TITO 3:2 - Lengua Sur (Enxet) Nuevo Testamento

² Neygyána aksa exének ekmaso pók énxet, yána sat keytek meyke ektahakxa apheykha, tén han etnehek ektakmeleykha apwáxok, yána nahan etnahagkok megkaleymáxkoho apwáxók nepyeseksa apyókxoho énxet'ák.

TITO 3:2 ပူးပေါင်းရင်းမြစ်များ

SAN MATEO 11:29

Kólma nelxekmowásamáxche sekmésama nak kéxegke, kóltámesaxche nahan eñama nak ko'o, ko'o sektaha nak mapekhésamaxche tén han megkeymáxkoho ewáxok, sat kólwetak kéllókaso kélyampé kéxegke kéltaha enxoho xa.

LOS HECHOS 23:5

Aptahak axta Pablo s'e: —Elyáxeg, exchek ko'o ay'ásegkok aptaha apkemha apmonye appasmo apkelmaxnéseso Dios énxet'ák apagkok xa énxet nak; hakte temegkek eknaktáxésamaxche s'e: ‘Ná exén ekmaso m'a énxet apteme nak wese' nepyeseksa Dios énxet'ák apagkok.’

1 CORINTIOS 9:19

Mehetnesásak eykhe ko'o sekmomaxche xama énxet enxoho, ektemesásexkók ahagko' eyke ko'o máxa sekmomaxche nápakta'awo' apyókxoho énxet'ák, yakwayam enxoho axámásekxak énxet apteme mey'áseyam Cristo.

2 CORINTIOS 10:1

Ko'o Pablo, eltamhok ko'o kaxének kélwáxok kéxegke ektémakxa axta ménnaktésamakpoho Cristo, tén han ektémakxa axta segásekhayo. Kólxének cha'a kéxegke sektaha ko'o ekyelkamáxkoho ewáxok sekha enxoho kélnepyeseksa kéxegke keñe anhan kólxének cha'a keynnakmakha sekpeywa sekha enxoho makhawo.

2 CORINTIOS 12:20

Hakte eyekak ko'o alwetágwakxak megkóltaha kéxegke m'a sekmámenyého nak ótak kóltehek kéxegke, eyekak nahan ko'o xa helwetak kéxegke atnehek ko'o m'a megkólamenyého nak helwetak atnehek. Eyekak ko'o keytek kélnepyeseksa kéxegke kélenmexamaxche, kélnatha kélmók, kélló, kélmeyókasamáxkoho kélagko' kéllané aksok, kélxeyenma aksa kélmók, kélwanyeykha kélmók, eyeymáxkoho kélwáxok, tén han megkóltakmelchesamo kéltamheykha.

GÁLATAS 5:22

Akke ektaha nak aptekkeso Espíritu s'e: nelásekhamaxkoho, ekpayheykekxa egwáxok, meyke ektahakxa egwáxok, mampekhésamaxche, negapeykha egmók, ektakmeleykha egwáxok, mantemeseseykmohoxma egmók,

GÁLATAS 6:1

Elyáxeg, kélwet'ak agkok kéxegke apteyekmo xama énxet eñama apkelané mey'asáxma, kéméxchek kéxegke kólpasmok kóllánekxések xa énxet nak, kéxegke kéltaha nak appeykesáseyak Espíritu, wánxa agkok, kóltakmelchesho kéllánekxéso yetlo kélásekhayo, tásek nahan kóltakmelcheshok kéltémakxa, keykkónek nahan katnehek kéxegkáxa.

GÁLATAS 6:10

Ekeso eñamakxa eyéméxko nak cha'a negko'o ampasmok apyókxoho énxet, ekyagwánxa agkok ma'a ẽlyáxeg'a apteme nak melya'áseyam, cham'a ekyetnakxa enxoho cha'a yakwayam ampasmok.

EFESIOS 4:2

Kólteme megkeymáxkoho kélwáxok, kólteme nahan ektakmeleykha kélwáxok; kólteme megkólpekhésamaxche, kólteme nahan kélenmáxamáxkoho kélmók yetlo kélásekhayo.

EFESIOS 4:31

Kólwatés kélteme m'a ektémakxa nak eknatheyáseykha kélwáxok, tén han ma'a ektémakxa nak ekmanyehe kóllók, kólwatés kéllo, kólwatés nahan ma'a kélpaxameykha nak, tén han ma'a ekmaso nak kélpeywa kóllának kélmók, tén han ma'a ekyókxoho ektémakxa nak negmámenyého anlók.

FILIPENSES 4:5

Eltamhok ko'o kólyekpelchaxkohok kéxegke kéltaha ektakmeleykha kélwáxok. Chágketwokmek apweyktamxa Wese' egegkok.

1 TESALONICENSES 2:7

Egwanchek axta eykhe agyennaktésaxkohok negko'o agásenneykxa ma'a ektémakxa nak sẽlyaheykekxoho, nenteme nak Cristo seykha amya'a apagkok, wánxa agkok, negheyásexkók axta eyke sakcha'a kélnepyeseksa kéxegke, negheyásexkók axta nahan ma'a ektémakxal'a kelán'a éktegkeso étchek, cham'a kelán'a eltakmelchesol'a étchek,

1 TIMOTEO 3:11

Hawók nahan ma'a kelán'ák apnakteyegka'a nak énxet'ák appasmeykha nak kéltamheykha kélakneykekxexa, kéméxchek nahan katnehek ekha kéláyo, háwe m'a eltennágwayam naksa nátegma, kéméxchek nahan katnehek ma'a ekmowána nak elaneykegkoho ektémakxa, tén han ma'a megkayenseyam nak elané ekyókxoho ektamheykha ektakmela.

1 TIMOTEO 3:3

megkatakmelak etnehek ma'a anmenáto nak, megkatakmelak nahan etnehek ma'a megyéso nak elwok, akke tásek etnehek ma'a ektakmeleykha nak apwáxok, tén han etnehek meyke ektahakxa apwáxok, tén han ma'a megkaxéneykha nak apwáxok selyakye.

SANTIAGO 3:17

keñe m'a énxet'ák ekyetna nak negya'ásegwayam eñama nak Dios, eláxñeyo apkeltémakxa etnahagkok, meyke ektahakxa apwáxók nahan etnahagkok, eltakmela apwáxok nahan etnahagkok; apmopyósa elanok pók nahan etnahagkok, meyeykhakpek nahan elanok pók, melyexamakpoho apkeltémakxa nahan etnahagkok, aksok eltakmela nahan elanagkok.

SANTIAGO 4:11

Elyáxeg, nágkólxén ekmaso kélmók. Hakte negko'o ektahakxa enxoho nenxeyenma ekmaso egyáxeg, esenhan nentaha enxoho negyekpelchémo, sagkek katnehek nenxeyenma m'a eltémókxa nak antehek segánamakxa, antehek nahan nenyekpelchémo m'a segánamakxa. Aptemék agkok xép apyekpelchémo m'a eltémókxa nak antehek segánamakxa, aptemesásamákpoho apagko' etnehek xép apyekpelchémo m'a segánamakxa, yakwayam nak eykhe etnehek apkelyaheykekxoho exchep.

1 SAN PEDRO 2:1

Kólyenyaw kéxegke m'a ekyókxoho ektémakxa nak nentémakxa ekmaso, tén han ma'a ekyókxoho ektémakxa nak nelyexancháseykha egmók, kólyenyaw nahan ma'a nelmeyókasamáxkoho egagko' nak nentémakxa, tén han ma'a nelyásekkáseykha, tén han ma'a ekyókxoho ektémakxa nak nenxeyenma naksa egmók.

1 SAN PEDRO 3:10

Hakte: “Kéxegke ektahakxa enxoho kélmáheyo katakmelmakha kélwáxok neyseksók kélha, tén han kélmáheyo enxoho kalpayhekxak kélwáxok ekyókxoho ekhem, kóllanagkoho cha'a kélpeywa yakwayam enxoho megkasógwomek kélpeywa, yakwayam enxoho nahan megkóltehek kélmowána amya'a;

1 SAN PEDRO 3:8

Kólteme cha'a megkólexpanchásamáxche kéxegke, kólhésho cha'a mók kélwáxok, kólásekhaxkohok cha'a nentémol'a anlának egyáxeg nentémo xamo' nak magya'áseyam. Kólteme cha'a ektakmeleykha kélwáxok, tén han megkeymáxkoho kélwáxok.

1 SAN PEDRO 4:4

Apkenatchesek kaxwo' apwet'a kéltahakxa kéxegke xa énxet'ák nak, hakte massék kélwehenákxoho m'a ektémakxa nak apkelyeykhásamákpoho apkeltémakxa ekmaso, sagkók nahan cha'a apkelxeyenma kéxegke xa énxet'ák nak.

2 SAN PEDRO 2:10

Sat ekyagwánxa agkok apkellegasáseykegkoho Dios ma'a énxet'ák apkelenxáneykmo nak apkelané apkeltémakxa ekmanyása, cham'a aptaknagko nak han ektémakxa nak kélyaheykekxoho Wese' egegkok. Kalyéha'ak nahan apwáxók xa énxet'ák nak, melyexnegwomek nahan, megyekyek nahan ewanyohok ma'a ekha nak elmowancha'a eleymáxkoho nak;

SAN JUDAS 1:10

Asagko' cha'a katnehek apkelxeyenma aksok melya'áseyak xa énxet'ák nak, keñe m'a aksok apkelya'áseykegkoho apancha'awo' nak apmeyncha'a aptemesáseykxo yakwayam kasexnenak, cham'a ektémakxa nak han elya'áseykegkoho aksok nawha'ák neyseksa meyke kélxekmowáseyak.

SAN JUDAS 1:8

Temegkek eykhe ekxeyenma eknaktáxésamaxche xa, aptamheykegkek eyke nahan ekmanyása apkeltémakxa xa énxet'ák nak, eñama apkelyetleykekxa m'a apweté nak aksok ekxekmowásamáxkoho, aptaknagkamchek cha'a m'a apkeltémókxa nak antehek Wese' egegkok, elwanyaha nahan cha'a m'a Dios apkelásenneykha ekha nak apkeleymákpoho.