APOCALIPSIS 8:5 - Lengua Sur (Enxet) Nuevo Testamento

⁵ Keñe axta apma egheykok ekwatnamáxkoho axta cha'a aksok kañe' m'a Dios apchásenneykha nak. Apxatmeyk axta átex eñama m'a ekwatnamáxchexa axta cha'a aksok, apkexeyntek axta nahan ekyókxoho átex keso náxop; keñe axta ektepa extegyawa, kélpeywa ekyennakte axta anhan tépak, kelyenmeyk axta anhan cha'a, yawheyha axta anhan xóp.

APOCALIPSIS 8:5 ပူးပေါင်းရင်းမြစ်များ

SAN MATEO 24:7

Elnapakpok sat énxet xama yókxexma, yenmexek sat ma'a apheykha nak mók apkelókxa, kampakhaxchek sat nahan mók apkelókxa; katyapok sat meyk segakhe, kayawheykha sat nahan xóp mók xama apkelókxa.

SAN LUCAS 12:49

“Ekwa'ak axta ko'o seksókmoho táxa yakwayam ayensak keso náxop; eltamhok eykhe ko'o kálewak heykxa xa táxa nak.

LOS HECHOS 4:31

Xama axta appenchásegko aptamheyak nempeywa nelmaxnagko, pexyenegkek axta xóp ma'a apchaknákxexa axta; apkellánegkók axta apwáxók Espíritu Santo xa énxet'ák nak, apkellegásek axta Dios appeywa meyke apchéseykekxa.

APOCALIPSIS 11:13

Keñe axta ektepa ekyawheykha xóp ekyennakte agko', palchesakmek axta anhan nápakha tegma ekwokmo axta cha'a diez apyókxoho, siete mil axta anhan apyókxoho apkeletsapma énxet'ák. Keñe m'a ektaha axta meletsapma, apchekakxoho axta apkelpeykásawók Dios apha nak néten.

APOCALIPSIS 11:19

Keñe axta ekmayhekxo átog ma'a Dios tegma appagkanamap apagkok apyetna nak néten, keñe axta ekwetáxko ekyetna yántéseksek kélxátamakxa axta m'a ekhémo mók nelpakhetchásamáxkoho nak Dios kañe' xa tegma appagkanamap nak, keñe axta ektepa apkelyenmayam, kélpeywa, extegyawá, tén han ma'a xóp ekyawheykha nak, yegmen elyennakte ekxámokma axta nahan palleynta'.

APOCALIPSIS 4:5

Tekkek axta cha'a elyenma ekyetnakxa m'a taháno ektakmalma nak, tekkek axta anhan cha'a kélpeywa, tén han ekhó takha' appáwá, kelálewágkek axta anhan siete táxa amonye ekhágkaxa xa taháno nak. Siete espíritus apkeleñama Dios axta m'a.

APOCALIPSIS 6:12

Xama axta ekwokmo seis apleklo Nekkések Apketkok yampápa kélapma, enmexawok axta ko'o, keñe axta ektepa ekyawheykha xóp. Peysamákxek axta anhan ekhem ektémol'a apáwa appeysyam nentaxno magkenatchesol'a apketsapma egmók, apyexwasé axta nahan aptamhákxak pelten, máxa axta aptahak ma'a ektémakxal'a éma,

APOCALIPSIS 8:3

Keñe axta nahan apxegakmo pók Dios apchásenneykha apkeñama néten, egheykok ektakmela elyenma axta apmeykha ekwatnamáxkoho axta cha'a kañe' aksok ekmátsa nak ekpakneyam éten agkok, apkenegwokmek axta amonye ekwatnamáxchexa aksok; apxakak axta nahan ekxámokma m'a aksok ekmátsa nak ekpakneyam éten agkok, yakwayam ewatnek néten sawo ekyátekto elyenma ekwatnamáxchexa axta cha'a aksok ekyetnama axta keto' ekyetnamakxa m'a taháno ektakmalma nak. Axta anhan apyepetchásak ma'a nempeywa nelmaxnagko apagkok nak ma'a apyókxoho Dios énxet'ák apagkok apkelpagkanamap nak.