APOCALIPSIS 7:15 - Lengua Sur (Enxet) Nuevo Testamento

¹⁵ “Ekeso eñamakxa apheyncha'a nak ma'a aphamakxa nak Dios, apkeltamheykha nahan cha'a ekyókxoho ekhem tén han ekyókxoho axta'a m'a Dios tegma appagkanamap apagkok nak. Elmeyok sat nahan cha'a m'a apha nak néten aptaháno ektakmalma, cham'a appaxkeyncha'a sat.

APOCALIPSIS 7:15 ပူးပေါင်းရင်းမြစ်များ

SAN JUAN 1:14

Enxet apagko' axta aptamheykekxak ma'a ektaha nak Appeywa, aphegkek axta nahan negyeseksa, negwet'ak axta anhan negko'o ektémakxa apcheymákpoho. Cháxa apcheymákpoho apmésa axta Apyap eñama apteme wánxa xama Apketche xa. Láneyok axta apwáxok segásekhayo tén han ma'a ekmámnaksoho nak.

1 CORINTIOS 3:16

¿Yagkólya'ásegkok kéxegke kéltaha Dios tegma appagkanamap apagkok, tén han Espíritu apkeñama nak Dios apha kélwáxok kéxegke?

2 CORINTIOS 6:16

Mopwanchek nahan Dios tegma appagkanamap apagkok etnehek apxegexma m'a aksok kéleykmáseso nak. Hakte negko'o nenteme Dios megyetsapma tegma appagkanamap apagkok, ekhawo aptémakxa axta appeywa s'e: “Axek sat ko'o nepyeseksa xa énxet'ák nak, aweynchamha sat nahan. Ko'o sat atnehek Dios apagkok xa énxet'ák nak, keñe sat ko'o atnehek énxet'ák ahagkok xa énxet'ák nak.”

HEBREOS 12:2

Anlanok hana wánxa m'a Jesús, hakte cha'a keñamak magya'áseyam nak negko'o m'a, Jesús nahan apteme apteméseso ektakmela m'a magya'áseyam nak negko'o. Aplegágkók axta Jesús néten aksok ektegyéso, axta yenmexmók Jesús ma'a nétsapma segmegkasamo nak, hakte apya'ásegkok axta peya étak ekpayheykekxa apwáxok natámen aplegeykegkoho apketsapma; aphákxeyk axta anhan ma'a ekpayhókxa nak nelya'asamakxa nekha Dios aptaháno.

HEBREOS 8:1

Akke nenxénak negko'o ektaha ektakmela agko' se'e; yetneyk negko'o aptaha nak apkemha apmonye appasmo apkelmaxnéseso Dios énxet'ák apagkok, cham'a aphákxo nak ma'a néten ekpayhókxa nak nelya'asamakxa nekha Dios aptaháno.

APOCALIPSIS 11:19

Keñe axta ekmayhekxo átog ma'a Dios tegma appagkanamap apagkok apyetna nak néten, keñe axta ekwetáxko ekyetna yántéseksek kélxátamakxa axta m'a ekhémo mók nelpakhetchásamáxkoho nak Dios kañe' xa tegma appagkanamap nak, keñe axta ektepa apkelyenmayam, kélpeywa, extegyawá, tén han ma'a xóp ekyawheykha nak, yegmen elyennakte ekxámokma axta nahan palleynta'.

APOCALIPSIS 13:6

Temék axta ekpeywa aksok nawhak eklo xa, kenmexáha axta ekpeywa Dios, wanyeyha axta nahan ma'a Dios, wanyeyha axta nahan ekpeywa m'a aphamakxa nak Dios, kenmexáha axta nahan ekpeywa m'a ektaha nak apheykha néten.

APOCALIPSIS 20:10

keñe axta kélyenyawa neyseksa táxa ekpaxkamaxche aksok ánek eyálewomol'a m'a kelyekhama' ektaha axta elyexancháseykha énxet'ák, cham'a kélyenyawakxa axta nahan aksok nawhak eklo, tén han ma'a énxet aplegaso axta amya'a megkamámnaksoho nak, cháxa yakwánxa nak han kóllegásesagkohok ekyókxoho ekhem tén han ekyókxoho axta'a xa megkatnegwayam enéxa.

APOCALIPSIS 21:22

Axta ko'o ót'ak tegma apagkanamap xa tegma apwányam nak, hakte Wese' egegkok Dios ekha apyennakte apteme apyakmagkaso tegma appagkanamap, tén han ma'a Nekkések Apketkok.

APOCALIPSIS 22:3

Méko sat nahan katnehek aksok aptaknagkamol'a Dios ma'a, hakte keytek sat Dios aptaháno ektakmalma m'a tegma apwányam nak, exek sat nahan Nekkések Apketkok ma'a, elpeykeshok sat nahan ma'a ektaha nak apkelásenneykha.

APOCALIPSIS 22:5

Méko sat nahan katnehek axta'a m'a tegma apwányam nak, kamaskok sat nahan apkepmenyého chálewaso ektaha nak apheykha m'a, tén han ma'a elsasó nak exma ekhem, hakte Dios Wese' egegkok sat egkések elseyexma, kelwese'e sat nahan etnahagkok megkatnegwayam enéxa.

APOCALIPSIS 4:4

Ekwet'ak axta anhan ko'o veinticuatro taháno eltakmela yetlo apheykha néten veinticuatro apkelámha apmonye'e neyáwa xa taháno ektakmalma nak; apkelmopé axta apkelántaxno, sawo elyenma axta anhan ma'a apkelatcheso apkatkók.

APOCALIPSIS 4:8

Seis axta cha'a apxempenák xama xa hawók nápakha aphó énxet nak, xámok axta kélakta'ák ekheyegko apyempe'ék, tén han ma'a kañe' apwáxok. Yókxoho ekhem, yókxoho axta'a axta meyenseyam aptéma cha'a apkelpeywa s'e: “¡Aptakmalma, aptakmalma, aptakmalma Wese' egegkok Dios ekha apyennakte, cham'a aphama axta nano', keso apha nak makham kaxwo' nak, cham'a peya nak han ewata'!”

APOCALIPSIS 4:9

Apkeltemésesek agkok cha'a apcheymákpoho Dios xa énxet'ák apkeleñama nak néten, etnehek nahan cha'a apcháyo, egkéshok nahan cha'a ekpayheykekxa apwáxók Dios, cham'a apha nak néten aptaháno ektakmalma, cham'a apha nak han megkatnegwayam enéxa, keñe cha'a eltekxeyagkok aptapnák nápakto' Dios xa veinticuatro apkelámha apmonye'e nak, elpeykeshok nahan cha'a, ekxeygkok nahan cha'a apkelatcheso apkatkók eltakmela apmonye aphamakxa m'a Dios, etnehek nahan cha'a apkelpeywa s'e:

APOCALIPSIS 7:9

Enmexawok axta ko'o natámen xa, ekwet'ak axta ko'o énxet apxámokma apyókxoho pók aptémakxa énxet nak, tén han ma'a móktémakxa nak apkelpakmeyesma. Amonye taháno ektakmalma axta apchakneykha m'a, nápakto' ma'a Nekkések Apketkok. Apxámok apagko' axta m'a, megkólwanchek axta kólyetsetek. Apkelmopé axta nahan apkelántaxno, áxa áwa' axta anhan apkelmeykha.