APOCALIPSIS 7:2 - Lengua Sur (Enxet) Nuevo Testamento

² Ekwet'ak axta anhan pók Dios apchásenneykha apkeñama m'a ekteyapmakxa ekhem, apmeykha axta kélkahaso eñama nak Dios memassegwayam. Apyennaktések axta appeywa xa Dios apchásenneykha nak, apkelpakhetchesa m'a hawók nápakha Dios apkelásenneykha apkelxaka axta apmopwancha'a yakwayam etwasha keso náxop, tén han ma'a wátsam ekwányam nak. Aptahak axta apkeláneya s'e:

APOCALIPSIS 7:2 ပူးပေါင်းရင်းမြစ်များ

SAN MATEO 16:16

Aptahak axta Simón Pedro apchátegmowágko s'e: —Xép aptaha Mesías, Dios memassegwayam Apketche.

SAN MATEO 26:63

Wánxa agkok, apwanmakkek axta eyke aksa Jesús. Aptahak axta apcháneya énxet apkemha apmonye appasmo apkelmaxnéseso Dios énxet'ák apagkok se'e: —Yetlo sekxeyenma apwesey Dios memassegwayam ko'o, eltamhok heltennaksek xép ekmámnaksoho agko'. Hẽltennés negko'o aptaha enxoho exchep Mesías, aptaha nak Dios Apketche.

SAN JUAN 6:27

Nágkóltemeykha aksa yakwayam kóltegyek ma'a nento eksawhomáxkohol'a, akke tásek kóltemeykha yakwayam kóltegyek ma'a nento ekyennaktésamo nak egnenyek ektaha nak han megkamassegwayam. Cháxa nento peya nak egkések kéxegke ektaha nak Apketche énxet xa, hakte apkelkahásek axta Dios Egyap xa.

2 CORINTIOS 1:22

Ẽlkahásek axta anhan negko'o m'a apkelkahaso nak, empekkenchesek axta negko'o egwáxok Espíritu Santo, yakwayam katnehek nakso' nenxawé aksok peya nak anxawa'.

EFESIOS 1:13

Ekhawo ektahakxa axta anhan kéxegkáxa, kéltemék axta kélyepetcheyo Cristo, kélkahásexchek axta anhan kéxegke magkenatcheso kéltaha Dios énxet'ák apagkok eñama kélxawé m'a Espíritu Santo apxeyenma axta egkések Dios, cham'a kélleg'a axta amya'a ekmámnaksoho ekxénáxko ekyetna kéxegke kélwagkásamáxche teyp, tén han ma'a kéltaha axta megkólya'áseyam Cristo.

EFESIOS 4:30

Nágkóllapwagkas aksa Espíritu Santo apkeñama nak Dios, cham'a kélkahásamáxko nak kéxegke yakwayam enxoho kólyekpelchaxkohok kélteme nak Dios énxet'ák apagkok, cham'a ekwa'a sat ekhem yakwánxa hẽlwagkasek teyp.

1 TESALONICENSES 1:9

Hakte apkelxeyenma apancha'awok axta eyke nentaha axta negko'o meyk'a kéxegke xa énxet'ák nak, exénhok nahan cha'a ektakmela axta sẽlapeykha kéxegke, exénhok nahan cha'a ektémakxa kélyenseykmo kéxegke kélpeykesamo kéleykmáseso, yakwayam kólyetlakxak ma'a Dios memassegwayam aptaha nak apmámnaksoho.

2 TIMOTEO 2:19

Wánxa agkok, appekkenchek axta eyke Dios xama aksok ektaha nak ekyennakwákxexa, ekyetna nak eknaktáxésamaxche s'e: “Ekpelkohok cha'a Wese' egegkok ma'a énxet'ák ektahakxa enxoho apagkok”, “kéméxchek nahan ényók nentémakxa ekmaso apyókxoho énxet ektaha nak apkelwóneykha Wese' egegkok apwesey.”

HEBREOS 12:22

Kélágketchesekmek eyke kéxegke enmakxa m'a egkexe Sión, tén han ma'a Dios memassegwayam tegma apwányam apagkok nak, cham'a Jerusalén apyetna nak néten, tén han kélágketchesekmo m'a apchaknákxexa nak Dios apkelásenneykha apxámokma apagko' apkelpeykáso Dios.

APOCALIPSIS 1:3

Apkeleñémo agko' énxet ektaha nak apkelyetseté xa amya'a ekxeyenma nak yakwánxa katnehek, apkeleñémo nahan ma'a ektaha nak apháxenmo, cham'a apkelyaheykekxoho nak ektémakxa eknaktáxésamaxche, hakte chágketwokmek kaxwo' ekhem yakwánxa nak katnehek xa.

APOCALIPSIS 10:1

Ekwet'ak axta ko'o pók Dios apchásenneykha ekha apyennakte, apweywentek axta apkeñama néten, neyseksa yaphopé axta apkexyekmok, pemhet axta eyke apyetnak néten apyetseksek, kelyenmawok axta m'a nápát ektémol'a ekhem elyenma, keñe axta apyay'ák ekhawo m'a táxa elakneyak la'a elálewe.

APOCALIPSIS 10:4

Peyk axta eykhe ko'o ataxaksek ekmassa apkelpáwá xa siete takha' nak, wánxa agkok, ekleg'ak axta ko'o kélpeywa eñama néten. Entahak axta amya'a s'e: “Né etekkesha aksa amya'a aptahakxa nak apkelpakmeyesma xa siete takha' nak, né etaxés nahan.”

APOCALIPSIS 16:12

Seis axta apwokmok Dios apchásenneykha, apyegkenchek axta aksok kañe' wátsam ekwesey Éufrates, keñe axta ekyamaka m'a wátsam nak, yakwayam enxoho elyeykhak kelwese'e apkeleñama ekteyapmakxa ekhem.

APOCALIPSIS 5:2

Ekwet'ak axta nahan ko'o xama Dios apchásenneykha ekha apyennakte, aptéma axta cha'a apkelmaxneyeykencha'a yetlo ekyennakte agko' appeywa s'e: “¿Yaksak ekpayhawo kameykesek xa weykcha'áhak kélpexteteykekxoho nak, tén han kalekkesek xa yampápa kélapma nak?”

APOCALIPSIS 8:3

Keñe axta nahan apxegakmo pók Dios apchásenneykha apkeñama néten, egheykok ektakmela elyenma axta apmeykha ekwatnamáxkoho axta cha'a kañe' aksok ekmátsa nak ekpakneyam éten agkok, apkenegwokmek axta amonye ekwatnamáxchexa aksok; apxakak axta nahan ekxámokma m'a aksok ekmátsa nak ekpakneyam éten agkok, yakwayam ewatnek néten sawo ekyátekto elyenma ekwatnamáxchexa axta cha'a aksok ekyetnama axta keto' ekyetnamakxa m'a taháno ektakmalma nak. Axta anhan apyepetchásak ma'a nempeywa nelmaxnagko apagkok nak ma'a apyókxoho Dios énxet'ák apagkok apkelpagkanamap nak.

APOCALIPSIS 9:14

Entahak axta amya'a apcháneyákpo Dios apchásenneykha apwokmo axta seis apyókxoho s'e, cham'a apmeyncha'a axta apchakkahaso: “kólchexeykxa hawók nápakha kelyekhama' elásenneykha kélpextetma nak xamo' wátsam ekwányam ekwesey nak Éufrates.”

APOCALIPSIS 9:4

Apkeláneyákpek axta menaktawasha pa'at, tén han ma'a ekyókxoho elyapakmaté nak áwa', tén han ma'a ekyókxoho yenta'a nak, wánxa axta aksa apkeláneyákpo enaktawasha m'a énxet ektahakxa enxoho meyke kélkahaso ekpayhakxa nápakta'a, cham'a kélkahaso eñama nak Dios.