Danyeli 4:14 - Luganuzi Luswanu Kuli Wanhu Wose 2002

¹⁴ Yakalonga kwe 'zi yiwaha yakutya, ‘Wudumulenyi mubici wuwu, mugapilulangaje ne manhambi gayo, muhepe ne mahamha gayo gose, muyiyagaze ne mikalo yayo; muviwinje ne vilimu viwuce mu mubeho wayo, hamonga ne zindeje zono zili mu manhambi gayo.

Danyeli 4:14 ပူးပေါင်းရင်းမြစ်များ

Jobu 24:20

Na mwi'daha lilyo, hamba nyina si komukumbucila yaye. Hambi nha kowa yaligwa ne mang'onyo, yakondya kuhodanjika nho mubici wono wugwiye.

Yelemiya 27:5

“Mumanye vyono yo nene mono nayiwumba yinze kwe vilungo vyangu, hamonga no munhu, ne vilimu vyose vyono vikaye mono'nze. Nane nimupelaga munhu wo wose nha vyono nyendile nene no mweneco.

Yelemiya 51:6

Mutize wulawa mu Babiloni! Munhu yeponye nhumbula yakwe! Mulece kutamisizwa lukulu so wubi wa Babiloni. Hambi nha go madaha gangu luno, go kwilipiciza cilipicizo cangu kuli wene, nha vyono yiwanojeye.

Yelemiya 51:9

Nawo iwajenzi wono wekalaga mumo mu Babiloni, wakutya nhavi. Nase cajela muno kuyitaza Babiloni, ninga cikawa cacela. Holeka luno, yicinojeye hodu ciyilece, ciwuce ciwuye ku zikwetu. Hambi u Mulungu nha yakondya kuyilipiciziza Babiloni mu vilungo vyakwe vyose, no kuyongomezeza lukulu.”

Ezekiyeli 31:10

“Alu ane no Muwaha Mulungu, nokulonjela zono zolowijelela u mubici wuwo wono wawiluka, wukafika ko ku mavunde. Vyono, mu nghango yono wacilaga kuwiluka, yo nghango kanyhi vyo wacilaga kwidunhumula so wutali wayo.

Danyeli 2:21

Umwene kakawanizaga vidaha ne mapango. Kawawikaga no kuwawusa watemi. Yo mwene mono kawapelaga wanhu wumanye no wizuce.

Danyeli 3:4

hobaho munya kulalika yakawalonjela wanhu kwe yizi 'waha yakatya, “Anye nyo wanhu we zinghungugo zose, na we zi ndelo zose, na we milonjele yose.

Danyeli 4:12

Ne mahamha gayo, gali maswanu muno muno, nago gali gavunice mikalo, yono yali yikwiliye ku wulya wanhu wose we yinze. Vilimu vyose vya mu mbago, vikaceha mu mubeho wayo. Ne zindeje zikazenga manhuli gazo mu manhambi gayo, kanyhi ne viwumbwa vyose, vyalizaga mikalo yayo.

Danyeli 4:23

Na lono agwe mutemi, wali wulanjiliye, Malayika yakatima kulawa ku wulanga, na hanyuma yakatya, ‘Dumulenyi mubici wugwe, hanyuma muwupilulaje. Langa mulece lisina mu muhangha. Muliwopeceze no munyolo we cuma, ne shaba yeze yipilime munyolo, mulilece kuko kwi'lolo lyono lina mahanze madece; Mumulekaje baho munhu yuyu, yatuje malenga ge buhe ya ku wulanga; Mumulece yekale hamonga ne malimu myaka mupunghati.’

Danyeli 4:29

Yaza kupuluta myezi yikumi na myejete, lono mwene yajendajendaga mwi'tembe mu kaya yakwe yo wutemi ha Babiloni.

Danyeli 5:20

Ninga 'lu, vyono yalajila wivuni no wukali, hamonga no wu wula cihuliko, hodu yakawa kuwuswa mu wutemi, no kuwajiliza mukumbo wakwe wo wutemi, yakalyajiliza ne lilumbo lyakwe.

Danyeli 5:21

Yakawinjilizwa, no kuwuswa mu wikalana ne wanhu, ne mahweso gakwe gakehwana na ge malimu. Yakawa kwikalana ne zinyhenje, yakalya mahanze nhe zing'ombe, yakawa yakugona cipwi mwi'wagalila lya mwi'lolo, yasina na co kumugubika muwili wakwe, ho yalece kudodowekwa ne buhe. Sunga nhondo, yakamanya vyono mbeka u Mulungu Mono Yalawiliciye, yo yatemile wutemi wose mu wanhu, kanyhi yadahile kumupela wutemi munhu wo wose mono mwene yakumuhagula.

Matayo 3:10

Hambi inhemo nha yikondizye kuwikanizwa so wutemanga imilela yo mubici, holeka u mubici wo wose wono si wulelaga mikalo miswanu, wodumulwa no kutagwa mu moto.

Matayo 7:19

No mubici wo wose wono si wukulela mikalo miswanu, wukutemangwa no kutajilwa mu moto.

Luka 3:9

Sunga nalu nhemo mbikwe ha masina ge mabici, no mubici wo wose wono siwukulela mikalo miswanu, wotemangwa no kutajilwa mu moto.

Wugubule 10:3

Nayo yakawa kucema kwe'zi 'waha muno muno, nha simba yikukoloma. Nayo yali yeza kuzoza muno, mabalalusi mupunghati nago gakabocelela ko mulizo muwaha muno muno.

Wugubule 18:2

Nayo yakalonga kwe'zi yiwaha, yakutya, “Ligwa Libabiloni liwaha, lingwa! Aluno weza wuli wikalo we masetani hamonga ne myuhe yiyi, kanyhi weza wuli wikalo we zindeje zinyavu, kanyhi ze cikomaza muno.