Wukumbucize wo Wulajilize 7:8 - Luganuzi Luswanu Kuli Wanhu Wose 2002

⁸ Ninga Muwaha Mulungu yakamwendenyi du, kanyhi yakasaka yafisilize wihuwizo wakwe, wono yawehuwiza i walezi wenyu. Na yiyi yo yaleka yakamuwusenyi ku yisi ya Misili, kwe vilungo vyakwe viwaha, yakamunozenyi muwe welecele, mu wulawa mu wuwanda wa ku Misili, wa kuli mutemi Falawo.

Wukumbucize wo Wulajilize 7:8 ပူးပေါင်းရင်းမြစ်များ

Wutuluce 20:2

“Ane yo nene Muwaha Mulungu, u Mulungu wako, mono nakuwusa mu yisi ya Misili, kono wali wuli mu wuwanda.

Yelemiya 31:3

ane nghelajila kuli wene ku wulawilila cidaha. Nye nyo wanhu wa Isilayeli, ane nha nimwendilenyi du nhondo zose. Na ku soko yiyo, holeka njendeleye du kumulajilenyi zo lusungu lwangu kuli'nye.

Wutuluce 32:13

Gwe Muwaha Mulungu, wukumbucile za Abulahamu na Isaka na Yakobo i wetumami wako, wono gwegwe go mweneco wawelahiza wukutya, ‘Nokwinjifya zindelo zenyu nhe zinyelezi za ku wulanga cibitilila.’ ”

Isaya 43:4

Ne makungugo gose, nogaleka, ho mhonye wumi wenyu, hambi anye nyo Isilayeli, nha muli wo wuguzi wukamu kuli'ne, nane nghamwendenyi no kumupelenyi lilumbo.

Wukumbucize wo Wulajilize 10:15

Hambi u wendo wakwe kuli walezi wenyu, nha wali wuwaha, holeka yakamuhagulenyi anye si nhe wanhu wanji, sunga nalu, mukali muli wanhu wakwe wahagulwa.

Wutuluce 13:14

Na mu vilo vyono vikuza, hono mwanago yakuwuze yawe kutya alu citanjilo cici cina nhunizoci, nagwe komupitula wuwe kutya, “Muwaha Mulungu yaciwusa ase mu yisi ya Misili kwe vilungo vyakwe viwaha, i hanhu hono ase cali cili wawanda.

Wutuluce 13:3

Nayo Musa yakawalonjela wanhu yakatya, “Ale, mulikumbucilaje lizuwa lili, lizuwa lyono mwawucila ku Misili, mu yisi yono mwali wawanda. Ali lyo lizuwa lyono Muwaha Mulungu yamuwusenyi kwe vilungo vyakwe viwaha. Holeka mulece kulya mukate wono wina cisase.

Luka 1:55

Vyono yawalonjela walezi wetu, Kuli Abulahamu no lulelo lwakwe sunga ku cibitilila.”

Matayo 11:26

Heya, Baba, vyo wali wendile go mweneco.

Zefaniya 3:17

Muwaha Mulungu wako, yali hamonga nagwe, ne vilungo vyakwe, vyokupela wusume. Muwaha Mulungu, kotuga wendezwe kuli'gwe, na mu wendo wakwe, kokupela wumi. Kokwimbila no kukusangalalila

Zabuli 105:42

Mulungu yakakumbucila, cilagane cakwe cono celile, cono yalagana no mwitumami wakwe Abulahamu.

Zabuli 44:3

Ne wanhu wako hamba si wayisola yisi yiyo, mu nzila yo mumaje, hamba si wasuma kuyitema mu nzila ye vilungo, vyawo weneco, langa wayitema ku so wusume wako ne vilungo vyako, vyono 'gwe wali wuli hamonga nawo, hambi nha wali wuwendile.

2 Samwili 22:20

Yakamhonya ku wulawa mu mbali, yamhonya vyono yali yendezwe nane.

1 Samwili 12:22

Ninga Muwaha Mulungu, yanoza cilagane nanye, holeka sikosuma kumulecenyi yaye. Hambi nha yelahiza vyono komunozenyi anye, muwe muli wanhu wakwe.

Wukumbucize wo Wulajilize 4:37

Nayo vyono yali yawendile i walezi wenyu, holeka yakamuhagulenyi nanye, na kwe vilungo vyakwe viwaha, yakamuwusenyi mu wulawa mu yisi ya Misili.

Wukumbucize wo Wulajilize 4:34

Hamba ho yuli mulungu yunji wo wose, mono yejelela yabite yakawawuse wanhu ku wulawa mwikungugo linji, kanyhi yawanoze wawe wanhu wakwe, nha vyono Muwaha Mulungu, u Mulungu wenyu yamunozezenyi nyenye ku yisi ya Misili? Hambi Muwaha Mulungu nha yazinozeza zose ha meso genyu, yetumamila vilungo vyakwe viwaha hamonga no wusume. Yaleta magazo, no wulugu, yakanoza vitanjilo, ne mezino, yakaleta nghani zo wogofye wuwaha muno muno.

Wukumbucize wo Wulajilize 4:20

Ninga anye muli wanhu mono mwawuswa ku Misili, mwi kongojelo lyono likwaka moto mukali. Yakamuletenyi, ho yamunozenyi muwe wanhu wakwe, nha vyono mwinha izuwali.

1 Yohana 4:19

Ase cina wendo, vyono Mulungu yamula kucenda.

Walumi 11:28

Ninga i Wayahudi, vyono wakululema u Luganuzi Luswanu lo Mulungu, waweza vili sili no Mulungu, ninga so cambuzi cenyu anye mo wanhu mono si muli Wayahudi. Ninga vyono wahagulwa no Mulungu, holeka wakali vyo wendece wo Mulungu ku soko ye walezi wawo.

Mwamulizo 19:16

Ninga mwene Loti yakawa yakwipilimiza pilimiza du. Ninga vyono u Mulungu yamuwonela muno lusungu Loti, wamalayika wawalya wakamwibata muwoko, mwene no mugolece wakwe hamonga ne wanagwe wawalya i wejete we cicekulu, no kuwategula ko kunze ye likaya lya Sodoma.

Mwamulizo 19:29

U Muwaha Mulungu lono yagongomezeza i makaya ga Sodoma na Gomola, gono gali gali mwi'lolo kono yekalaga Loti, Mulungu yamukumbucila Abulahamu ko kumulavyaniza Loti ku wulawa mu makaya gago, Loti ho yalece kongomezwa hamonga ne makaya gago.

Wutuluce 6:6

Ale, wuwalonjele Waisilayeli vyono ane nghuwatya nhavi, ‘Ane yo nene Muwaha Mulungu, nane nomuponyenyi, kanyhi nomuwicenyi welecele, mu wulawa mu wuwanda we Wamisili. Nowinula muwoko wangu we vilungo, niwaletele wulipicizwe wo kogofya, nane nomuponyenyi.

2 Zinghomo 9:8

Ale, Muwaha Mulungu, u Mulungu wako yalumbwe! Mono yakulajila vyono yendezwa nagwe, holeka yakawa kukunoza wuwe mutemi, wuteme mwi'tagwa lyakwe. Hambi nha yawendile wanhu wakwe Waisilayeli, nayo yakusaka yawakamise cibitilila. Nayo yakakunoza wuwe mutemi we Waisilayeli, ho wunoze ling'ani no wiling'ano.”

Isaya 63:9

ku wulawa mu magayo gawo. Hamba si yali malayika yaye mono yawaponya, langa Muwaha Mulungu mweneco du yo yawaponya. Yawaponya ku soko yo wendo wakwe no lusungu lwakwe. Hambi nha yawadima sunga na mu vilo vyono vyapuluta,

Ezekiyeli 36:22

“Holeka alu, wuwalonjele wawo Waisilayeli, zono ane no Muwaha Mulungu nghuwalonjela nghutya nhavi, Alu zono nozituma, si nozituma ku soko yenyu anye nyo Waisilayeli, aa ng'o! Langa nozituma ku soko ye litagwa lyangu lyono lyelile, lyono anye mwakondya kulikoza cevu hanhu hose hono mukubita.

Mika 6:4

Ane nghamusolenyi no kumuwusenyi ku wulawa ku yisi ya Misili, no kumuponyenyi ku wulawa mu wuwanda. Nghawatuma Musa, na Haluni, na Milyamu, ho wamutonjenyi ku wulawa kuko.

Mika 7:20

Agwe kolajila wihuwilwa wako no lusungu lwako kuli wanhu wako, mu lulelo lwa Abulahamu na Yakobo, nha vyono wawehuwiziza i walezi wetu ku wulawa mu vilo vye katali.

Malaki 1:2

Muwaha Mulungu yakuwalonjela wanhu wakwe yakutya, “Ane nimwendilenyi nhondo zose.” Ninga wene wakutya, “Wukuwulajila wule wendo wako kuli'se?” Nayo Muwaha Mulungu yakupitula yakutya, “Alu wule! Esawu si yali nduguye wa Yakobo? Ninga nghamwenda Yakobo no lulelo lwakwe,

Wukumbucize wo Wulajilize 1:8

Na mumo mose, yo yisi yono nehuwiza ane no Muwaha Mulungu, vyono nowapela walezi wenyu, Abulahamu na Isaka, na Yakobo, sunga ne zindelo zawo. Holeka mubite mukayihale yiwe yenyu.’ ”

Wukumbucize wo Wulajilize 5:6

‘Ane yo nene Muwaha Mulungu, u Mulungu wako, mono nakuwusa mu yisi ya Misili, kono wali wuli mu wuwanda.

Wukumbucize wo Wulajilize 23:6

Holeka nanye mulecele lukulu kuwapela wutazi wowose, hamba kuwanozeza ziswanu mu vilo vyenyu vyose vyo wikale wenyu.

Wukumbucize wo Wulajilize 33:3

Na mbeka Muwaha Mulungu yawendile wanhu wakwe, kanyhi mwene kawadimaga i wakwe. Holeka cinojele cimufugamile, cigebate na malajilizo gakwe.

1 Watemi 10:9

Yalumbwe Muwaha Mulungu, u Mulungu wako! Hambi nha yalajila nha vyono yendezwe nagwe, no kukunoza wuwe mutemi muli Isilayeli. Hambi wendo wakwe kuli Isilayeli, nha wa cibitilila, nayo yakakunoza wuwe mutemi wawo, ho wusume kunoza ling'ani ne mbeka.”

1 Zinghomo 16:16

I cilagane cono yacinoza na Abulahamu no wihuwizo wono yamwihuwiza Isaka.

Zabuli 44:4

Hambi nha yo gwegwe go Mutemi wangu, kanyhi go Mulungu wangu, mono kuwapelaga cisumisumi wanhu wako.