Danyeli 11:10 - Luganuzi Luswanu Kuli Wanhu Wose 2002

¹⁰ “Nawo i wana wo mutemi wa Siliya, wolokonghola yipuga yiwaha muno lye wasilikale, wewikanize so wulugu. Nayo yumonga wa muli wene, kolokwipongholeza nhe lihwazi, yakagakundujize magomawakali ge walugu.

Danyeli 11:10 ပူးပေါင်းရင်းမြစ်များ

Isaya 25:12

Mulungu kologongomeza magomawakali ga Mowabu, hamonga ne majinji gawo matali, yagagwise sunga ho hasi, gawe manghundi.

Yelemiya 51:42

Lilenga lifika mu Babiloni, nayo yifunikwa so winji we mawingo gayo.

Danyeli 11:22

No munhu wo wose mono kolojela kumwimila, hamba yawe mukohani Muwaha wo Mulungu, munhu yuyo kolofwagulwa no kuwusizwa lukulu.

Danyeli 11:26

Ne walonjelezi wakwe mweneco, wo wolomuwulaga. Na wenji wa muli wasilikale wakwe wolowulagwa, ne lipuga lyakwe lyose lye wasilikale, wolofwagulilwa lukulu.

Danyeli 11:7

Na hanyuma ya zizo, yumonga wa muli wanduguze, yo kolotema. Nayo hanyuma kololihoma lipuga lye wasilikale wo mutemi wa Siliya, yenjile mu magomawakali gawo no kuwasuma.

Danyeli 11:9

nayo mutemi wa Siliya koloyihoma Misili, ninga kolowingwa yawuye ku yisi yakwe kanyhi.

Danyeli 9:26

Na ku ndumilizo ye vilo vivyo, u mulongola muhagulwa wo Mulungu, kolowulagwa mbula soko. Nalyo likaya hamonga ne Nyumba yo Mulungu, vyolokongomezwa ne wasilikale wo mutemi we vilungo. Nayo ndumilizo yolokuza nhe lihwazi. Kanyhi wolokuza wulugu hamonga ne magazo, vyono Mulungu yakondya kuviwikaniza.