:7

Holeka aluno wanhu Waisilayeli, walecele lukulu kuwa si wehuwilwa kanyhi kuli Muwaha Mulungu, walece kuziwulaga kanyhi mitugo zawo caka caka ako na ako mu mawimbi, nha vyono walavyaga kuli milungu ye mvulati yono wayihembaga. Holeka i wanhu wa Isilayeli, yiwanojeye walikamise lilajilizo lili sunga mu vilo vyono vikuza.

Walawi 20:5

nene no mweneco nomwizila munhu yuyo hamonga na we mhuga yakwe wose, sunga na wose wono wowa vihanjile nayo mu wu wula wihuwilwa kuli'ne, wono wakumuhemba Moleki. Ane nane si nowawaliliza kanyhi hamonga ne wanhu wangu.

Mika 2:11

“Wanhu awa, wakusaka muwizi mono yamemile wulambi no wukonji, mono yakutya ‘Nowila, divayi no wujimbi vilawile ko winji ku soko yenyu.’

Habakuki 2:19

Woyi hee kuli 'nye! Mono mulilonjelaga libici mukutya, “Usinhuce!” Hamba kwi'bwe lyono si likulonga mukutya, “Winuce!” Alo mukwihwesa vyono cihwani cosuma kumugubulilenyi nghani yo yose lo? Heya, cidahile kuwa cihiliwe ne fweza hamonga ne zahabu, ninga hamba nhavivyo vyo cisina wumi du.

Wuwale 15:39

Nago masune gago, gowa co cikumbucizo cenyu, nanye kolo mukugawona, mogakumbucila malajilizo gangu gose, nanye kolo mwakumbucila, si mosuma kanyhi kundeka, no kutyatya zi nzila zenyu nyo weneco, hamonga ne masulumizi genyu.

Wukumbucize wo Wulajilize 31:16

Muwaha Mulungu yakamulonjela Musa yakatya, “Alu agwe Musa, weza wuli behi no kufwa, na lono kowa wakondya kufwa, hodu wanhu hamba si wowa wehuwilwa kanyhi kuli'ne, kanyhi wocibena ne cilagane cangu cono nalagana nawo. Wondeka, wawe kuhemba milungu yo wulambi yono yili mu yisi yono wene wokwinjila.

Walamuzi 18:5

Nawo wakamulonjela wakamutya, “Cikukunena wuciwuzize ta ko Mulungu, ho cimanye vyono umuhinzo wetu kono cikubita wowa wina wumoteswe.”