APOCALIPSIS 5:8 - Lengua Sur (Enxet) Nuevo Testamento

⁸ Xama axta apma weykcha'áhak kélpexteteykxoho xa Nekkések Apketkok nak, apkeltekxeyágkek axta aptapnák ma'a hawók nápakha énxet apkeleñama nak néten nápakto' ma'a Nekkések Apketkok. Axta anhan apkeltekxeyágkok aptapnák xa veiticuatro apkelámha apmonye'e nak. Apyókxoho axta apkelmeykha yát'axpog apyawe xa énxet'ák nak, egheykok ekyátekto elyenma axta nahan apkelmeykha yetlo ekláneyo aksok ekmátsa ekpakneyam éten agkok ma'a kañe'. Cháxa nempeywa nelmaxnagko aptamheyak nak cha'a m'a ektaha nak Dios énxet'ák apagkok.

APOCALIPSIS 5:8 ပူးပေါင်းရင်းမြစ်များ

SAN JUAN 1:29

Mók ekhem axta entahak apwet'a Juan apxegakmo Jesús, aptahak axta Juan apkeláneya énxet'ák se'e: “¡Kóllano, cháxa Nekkések Apketkok apkeñama nak Dios xa, aptaha nak apmaséseso melya'asáxma énxet'ák keso náxop!

SAN JUAN 5:23

yakwayam enxoho kaxhok kélteme kéláyo Dios Apketche m'a ekwánxa nak kélteme kéláyo ko'o Táta. Agkok kóltahak kéláyo Dios Apketche, megkóltahak nahan kéláyo m'a Táta aptaha axta seyáphaso ko'o.

HEBREOS 1:6

Xama axta apcháphasa apkemha apmonye Apketche Dios keso náxop, aptahak axta anhan appeywa s'e: “Apyókxoho Dios apkelásenneykha sat elpeykeshok.”

APOCALIPSIS 13:8

Apyókxoho énxet'ák apheykha náxop sat nahan elpeykeshok xa, cham'a megkanaktáxesamaxko nak apkelwesey m'a weykcha'áhak ekyennaktésamo nak egnenyek, eyeynamókxa m'a sekxo' axta elánamáxko keso náxop, cham'a weykcha'áhak ektaha nak apagkok ma'a Nekkések Apketkok apmatñama axta.

APOCALIPSIS 15:2

Ekwet'ak axta makham ko'o xama aksok ekyetchesamaxkoho wátsam ekwányam elyenma, táxa axta nahan ekyepetche, apchaknáha axta nahan nekha wátsam ekwányam ma'a ektaha axta apkelyaphogweykmoho apkenmexa m'a aksok nawhak eklo tén han apkenmexa m'a kéleykmáseso kélheyaseykegkoho nak aksok nawhak eklo, cham'a aksok nawhak eklo ekha nak elkahaso. Yát'axpog apyawe axta nahan apkelmeykha xa énxet'ák nak, ektaha axta Dios apkelmeyáseyak.

APOCALIPSIS 15:7

Xama énxet apkeñama néten axta aptépak aksa nepyeseksa hawók nápakha, apkelmeyásegkek axta anhan Dios apkelásenneykha siete egheykok eltakmalma ekyátekto elyenma yetlo elláneykegkoho m'a sẽllegasáseykegkoho ekmaso eñama nak Dios, cham'a apha nak megkatnegwayam enéxa.

APOCALIPSIS 19:4

Apkelháxahánteyk axta náxop veinticuatro apkelámha apmonye'e tén han ma'a hawók nápakha énxet apkeleñama nak néten, apkelpeykásawók axta Dios apha nak néten aptaháno ektakmalma. Aptahak axta apkelpakmeta s'e: “¡katnahagkok sat! ¡Apcheymákpoho sat cha'a kóltemésesek Wese' egegkok!”

APOCALIPSIS 4:4

Ekwet'ak axta anhan ko'o veinticuatro taháno eltakmela yetlo apheykha néten veinticuatro apkelámha apmonye'e neyáwa xa taháno ektakmalma nak; apkelmopé axta apkelántaxno, sawo elyenma axta anhan ma'a apkelatcheso apkatkók.

APOCALIPSIS 4:6

Máxa axta anhan wátsam ekwányam ekyetna amonye xa taháno ektakmalma nak, máxa axta aksok elyenmal'a. Ekwet'ak axta anhan ko'o aphó énxet neyseksa xa taháno nak, tén han ma'a neyáwa, xámok axta kélakta'ák apnenyek, tén han ma'a akkapok.

APOCALIPSIS 4:8

Seis axta cha'a apxempenák xama xa hawók nápakha aphó énxet nak, xámok axta kélakta'ák ekheyegko apyempe'ék, tén han ma'a kañe' apwáxok. Yókxoho ekhem, yókxoho axta'a axta meyenseyam aptéma cha'a apkelpeywa s'e: “¡Aptakmalma, aptakmalma, aptakmalma Wese' egegkok Dios ekha apyennakte, cham'a aphama axta nano', keso apha nak makham kaxwo' nak, cham'a peya nak han ewata'!”

APOCALIPSIS 5:11

Keñe axta senmexawo ko'o m'a, ekleg'ak axta ko'o apkelpakmeyesma Dios apkelásenneykha apxámokma apchakneykha axta neyáwa Dios aptaháno, cham'a apchaknágkaxa axta anhan aphó énxet'ák apkeleñama nak néten, tén han ma'a énxet'ák apkelámha apmonye'e nak. Apxámok apagko' axta xa.

APOCALIPSIS 5:12

Axta aptahak apkelyennaktésawo apkelpeywa s'e: “¡Payhawók exkak apmopwána Nekkések Apketkok apmatñama axta, payhawók nahan exkak ekxámokma aksok apagkok, payhawók nahan exkak apya'áseykegkoho, payhawók nahan exkak apyennakte, payhawók nahan kóltehek kéláyo, payhawók nahan kóltemésesek apcheymákpoho payhawók nahan kólpeykesho'!”

APOCALIPSIS 5:14

Apkelátegmowágkek axta m'a hawók nápakha énxet apkeleñama nak néten, aptahak axta s'e: “¡Katnahagkok sat!” Keñe axta apkeltekxeyágko aptapnák ma'a veinticuatro apkelámha apmonye'e nak, apkelpeykásawók axta Dios.

APOCALIPSIS 5:6

Keñe axta sekwet'a ko'o Nekkések Apketkok neyseksók xa taháno ektakmalma nak, ekwet'ak axta anhan hawók nápakha énxet apkeleñama néten apwakha'a xa Nekkések Apketkok nak, keñe axta anhan apwakha'a Nekkések Apketkok ma'a apkelámha apmonye'e nak. Apyagkak axta xa Nekkések Apketkok nak, máxa axta eyke entemék apmatñama enxoho. Siete axta apkepet'ák, siete axta anhan apakta'ák. Cháxa siete espíritu apkeleñama Dios kéláphaso cha'a náxop xa.

APOCALIPSIS 6:1

Keñe axta sekwet'a apleya Nekkések Apketkok xama xa siete yampápa kélapma nak, ekleg'ak axta anhan appakmeta xama xa hawók nápakha énxet apkeleñama nak néten, máxa axta entahak takha' appáwál'a appakmeta ekyennakte agko'. Aptahak axta s'e: “¡Empoho!”