APOCALIPSIS 21:27 - Lengua Sur (Enxet) Nuevo Testamento

²⁷ Wánxa agkok, megkatxek sat eyke aksok ekmanyása m'a, metxek sat nahan ma'a énxet ekmaso agko' nak aptémakxa, esenhan ma'a aksok sẽlyexancheseykha nak, wánxa sat elántexek ma'a énxet'ák eknaktáxésamaxko nak apkelwesey weykcha'áhak eknaktáxésamaxchexa nak apkelwesey énxet'ák peya nak elwagkasakpok teyp, cham'a weykcha'áhak ektaha nak Nekkések Apketkok apagkok.

APOCALIPSIS 21:27 ပူးပေါင်းရင်းမြစ်များ

APOCALIPSIS 20:15

cham'a kélchexeykxa axta nahan énxet'ák megkaxneykegko nak apkelwesey m'a weykcha'áhak eknaktáxésamaxchexa nak apkelwesey énxet'ák peya nak elxawagkok ekyennakte apnenya'ák.

APOCALIPSIS 3:5

Enxet'ák ektahakxa enxoho apkelmalanma, apkelmopé sat etnahagkok apkelnakta, mamasésesek sat nahan apkelwesey m'a weykcha'áhak eknaktáxésamaxko nak apkelwesey m'a peya nak elxawagkok elyennakte apnenya'ák, axének sat nahan ko'o selyekpelchawo nápakto' ma'a Táta, tén han nápakto' ma'a apkelásenneykha apkeleñama nak néten.

SAN MATEO 13:41

Eláphaksek sat apkelásenneykha m'a aptaha nak Apketche énxet yakwayam enxoho eyekhekxak ma'a énxet'ák apkeláneso nak melya'asáxma apnámokkok, tén han ma'a apkeláneyak nak apkeltémakxa ekmaso, cham'a appáxakxama nak Dios énxet'ák apagkok.

EFESIOS 5:5

kélya'ásegkok eyke kaxwo' kéxegke m'a énxet ektahakxa enxoho apkelané ekmaso nentémakxa mansexta, esenhan ma'a apkelané enxoho nentémakxa ekmanyása nak, tén han ma'a apkelmeyókásamákpoho nak apxakko' aksok (ektaha nak ekhawo m'a nelpeykesamo nak kéleykmáseso), megkawakxók sat apkelteme Wese' apwányam apagkok Cristo tén han Dios xa énxet'ák nak.

APOCALIPSIS 21:8

Keñe m'a énxet apcháyo nak aksok, tén han ma'a énxet'ak apkelyenseyam nak apteme melya'áseyam, tén han ma'a énxet'ák ekmaso nak apkeltémakxa, tén han ma'a énxet'ák apchakhamol'a pók, tén han ma'a énxet'ák ekmaso nak apkeltémakxa kalmopsexta'a, tén han ma'a énxet'ák aptamhéyak nak kelyohóxma'a, tén han ma'a énxet'ák apkelpeykesamo nak kéleykmáseso, tén han ma'a apyókxoho énxet'ák apkelmopwancha'a amya'a nak, sat kalpehemmok apkelmahéyak neyseksa aksok ánek eyálewomakxa xa énxet'ák nak, cham'a ektahakxa nak ánet nétsapma.”

APOCALIPSIS 13:8

Apyókxoho énxet'ák apheykha náxop sat nahan elpeykeshok xa, cham'a megkanaktáxesamaxko nak apkelwesey m'a weykcha'áhak ekyennaktésamo nak egnenyek, eyeynamókxa m'a sekxo' axta elánamáxko keso náxop, cham'a weykcha'áhak ektaha nak apagkok ma'a Nekkések Apketkok apmatñama axta.

HEBREOS 12:14

Kóllenxánem kóltehek meyke ektahakxa kélwáxok nepyeseksa m'a apyókxoho énxet'ák nak, kólteme nahan kélpagkanchásamáxche Dios; hakte méko kawának kótak Wese' egegkok megkólpagkanchásexko enxoho Dios.

APOCALIPSIS 20:12

Ekwet'ak axta ko'o apchakneyncha'a amonye ekyetnakxa taháno ektakmalma énxet'ák apkeletsapma axta, cham'a meyke kéláyo nak tén han ma'a ekyawe kéláyo nak. Kélmeykásegkek axta weykcha'áhak, axta anhan kélmeykásak ma'a mók weykcha'áhak eknaktáxésamaxchexa nak apkelwesey m'a peya nak elxawagkok ekyennakte apnenya'ák. Kéltemék axta sekxo' kélyekpelchémo énxet'ák, cham'a ektémakxa enxoho aksok apkeláneyak, keñe axta anhan kéltaha kélyekpelchémo m'a ektémakxa nak ekyetno weykcha'áhak eknaktáxésamaxche apkeltémakxa xa énxet'ák ektaha axta apkeletsapma.

FILIPENSES 4:3

Xép apteme nak cha'a sekxegexma ahagko' sektamheykha, eltamhok ko'o epasmok xép xa ẽlyáxeg'a nak, hakte kelenxáneykmók axta sepasmo ko'o ektémakxa seltenneykha tásek amya'a xa kelán'ák nak, Clemente axta anhan, tén han ma'a pók énxet'ák ektaha axta sektamheykha xamo' ko'o. Naktáxésamaxchek nahan apkelwesey m'a weykcha'áhak eknaktáxésamaxchexa nak apkelwesey énxet'ák ekyetnama nak ekyennakte apnenya'ák.

SAN MARCOS 7:2

Xama axta apkelwet'a aptókagko aptéyak nápakha Jesús apkeltámeséyak yetlo elpeysamxoho apmék xa énxet'ák nak, apkelpakhetchesek axta, hakte axta elyenyeyásegkok apmék aptókagko, ekhawo m'a apkeltémókxa axta kóltehek énxet'ák fariseos.

SAN LUCAS 10:20

Nágkalpayhekxa aksa kélwáxok kélwet'a elyahákxoho kélpeywa m'a kelyekhama', akke tásek kalpayhekxak kélwáxok ektáxesáxko kélwesey m'a néten.

1 TIMOTEO 1:10

tén han ma'a énxet'ák apkeláneyak nak ekmaso nentémakxa mansexta, tén han ma'a énxet'ák aphésamo nak apkeltémakxa kelán'a, tén han ma'a énxet'ák apkexeykekxa nak apnámokkok aptegyeykekxa selyakye yakwayam kóltemésesha aksa, tén han ma'a énxet'ák apkelmopwancha'a amya'a nak, tén han ma'a énxet'ák apteméseso nak ekmámnaksoho m'a amya'a megkamámnaksoho nak, cham'a énxet'ák apkeláneykegkohol'a m'a enmexma nak nelxekmowásamáxche ekmámnaksoho nak.

2 SAN PEDRO 3:13

akke nelhaxnak negko'o m'a apxeyenma axta elának Dios, axnagkok néten tén han xóp axnagkok, cham'a yakwánxa sat exmakha énxet elpéwomo nak apkeltémakxa tén han ma'a eltakmela nak apkeltémakxa.