Hoseya 10:2 - Luganuzi Luswanu Kuli Wanhu Wose 2002

² Ne wanhu wono nhumbula zawo nghoci, alu wogaya so wubi wawo. Mulungu kovibenanga vikumbicilo vyawo, no kugahodanga ne masumbili gawo.

Hoseya 10:2 ပူးပေါင်းရင်းမြစ်များ

1 Watemi 18:21

Nayo Eliya yakawabitila wanhu yakawatya, “Alu mwene, mojendelela kukangamyanga mu mahweso mejete sunga nili? Hono Muwaha Mulungu yo Mulungu, ale muhembenyi yuyo du, na hono mukuwona vyono Baali nayo Mulungu, ale muhembenyi yuyo!” Ninga wanhu wose wakanyamala twii.

Wutuluce 23:24

Ninga mulecele lukulu kuyinamila hamba kuyihemba milungu yawo yo wulambi, hamba kuyitumamila kose, hamba kwiga mu zinghani zawo. Langa muyongomezaje milungu yawo yiyo, kanyhi mugabenanje hamonga ne masumbili gawo ge mabwe gono wagasiwanuye so wuhembi wawo.

Zimbazi 11:18

Ne wanhu wabi, si watugaga cambuzi co cose yaye. Ninga hono witume ze ling'ani, nagwe kohumbilizwa.

Isaya 44:18

Na mbeka wanhu we liwala lilyo, wapuwile, hamba si wakuzimanya bwete na zono wakwituma yaye. Hambi meso gawo hamonga ne mahala gawo, nha wafufunize, ho walece kuyimanya i mbeka.

Yelemiya 43:13

Kanyhi kologatulanga sunga ne mabwe ge cikumbucizo, gono gali kuko ku Heliyopoli mu yisi ya Misili, yazipembele moto ne zinyumba ze milungu ye Wamisili.”

Ezekiyeli 14:5

Ninga vihwani vivyo, hamba viwe vyakondya kuwanoza Waisilayeli ho wandece 'ne, ninga nitumbiye nha vyono lipitulo lyangu lyowanoza Waisilayeli wawe ne cogopo kanyhi kuli'ne.

Hoseya 12:11

Ninga hamba nhavivyo, ku Gileyadi, vyo wakali du wakuhemba vihwani, ninga wono wakuvihemba, wolofwa. Ne zindama zono wakuzilavya makumbiko mu Giligali, hamonga ne makumbicilo gawo, golowa masumbili ge mabwe mwi'hala.”

Hoseya 13:16

Nayo Samaliya yinojeye yilipicizwe, ku soko yo kundeka 'ne. Ne wanhu wakwe wolofwa ku wulugu, ne wana wawo wagalika, wolowa kubamilizwa hasi, ne wacekulu wono wena mida, awo nawo wolotumbulwa.”

Hoseya 3:4

Hambi Waisilayeli, nha wokwikala vilo vinji wasina mutemi hamba walongola, wowula hamba vilavywa, hamba masumbili ge mabwe maswanu, wowula vihwani, hamba hwani bwete yo kutowela cisangu.

Hoseya 7:8

Muwaha Mulungu yakutya, “Waisilayeli weza kotya mukate wono si mupitulwe. Wene wetumbiye makungugo gono gawapilime.

Walawi 26:30

Nane nohahodanga sunga ne hanhu henyu ho kuhembela mucanyha ye matunda, nogatulanjiza ne makumbicilo genyu go kufusiza wuvumba, noyigumila ne mivimba yenyu, mucanyha ye vihwani vyenyu vye milungu, vyono vigwiye hasi, no mutima wangu womusulenyi.

Mika 5:13

Nolovihodanga ne vihwani vyenyu, hamonga ne masumbili genyu ge mabwe gono mugasiwanuye, nanye si molovihembela lukulu kanyhi, i vinhu vyono mwinozeze nyenye nyo mweneco.

Zefaniya 1:5

Kanyhi nomuwusiza lukulu munhu wo wose, mono kabitaga mwi'tembe mucanyha, kawa kuvihemba lizuwa no mwezi sunga ne zinyelezi. Kanyhi nowawusiza lukulu wose wono wahembaga nene, no kwilahiza vyono wena cihuliko kuli'ne, na kuno kanyhi, ho wakwilahiza kuli mulungu Moleki.

Zakaliya 13:2

Kanyhi mu vilo vivyo, nolowusa ne matagwa ge milungu ye vihwani yono yili mu yisi, na holowa hasina yunji wo wose mono kolosuma kujikumbucila kanyhi. Nolowawinga wose wono wakwinoza wawizi wo wulambi, no kuwawusiza wuhile wuwo i wahemba vihwani.

Matayo 6:24

“Hasina mwitumami mono kosuma kuwetumamila watwa wejete. Ku soko nha komusula yumonga, no kumwenda yulya we kejete, hamba lunji komutyatya yumonga du, no kumubedegala ayulya muyagwe. Holeka si mosuma kumwitumamila u Mulungu hamonga ne zisawo.”

Luka 16:13

“Hasina mwitumami mono kosuma kuwetumamila watwa wejete, ku soko, lunji komusula yumonga na kumwenda muyagwe, hamba komuhulika yuyo yumonga no kumubedegala u muyagwe. Holeka si mosuma kumwitumila u Mulungu ne sawo.”

Yakobo 1:8

nha kekalaga yakukangamyanga mu mikalile yakwe yose, holeka yalece kutya kopegwa co cose kulawa kuli Muwaha.

Yakobo 4:4

Anye muli wanhu mono si muli wehuwilwa, mwihwanile wasenyha. Simumanyile vyono munhu hono yawe kuyenda yinze, yawa mulugu wo Mulungu? Wo wose mono yakusaka yawe kuyenda yinze, yakwinoza yawe mulugu wo Mulungu.

1 Yohana 2:15

Mulece kuzenda ze yinze, hamba zono zili mononze. U munhu mono yazendile za mononze, u wendo wo Mulungu siwosuma kwikala muli mwene.

1 Samwili 5:4

Ninga mwi'zuwa lye kejete wali weza kusinhuka hakali mitondo muno muno, walanje, wakawa kuwona u mulungu wawo Dagoni yagwiye kanyhi wugubama, hamwande ye Lisanduku lye Cilagane co Muwaha Mulungu. Ninga muhinzo wuwu, Dagoni yakawa yabeneka mutwe wakwe, hamonga ne maganza gose vyono mejete, vigwiye vyose ha mulango, na Dagoni yasigala ne ciwili-wili cili wene.