SAN JUAN 21:16 - Lengua Sur (Enxet) Nuevo Testamento

¹⁶ Aptahak axta makham Jesús apkelmaxneyeyncha'a Pedro s'e: —Simón, Juan apketche, ¿eyásekhayoya exchep? Aptahak axta apchátegmowágko Pedro s'e: —Wese', apya'ásegkok xép seyásekhayo. Aptahak axta makham Jesús apcháneya s'e: —Eltakmelches seknaktóso nekkések.

SAN JUAN 21:16 ပူးပေါင်းရင်းမြစ်များ

SAN MATEO 2:6

‘Xép tegma Belén yókxexma Judá, háwe exchep tegma apketchetse' nepyeseksa tegma apkelyawe nak keso yókxexma; hakte xép sat yenyék xama wese' yakwayam epékesesagkok apkelxega m'a énxet'ák ahagkok Israel.’

SAN MATEO 25:32

Yaknekxak sat apyókxoho pók aptémakxa énxet aphakxa. Yexpánchesek sat énxet aptémol'a apkeláneykha nekkések yexpánchesek nekkések apkelpaxkamap yát'ay.

SAN MATEO 26:72

Axta exénak makham Pedro, aptahak axta aptemésesa ekmámnaksoho appeywa s'e: —¡May'ásegkok ko'o m'a énxet nak!

SAN LUCAS 19:10

Hakte apwa'ak axta aptaha nak Apketche énxet yakwayam elchetmok ma'a énxet'ák ektaha axta apkelxegányam, tén han elwagkasek teyp.

SAN JUAN 18:17

Entahak axta elmaxneyeyncha'a Pedro kelán'a ektaha axta ektakmelcheso átog se'e: —¿Háweya exchep apkeltámeséyak ma'a énxet nak? Aptahak axta apchátegmowágko Pedro s'e: —Ma', háwe ko'o.

SAN JUAN 18:25

Apheyk axta makham Pedro nekha táxa m'a, entahak axta makham amya'a apcháneyákpo Pedro s'e: —¿Háweya exchep apkeltámeséyak ma'a énxet nak? Axta exénak makham Pedro, aptahak axta s'e: —Ma', háwe ko'o.

SAN JUAN 21:17

Antanxo apkelmaxneyeykekxa axta entahak. Aptahak axta makham se'e: —Simón, Juan apketche, ¿eyásekhayoya exchep? Kelapwokmek axta Pedro hakte antanxo axta entahak apkelmaxneyeykekxoho nakso' kexaha apchásekhayo. Aptahak axta apchátegmowágko Pedro s'e: —Wese', apya'ásegkok xép xa ekyókxoho nak: apya'ásegkok xép seyásekhayo ko'o. Aptahak axta apcháneya Jesús se'e: —Eltakmelches seknaktóso nekkések.

LOS HECHOS 20:28

Kólleyxmakha kéxegke, kóltakmelches ma'a ekyókxoho apchakneykekxexa nak, cham'a aptemésesamakxa nak kéxegke Espíritu Santo kélláneykegkaxa, yakwayam enxoho kóltakmelchesek Dios énxet'ák apagkok, aptaha axta anhan apkelma eñama m'a apyenkenma axta éma apagkok.

HEBREOS 13:20

Dios segmésamol'a meyke ektahakxa egwáxok sat etnésesek kéxegke kélpéwomo, tén han etnésesek kéxegke eltakmela kéltémakxa neyseksa kéllané m'a ekyókxoho aksok nak, yakwayam enxoho kóllának kéxegke m'a ektémakxa nak apmopmenyého Dios, tén han hentemésesek negko'o xa m'a apmokókxa enxoho hentemésesek, eñama m'a Jesucristo, cham'a Dios apxátekhásekmo axta Wese' egegkok Jesús nepyeseksa énxet'ák apkeletsapma, cham'a Jesús aptaha nak apkeláneykha nekkések apagko', cham'a aptemésesa axta ekmámnaksoho m'a nelpakhetchásamáxkoho nak Dios megkatnegwayam enéxa eñama m'a ekyegkenamaxche axta éma apagkok. ¡Apcheymákpoho sat cha'a kóltemésesek Cristo! Katnahagkok sat.

1 SAN PEDRO 2:25

Hakte kélxeganeykmek axta kéxegke ektémol'a nekkések apkelxegányam, kaxwo' eyke kélya'aweykxek kéxegke Cristo, aptaha nak apkeltakmelcheso kéxegke ekhawo m'a aptémakxal'a énxet ektaha nak apkeláneykha nekkések, meyenseykmok nahan apkeltakmelcheso kéxegke m'a Cristo.

1 SAN PEDRO 5:2

Kóltakmelches Dios apnaktóso nekkések, cháxa kélásennagkama nak kéxegke yakwayam kóltakmelchesek xa; kóllána' cha'a yetlo kélmáheyo kélagko' ekhawo m'a ektémakxa nak Dios apmopmenyého, háwe m'a kélyáteyeykegkohol'a, háwe nahan ma'a eñama nak kélmámenyého selyakye, wánxa agkok kóllána kéltamheykha yetlo kélmáheyo kélagko'.

APOCALIPSIS 7:17

hakte eltakmelchesek sat ma'a Nekkések Apketkok apha nak ma'a néten aptaháno ektakmalma nak, ekhawo aptemésesamakxa nak apkeltakmelchesama m'a nekkések. Enaklók sat nahan ma'a ekteyapmakxa nak yegmen ekyennaktésamo nak egnenyek. Dios sat nahan emasésesek apaktek égmenek xa énxet'ák nak.”