FILEMÓN 1:17 - Lengua Sur (Enxet) Nuevo Testamento

¹⁷ Xeyenmék agkok apwáxok xép sektaha ko'o apyáxeg eñama m'a ektémakxa nak nenteme magya'áseyam, yáhapmakha xa egyáxeg nak ekhawo setnésesamakxal'a ko'o.

FILEMÓN 1:17 ပူးပေါင်းရင်းမြစ်များ

SAN MATEO 10:40

“Enxet ektahakxa enxoho apma takha' kéxegke, hemok nahan ko'o xa takha'; keñe m'a ektahakxa enxoho sema takha' ko'o, emok takha' m'a aptaha nak seyáphaso ko'o.

SAN MATEO 18:5

Enxet ektahakxa enxoho apchápeykha sakcha'a eñama apxeyenma ko'o sekwesey, heyáhapmakha nahan ko'o xa.

SAN MATEO 25:40

Keñe sat etnehek yátegmowagkok Wese' apwányam se'e: ‘Eltennásek ko'o kéxegke elyáxeg ahancha'awók meleymákpoho kéltemésesama xa ektaha nak, ko'o nahan eltemesesók xa ektaha nak.’

LOS HECHOS 16:15

Kélyakpásesek axta yegmen xa kelán'a nak, tén han ma'a ekyókxoho ekheykha nak axagkok. Keñe axta ektaha sẽláneya s'e: —Nakso' agkok kélyekpelchawo kéxegke sektaha ko'o may'áseyam Wese' egegkok, kólhem exagkok. Keltamhok axta anhan aghók ma'a.

2 CORINTIOS 8:23

Ewanchek ko'o axének Tito aptaha sekxegexma, aptaha anhan sektamheykha xamo' yakwayam ampasmok kéxegke. Ewanchek nahan axének ko'o m'a apkánet ẽlyáxeg'a ektaha axta eláphaso kélakneykekxexa, cham'a, kélayókxa nak Cristo.

EFESIOS 3:6

Keso ektaha nak amya'a ekpowásamáxkoho s'e: kaxhok sat mók apkelxawe aksok kélpagkancheso m'a énxet'ák metnaha nak judíos tén han ma'a énxet'ák judíos, eñama m'a tásek amya'a nak, hakte hawók mók appasmeykekxa Cristo apyókxa, weykekxók nahan apkelxaweyak ma'a apekkeneykekxa axta appeywa Dios eñama Cristo Jesús.

FILIPENSES 1:7

Payhawók agko' ko'o katnehek ekxeyenma ewáxok kélyókxoho kéxegke xa ektaha nak, hakte awanhok agko' ko'o selásekhayo kéxegke, hakte wákxók nahan kéxegkáxa kélxawé naksa m'a ektémakxa nak segemleykekxoho Dios, cham'a segkésa axta aksa ko'o, megkeyxek ma'a sekha enxoho sẽlpextétamakxa, esenhan selyentama enxoho nápakta'awo' ma'a kelwese'e ekha nak kélyaheykekxoho, yakwayam amyók tén han axének ektaha nakso' ma'a amya'a nelmeyamáxche nak.

1 TIMOTEO 6:2

Yetneyk agkok énxet apmomap kéltemesáseykha aksa apteme wese' apagkok ma'a wese' apteme nak mey'áseyam Cristo, kéméxchek meyensemek apteme apcháyo, megkaxének apwáxok ewanyohok eñama m'a aptémo xamo' nak mey'áseyam. Kéméxchek eyánchesamhok aksa aptakmelchesamo aptamheykha, hakte kelwese'e melya'áseyam Cristo m'a kéltakmelchesesamol'a kélláneso aksok, ẽlyáxeg segásekhayo nahan ma'a. Eltennaha s'e, elxekmós nahan apnámokkok:

FILEMÓN 1:10

Eltamhok ko'o epasmok xép Onésimo, aptaha nak máxa hatte eñama nentémo xamo' magya'áseyam Wese' egegkok neyseksa sekha ko'o s'e sẽlpextétamakxa.

FILEMÓN 1:12

Eyáphásekxeyk ko'o makham Onésimo aphakxa exchep, etnéses sat ma'a setnésesamakxal'a ko'o.

FILEMÓN 1:18

Asagkek agkok aptemésesamakxa, esenhan ma'a ekyetna enxoho apméyak, ko'o sat helmaxnak selyakye yakwayam ayánmagkasesek.

HEBREOS 3:1

Elyáxeg, kélteme nak Dios énxet'ák apagkok, kéltaha nak han Dios apkelpagkanma, kéxegke ektaha axta apkelwóneykha Dios yakwayam kóltehek énxet'ák apagkok, kaxén kélwáxok Cristo Jesús, aptaha nak seykha amya'a, aptaha nak han apkemha apmonye appasmo apkelmaxnéseso Dios énxet'ák apagkok, cha'a keñamak nenxeyenma ekyetna negko'o magya'áseyam ma'a.

HEBREOS 3:14

Nenlenxanakmók agkok negko'o nenteme magya'áseyam ekweykmoho néxa, ekhawo m'a ektahakxa axta magya'áseyam sekxo' axta, cháxa nentaha negko'o nempasmo m'a ektémakxa nak aptamheykha Cristo.

SANTIAGO 2:5

Elyáxeg selásekhayo, kóleyxho hana s'e: Apkelyésáha Dios ma'a ektaha nak meyke aksok apagkok keso náxop, yakwayam enxoho kayáwak melya'áseyam, yakwayam enxoho nahan exkekxak ma'a aptémakxa nak Wese' apwányam Dios, cham'a apxeyenma axta egkések Dios ma'a ektaha nak apkelásekhayo;

1 SAN PEDRO 5:1

Emenyék ko'o agkések kaxwo' sekpeywa m'a énxet'ák apkelámha apmonye'e nak kélakneykekxexa kéxegke, ko'o sektaha nak han sémha emonye sekhawo xa énxet'ák nak, sektaha nak han sekweteykegkoho m'a ektémakxa axta aplegeykegkoho Cristo, hewatámhok sat nahan ko'o xa Cristo apcheymákpoho, cham'a peya nak hẽlxekmósho', ekhawo nak han xa énxet'ák nak.

1 SAN JUAN 1:3

Neltennáseyha negko'o kéxegke neltennasa m'a negwetaya axta negko'o, cham'a nenlegaya axta anhan, yakwayam enxoho hegyepetchekxak negko'o kéxegke, ekhawo ektémakxa nak negko'o negyepetcheyo Dios Egyap tén han ma'a Jesucristo aptaha nak Dios Apketche.