Wukumbucize wo Wulajilize 8:2 - Luganuzi Luswanu Kuli Wanhu Wose 2002

² Kanyhi mukumbucile vyono Muwaha Mulungu, u Mulungu wenyu, yamutonjenyi mu muhinzo mutali, wa mu nyika mu myaka yiyi makumi mane yono yipulute, yakamukozenyi mu makamu menji, ho yamujelenyi, ho yamanye zono zili mu zinhumbula zenyu, na hono mbeka mwendile kugebata malajilizo gakwe, hamba ng'o.

Wukumbucize wo Wulajilize 8:2 ပူးပေါင်းရင်းမြစ်များ

Mwamulizo 22:1

Zali zeza kukondya zizo, hanyuma u Mulungu yakamujela Abulahamu, yakamucema yakutya, “Gwe Abulahamu!” Nayo yakedika yakatya, “Ane, baha Muwaha.”

2 Zinghomo 32:31

Ninga lono watemi wa Babiloni, watumila wanhu waze kuli Hezekiya, wamuwuze ze vitanjilo vyo wizine, vyono vyejela mu'si, baho langa Mulungu yakamuleka Hezekiya yetume nha vyono kowona mweneco, ho yamumanye zono zili mu nhumbula yakwe.

2 Zinghomo 33:12

Na mumo mu wudumyanzwe wakwe, yakenjilwa no winenenyhezi wuwaha muno, yakamuwuyila Muwaha Mulungu, u Mulungu wakwe, yakamulomba Mulungu yamutaze.

2 Zinghomo 33:19

Na vyono mutemi yalomba, na vyono Mulungu yakamupitula, hamonga du no wubi wono Manase yetuma, lono yali yakali si nanena, hamonga ne zimbi zose zono yetuma, ze hanhu ho wuhembelo we wanhu wono si wamumanyile Mulungu, ne vihwani vyo mulungu we cicekulu Ashela, vyono yasesa, hamonga ne vihwani viseswe, vyono yavihemba, lanje, zose zizo zandicigwe mu citabu ce zinghomo ze wawizi.

Nehemiya 9:19

Ninga 'gwe siwasuma kuwaleka mu nyika yi yilya ku soko yo lusungu lwako luwaha, siwawawusiza lisumbili lye livunde lyono lyawalajilaga nzila ku misi. Hamba lisumbili lyo moto lyono lyawamulicilaga nzila ku cilo.

Jobu 33:17

Mulungu kalongaga nawo, ho yawawusize wanhu wuhile wawo wubi, no kuwawusa mu wusisi wawo.

Zabuli 103:2

Gwe go nhumbula yangu, wumukumye Muwaha Mulungu! Wulece kuwusemwela lukulu wuswanu wakwe.

Zabuli 106:7

Walezi wetu lono wali wali ku Misili, hamba si wazicelelela ze mapoto go Mulungu, hamba kukumbucila zo lwinji lo lusungu lwakwe, lono yawalajilaga, wakamubeza Mulungu ha nhumbi ye lilenga lya Shamu.

Zabuli 136:16

Yawatonga wanhu wakwe mu nyika, hambi lusungu lwakwe, nha lwikalaga cibitilila.

Zabuli 77:11

Ninga 'gwe go Muwaha Mulungu, nozikumbucila ze metumo gako, nozihwesa zinghani zako ze katali zo wizine.

Zabuli 81:7

Na lono wanyhemeleza, lono wali wuli mu wugaye, ane nakuponya. Nane nghakupitula lono nali nihundice mwididimo. Nghakujela ha malenga ga Meliba.”

Wutuluce 15:25

Nayo Musa yakamulomba ko winenenyhezi Muwaha Mulungu, nayo Muwaha Mulungu yakamulajila Musa cibici. Musa yakacigwiliza mu malenga, nago malenga gakawa maswanu ku wung'we. Nayo Muwaha Mulungu kuko yakawapela Waisilayeli lilajilizo hamonga no wulajilize, yakawajela ho yamanye wusikame wawo.

Wutuluce 16:35

Waisilayeli wayilya yiyo mana mu myaka makumi mane, sunga wakafika mu yisi ya Kanani.

Wutuluce 16:4

Muwaha Mulungu yakamulonjela Musa yakatya, “Alu, ane nomulagazizenyi mikate kulawa ku wulanga. Nawo wanhu wolawila no kutondola nhondo zose ndigwa yono yikwiliye lizuwa lilyo limonga du. Na mu nzila yiyi, nane ho nosuma kuwona hono wowutyatya wulajilize wangu.

Wutuluce 20:20

Nayo Musa yakawatya, “Ale mulece kogopa, hambi Muwaha Mulungu nha kamuzizenyi ho yamujelenyi, ho yamunozenyi muwe ne cogopo kuli mwene nhondo zose, ho mulece kwituma zo wubi.”

Zimbazi 17:3

Zahabu na fweza, vikuwa kujelwa no moto. Nayo nhumbula yo munhu yijelwaga no Muwaha Mulungu.

Isaya 2:17

No wiwoni wo munhu, baho langa ho wulamalicila, no widunhumuzi nawo, baho ho wolokogomezezwa lukulu.

Yelemiya 2:6

Hamba si wenda no kunyhelelela yaye, hamba yiwe yo nene mono nawaponya ku wulawa ku yisi ya Misili nghawatonga mu mbago, mu yisi ye nyika ne manhimbwisa, mu yisi nghavu, yono yina mbali mbaha. Yisi yono si yikalagwa na munhu wo wose hamba hasina munhu wo wose mono kolo kola mu yisi yiyo.

Ezekiyeli 20:19

Ane yo nene Muwaha Mulungu, u Mulungu wenyu. Holeka muwibataje wulajilize wangu, hamonga ne malajilizo gangu.

Amosi 2:10

Nane nghamuwusenyi mu yisi ye Misili, nghamutonjenyi mu nyika myaka makumi mane, kanyhi nghawa kumupelenyi ne yisi ya Waamoli yiwe yisi yenyu.

Wuwale 14:33

Ne wana wenyu nawo, woyegayega mumuno mono nyika yiyi myaka makumi mane, hamonga ne magayo, ku soko yo wula wihuwilwa wenyu, sunga kolo yafwiza u muyenyu we ndumilizo.

Luka 18:14

Nghumutyenyi, yuyo mutoweza kodi, yawuya kwakwe kuno yakondizye kwilamula no Mulungu. Ninga ayulya u Mufalisayo, si nhavivyo. Hambi muli wose mono yakwikumya mweneco, nha konyetywa na mono yakwinyetya yo kokumywa.

Yohana 2:25

Holeka kwali kusina soko ya yunji yamulonjele zono zili muli wene, hambi nha yali yazimanyile mweneco zose zono zili mu zinhumbula zawo.

Wukumbucize wo Wulajilize 1:3

Na mwi'zuwa lilongozi lya mu mwezi we likumi na monga, lya mu mwaka we makumi mane, lono wali wawuka ku Misili, Musa yawaloloseza wanhu, zose zono Muwaha Mulungu yamulajiliza yawalonjele.

Wukumbucize wo Wulajilize 1:33

Hamba yawe yo mweneco, mono yamulongolelenyi ku mwande mu nzila, sunga no kumulajililenyi i hanhu, hono mwali munojeye musite nghambi yenyu. Yakamulajilenyi nzila, mu nzila ye lisumbili lyo moto, lyono lyali lilongoye ku mwande yenyu ku cilo na kanyhi mu nzila ye lisumbili lye livunde ku misi.”

Wukumbucize wo Wulajilize 13:3

Anye mulecele lukulu kuzihulicila zinghani zakwe munhu yuyo. Hambi Muwaha Mulungu wenyu, nha yakumujelenyi, ho yamanye hono mbeka mumwendile mwene kwe zi nhumbula zenyu zose, na kwe mitima yenyu yose.

Wukumbucize wo Wulajilize 2:7

“Ninga mukumbucile vyono Muwaha Mulungu u Mulungu wenyu yamulugutizenyi mu milimo yenyu yose, yono mwakondya kwituma. Kanyhi na vyono yamukamisenyi lono mwapilimagapilimaga mu nyika yiyi. Na vyono yali yali hamonga nanye mu myaka yiyi makumi mane, kanyhi yakamupelenyi na vyose vyono mwasakaga.

Wukumbucize wo Wulajilize 29:5

Nayo Muwaha Mulungu, yakamutonjenyi mu nyika myaka makumi mane, ninga, i myenda yenyu hamba malatu genyu, si vyasakala yaye.

Wukumbucize wo Wulajilize 32:7

“Alu ta mwihwesaje zono zapuluta, ze vilo vye katali, muwawuzaje ta walezi wenyu, wamulonjelenyi zono zejela mu vilo vyawo, muwawuzaje ta ne wakombi, wamulonjelenyi ze katali.

Wukumbucize wo Wulajilize 7:18

Mulece kuwogopela lukulu, ninga mukumbucile zono yetuma Muwaha Mulungu, u Mulungu wenyu, kuli Falawo mutemi wa Misili, sunga na kuli wanhu wakwe wose.

Wukumbucize wo Wulajilize 8:16

Na mumo mu nyika, yakamupelenyi ndigwa yono yikucemwa Mana, ho mulye, i ndigwa yono ku wulawa katali, walezi wenyu si wali wayimanyile hamba kuyilya. Yakamukozenyi mu makamu menji, ho yamujelenyi, hanyuma ho yamulugutizenyi kwe vinhu viswanu.

Yakobo 1:3

hambi nha mumanyile vyono, kolo wihuwilo wenyu wukusuma kulewana ne majelo, womupelenyi ngola.

Yakobo 4:10

Mwinenenyheze hali Mulungu, nayo komwinulenyi.

Yakobo 4:6

Ninga, lihewa lyono cikupegwa no Mulungu lili vilungo muno muno, nha vyono gatezaga i Mandiko, “Mulungu kawemilaga iwedunhumuzi, langa kawapelaga lihewa iwenenenyhezi.”

1 Petelo 1:7

Ne nhunizo yayo, anye ho musume kukangazwa mu wihuwilo wenyu. Hambe zizahabu zeneco, zono zihodanjikaga, zijelwaga no moto, nhavivyo sunga no wihuwilo wenyu, wono yo sawo kuciza zizahabu, siwoleka kujelwa ho wuwe wuli vilungo. Hanyuma ho mubocele lilumbo no lukumyo no wutogoze, lizuwa lilyo kolo Yesu Kilisito yakugubulwa.

Wugubule 2:23

Kanyhi nowawulaga i watyatyi wakwe, i makanisa gose ho gamanye vyono, yo nene du mono nizimanyile zinhumbula ne mahweso ge wanhu. Nane nomulipa munhu wo wose muli nyenye nha vyono genha i metumo gakwe.’

Walamuzi 2:22

Nozitumamila zinghungugo zizo, ho mbone hono Waisilayeli mbeka wozityatya zinzila zangu, nha vyono i walezi wawo watendaga hamba ng'o.”

Walamuzi 3:4

U Muwaha Mulungu yasaka yawetumamile wawo wawajele Waisilayeli ho yamanye, hono mbeka Waisilayeli wakutyatya wulajilize wakwe, nha vyono yawapela walezi wawo mu nzila ya Musa hamba ng'o.