APOCALIPSIS 2:19 - Lengua Sur (Enxet) Nuevo Testamento

¹⁹ Ekya'ásegkok ko'o ekyókxoho aksok apkelané nak xép; ekya'ásegkok ma'a ektémakxa nak apchásekhayo, tén han ma'a ektémakxa nak mey'áseyam, tén han ma'a ektémakxa nak aptamheykha, tén han ma'a ektémakxa nak apkelenxáneykmoho, ekya'ásegkok nahan ekxáma aksok apkelané kaxwo' nak, megkaxnawok ma'a sekxo' axta.

APOCALIPSIS 2:19 ပူးပေါင်းရင်းမြစ်များ

SAN LUCAS 1:23

Xama axta appenchesa aptamheykha Zacarías kañe' tegma appagkanamap, keñe axta apmeyákxo apxagkok.

SAN JUAN 15:2

Méko agkok ekyexna xama ahaktog ektaha nak sépetcheyo ko'o, eyaktének ma'a Táta; keñe yaxñásesek ma'a ahaktog ekhakxa enxoho ekyexna yakwayam enxoho kaxámagkok ekyexna.

COLOSENSES 3:14

Ekyagwánxa agko' ektakmela keytek kéxegke m'a kélásekhamaxkoho nak, cham'a negásekhayo segyepetcháseykekxohol'a cha'a egmók.

1 TESALONICENSES 3:6

Kaxwo' eyke, apwakteyk Timoteo apkenyekto m'a tegma apwányam Tesalónica, ensántegkesek axta negko'o amya'a ektakmela ektémakxa megkólya'áseyam kéxegke, tén han ektémakxa kélásekhamaxkoho ekyetna nak kélnepyeseksa kéxegke. Ẽltennásakteyk axta megkamassegweykmo exnek cha'a ekxeyenma kélwáxok negko'o yetlo segásekhayo, tén han kélmáheyo kélagko' hek hẽlwetekxak makham negko'o, ekhawo ektémakxa nak han negko'o xa negmáheyo ólwetekxak kéxegke.

2 TESALONICENSES 1:3

Elyáxeg, kéméxchek cha'a negko'o agmések ekxeyenma egwáxok Dios kéxegke eñamakxa, cháxa ekpayhawo nak antehek negko'o xa, hakte yáwegkek kélteme megkólya'áseyam kéxegke, yágwokmok nahan ma'a ektémakxa nak kélásekhamaxkoho kéxegke.

1 TIMOTEO 1:5

Emenyék axta ko'o keytek nelásekhamaxkoho sektaha seyáneya exchep xa, cham'a negásekhayo eñama nak nenteme eyáxñeyo egwáxok, tén han eñama m'a megkaxénweykekxohol'a egwáxok nentémakxa, tén han eñama m'a magya'áseyam ekmámnaksoho nak.

1 SAN PEDRO 4:8

Akke ekyagwánxa agkok ektakmela keytek kélnepyeseksa kéxegke m'a ekyawé kélásekhamaxkoho nak, hakte nelásekhamaxkoho cha'a kañék meyakmagkáseykekxa Dios nentémakxa mólya'asáxma.

2 SAN PEDRO 1:7

keñe m'a nempagkanchásamáxche nak Dios kólyepetchesek ma'a ektémakxa nak nelásekhamaxkoho nenteme nak magya'áseyam Cristo; keñe m'a ektémakxa nak nelásekhamaxkoho nenteme nak magya'áseyam Cristo, kólyepetchesek ma'a negásekhayo nak.

2 SAN PEDRO 3:18

Wánxa agkok, emenyék ko'o kólya'ásegwomhok ektakmela agko' ma'a Wese' egegkok Jesucristo segwagkasamo nak teyp, tén han seyámenyého kólyánchesagkohok kélma kéxegke m'a segásekhayo eñama nak Wese' egegkok. ¡Apcheymákpoho sat cha'a kóltemésesek Wese' egegkok keso kaxwo' nak, tén han megkatnegwayam enéxa! Katnahagkok sat.

APOCALIPSIS 2:13

Ekya'ásegkok ko'o apha exchep ma'a ektémakxa nak wese' Satanás; wánxa agkok apkelenxáneykmok eyke exchep apxeyenma sekwesey. Axta anhan elwáteseykmok apteme mehey'áseyam ko'o, cham'a apmatña axta Antipas, aptaha axta meyenseyam aplegaso sekwesey. Axta payhok apmatñamakxa m'a tegma apwányam ektémakxa nak wese' Satanás.

APOCALIPSIS 2:9

Ekya'ásegkok ko'o ektémakxa nak aplegeykegkoho exchep, tén han ma'a ektémakxa nak meyke aksok apagkok, xámok eykhe exchep aksok apagkok eleñama Dios. Ekya'ásegkok nahan ektémakxa nak ekmaso apxeyenma exchep ma'a énxet'ák apkeltemesásamákpo nak judíos, háwe eyke, apchakneykekxexa apkelpeykesamo Satanás akke xa.