Wukumbucize wo Wulajilize 13:1 - Luganuzi Luswanu Kuli Wanhu Wose 2002

¹ “Na hono yejele muli nyenye muwizi, hamba mulolosa ndoto, mono kolajila citanjilo hamba mezino, yawe kutya,

Wukumbucize wo Wulajilize 13:1 ပူးပေါင်းရင်းမြစ်များ

1 Watemi 13:18

Nayo u muwizi mukombi munya Beteli yakamupitula yakatya, “Gwe muyangu, ane nane nha nili muwuzi cinya gwegwe, na ko wulajilize wo Muwaha Mulungu, malayika kanonjela nize nghusole cibitane ku kaya yangu, nghakupele ndigwa wulye.” Ninga hamba nhavivyo, yuyo muwizi mukombi yalambaga du, hamba si zali za mbeka yaye.

1 Watemi 13:19

Hobaho, u muwizi mono yakalawa ku Yuda, yakawa kubitana no muwizi mukombi ku kaya yakwe, wakalizana zindigwa.

Zimbazi 30:6

Wulece konjeleza zinghani zakwe, mwene kokuleka, no kukuwona vyono wuli mulambi.”

Isaya 9:15

I wakombi ne wanhu watambule, wawo wo mutwe. Nawo mucila, wo wawizi, wono wafundaga zo wulambi!

Yelemiya 23:11

U Muwaha Mulungu yakutya, “Hambi i wawizi hamonga ne wakohani, wose, nha weza si wakumucelelela Mulungu, hambi nha nakondya kuwawona wakwituma zimbi mu Nyumba yangu.

Yelemiya 23:32

Alu muhulicize ta, zono nghutya ane no Muwaha Mulungu! Ane mbeka, nili mulugu we wawizi wawo, wono wendile kulonga ze zindoto zawo, zono zimemile wulambi wose du. Hambi nha wakwitumamila zizo zindoto zawo, no kuwajiliza wanhu ku soko yo wulambi wawo, hamonga no widunhumuzi wawo. Ninga ane hamba si niwatumile yaye, hamba kuwalajiliza kose. Kanyhi wasina hamba nghani yo yose, yono yosuma kuwataza wanhu. Vyo nghutya ane no Muwaha Mulungu.”

Yelemiya 27:9

Holeka 'nye wayangu, mulecele lukulu kuwahuliciza wawo wawizi wenyu, hamba kuli munhu wo wose mono yakwiyitya nha vyono kosuma kuwila za ku mwande, mu nzila ye zindoto, hamba mu nzila yo wucemeleza myuhe ye wanhu wono wafwiye, hamba mu nzila yo wuhawi. Wawe kumulonjelenyi nha vyono mulece kwiyilavya kuli mutemi Nebukadineza u mutemi wa Babiloni.

Yelemiya 29:24

U Muwaha Mulungu we mihanga, u Mulungu wa Isilayeli, yakanonjela nghani,

Yelemiya 29:26

“U Muwaha Mulungu yakunoza agwe Zefaniya wuwe mukohani, wuhalile i hanhu ha Yehoyada. Sunga nalu yo gwegwe mulongola muwaha wa mu Nyumba yo Mulungu. Holeka yikunojeye wuwalanjilile i wanhu wo wose, u munhu mono kowa yena likwale, no kwinoza nha muwizi, munhu yuyo wumwibate, wumuwope ne manyolo.

Yelemiya 29:8

Ninga ane no Muwaha Mulungu, u Mulungu wa Isilayeli, nghumusugulenyi nha vyono, mwilanjililaje! Mulecele lukulu kukongwa ne wawizi wono mwikalane hamonga, hamba ne wanhu wanji wo wose, wono wakwiyitya nha vyono ati, wosuma kuwila za mu vilo vyono vikuza. Mulecele lukulu hamba kuzihulicila zindoto zawo.

Yelemiya 6:13

Hambi wanhu wose i wadodo sunga ne wawaha, nha wahidimbaliye mu wutujila sawo, mu zinzila zo wuhizi du. Sunga ne wawizi, hamonga ne wakohani, nawo wose wakwituma metumo go wukoci du kuli wanhu.

Ezekiyeli 13:23

Ninga luno mumanye, nha vyono wugubulilwe wenyu wo wulambi, hamonga no wuwizi wenyu wo wulambi, vyose vyaficila ndumo yayo. Nane nghuwaponya wanhu wangu mu wulawa mu vilungo vyenyu, ho musume kumanya nha vyono, ane yo nene Muwaha Mulungu.”

Zakaliya 10:2

Hambi i wanhu wono wawuzaga kuli milungu yinji ye vihwani, no kwitoweleza cisangu, ne lipitulo lyono wakuwa kutuga nha lya wulambi, kanyhi lya wulele du. Wanji wakuwa kuzilolosa zi ndoto no kuzinoza kotya nha cinhu ca mbeka, kumbe wakumukonjenyi bwete du. No wutuzwe wono wakuwa kumulonjelenyi wa bwete du. Holeka hobaho, i wanhu wakupilima-pilima du, kotya nhe zingholo zono zajiliye. Wali mu magayo, hambi nha wasina mudimi.

Zakaliya 13:4

Ne vilo vivyo kolo vikuza, holowa hasina muwizi wo wose mono kolokwidunhumulila zo wugubulilwe wakwe hamba kwituma zo wuwizi, hamba kuvwala i kanzo ye ciwizi-wizi, ho yawakonje wanhu.

Matayo 24:11

Kanyhi mu vilo vivyo, wololawila iwawizi wenji wo wulambi, nawo wolowa kuwajiliza wanhu wenji.

Matayo 24:24

Hambi nha wololawila walambi wenji, wono wokwicema weneco yo Kilisito, kanyhi ne wawizi wo wulambi. Nawo wawo wonoza mapoto mawaha, ne mezino gono gosuma kumwajilizenyi, na hono yisumice sunga ne wahagulwa wo Mulungu.

Matayo 7:15

“Mwilanjililaje kuli iwawizi wo wulambi. Wono wakumuzizenyi, akuno wakwijela kunze nha ngholo, ninga mugati yawo ho maminzi makali.

Maluko 13:22

Hambi nha wolokwijela wanhu wo wulambi lambi wono wokwiyitya weneco yo Kilisito, ne wawizi wo wulambi lambi, nawo wolonoza vitanjilo ne mezino, ho wajilize i wahagulwa wo Mulungu, hono yisumice.

Luka 6:26

Woyi he nye kolo wakumulumbizenyi wanhu wose, hambi walezi wawo nha vyo wawatendela i wawizi wo wulambi.”

Wukumbucize wo Wulajilize 18:20

Na hono yejele muwizi wo wose, mono kokwijelela yalitumamila litagwa lyangu, mu zinghani zono ane si nimutumile yazilonje, muwizi yuyo yimunojeye yafwe so nghani yiyo. Na yowa nhavivyo, sunga na kuli wawizi wanji wono wowa kulonjela mwi'tagwa lye milungu yinji.’

Wukumbucize wo Wulajilize 4:1

Hanyuma Musa yakawalonjela wanhu yakatya, “Mweze muli cihuliko kuli zo wulajilize wono nghumwijizenyi, nanye holeka mowumipa, sunga muyisole ne yisi yono Muwaha Mulungu, u Mulungu we walezi wenyu, yakumupelenyi.

Wukumbucize wo Wulajilize 4:2

Ninga mulece konjeleza hamba kucepula muli zose zono nghumulajilizenyi. Langa mweze ne cihuliko du kuli malajilizo go Muwaha Mulungu, u Mulungu wenyu, gono nakondya kumulonjelenyi.

2 Watesalonike 2:9

Nayo yuyo u Mubi, kolokuziza mu vilungo vya Setani, no kunoza vitanjilo vye mawala gose ne mezino go wulambi,

2 Petelo 2:1

Wakalawila wawizi wo wulambi muli wanhu, nhavivyo kanyhi, iwejizi wo wulambi wololawila sunga na muli nyenye. Ne wanhu we liwala lilyo, wololeta i mafundo go wiwajize no kumukana Muwaha mono yakawakomboza, na mu nzila, yiyo wokwiletela musunho u wongomezwe wawo weneco.

1 Yohana 4:1

Mo wendece wangu, mulece kumwihuwila munhu wo wose mono yakwiyitya yena Muhe wo Mulungu, langa mwamulaje mumulanjilile muno muno, ho muwone hono u munhu yuyo yakutongwa no Muhe wo Mulungu, hamba ng'o. Hambi i wawizi wenji wo wulambi nha wakwijela mononze.