APOCALIPSIS 18:2 - Lengua Sur (Enxet) Nuevo Testamento

² Aptahak axta apyennaktésawo appeywa s'e: “¡Apteyekmek, apteyekmek tegma apwányam Babilonia! ¡Kelyekhama' ekheykegkaxa tamhákxa', tén han ektamhákxo elleykegkaxa m'a ekyókxoho ektémakxa nak espíritu elmasagcha'a, náta elmasagcha'a axanák nahan tamhákxa' tén han ma'a ekyókxoho ektémakxa nak aksok nawha'ák elmasagcha'a tén han ma'a ekmanyása nak!

APOCALIPSIS 18:2 ပူးပေါင်းရင်းမြစ်များ

APOCALIPSIS 1:15

Kelápogwategkek axta nahan apmagkok ektémol'a sawo ekyentaxno ekyexwáseykekxal'a kélyamasma neyseksa táxa, kayhek axta nahan appeywa, máxa axta extegyawa m'a ekteyeykenxal'a yegmen.

APOCALIPSIS 10:3

Kayhek axta nahan appeywa apkelpáxameyncha'a, máxa axta m'a ektémol'a méwa ekyexweywe; xama axta apkelpáxameyncha'a xa, yetlókók axta apkelpáwá siete takha'.

APOCALIPSIS 11:8

Kaxnagkok sat nahan aphopák ámay nepyeseksa tegma apwányam kélya'áseykegkoho nak, cham'a kélyepetchesamakxa axta anhan aksok ektegyéso Wese' apagkok, cham'a kéltéma nak Sodoma kélyetcháseykekxoho, tén han kélyetcháseykekxoho m'a Egipto.

APOCALIPSIS 14:15

Aptekkek axta nahan pók Dios apchásenneykha apkeñama kañe' tegma appagkanamap, aptahak axta apyennaktésawo appeywa appakhetchesa m'a apha axta néten yaphopé: “¡Ema sawo ekhaxé apagkok, elmekxa nahan ma'a aksok apnakxo nak ekyexna; hakte wokmek kaxwo' ekhem, makhetchek nahan kaxwo' ekyexna m'a aksok peya nak kanakxaxchek keso náxop!”

APOCALIPSIS 14:8

Apxegkek axta nahan pók Dios apchásenneykha aptéteyak xa pók nak. Aptahak axta appeywa s'e: “¡Apteyekme', apteyekme' kaxwo' tegma apwányam Babilonia, cham'a aptemesáseykegko nak máxa anmenát'ák apyókxoho énxet'ák eñama m'a apkelmopmenyého nak elanagkok ekmaso nentémakxa mansexta!”

APOCALIPSIS 16:13

Ekwet'ak axta ko'o ektepa aksok ekmaso ekhó napnekteg átog yéwa ekwányam, axta anhan ekwet'ak ektepa átog ma'a aksok nawhak eklo, axta anhan ekwet'ak ektepa apátog ma'a seykha amya'a apmopwána amya'a nak. Antanxo axta ekyókxoho xa aksok elmasagcha'a ekhó nak napnekteg.

APOCALIPSIS 16:19

Apkántanxo nápakha'a axta apyepteypok tegma apwányam, apkelyaknenágkek axta anhan tegma apwányam nak keso náxop, keñe axta ekxénwákxoho apwáxok Dios ma'a tegma apwányam Babilonia, yakwayam yagkok sẽllegasáseykegkoho eñama nak Dios ekyetchesamaxkoho nak anmen, cham'a aplawa axta.

APOCALIPSIS 17:18

Kelán'a apwet'a exchek xép, cháxa tegma apwányam apkeláneykencha'a nak apyókxoho kelwese'e apkelwányam apheykha nak keso náxop.”

APOCALIPSIS 17:5

Yetnegkek axta nahan kéltáxeso ekpayhakxa nát megkólya'áseyak ektémakxa, ektéma nak se'e: “Ko'o sekteme tegma apwányam Babilonia ektaha nak ektepakxa m'a ekmaso nak nentémakxa mansexta, ektaha nak han ektepakxa m'a ekyókxoho aksok ekmanyása ekheykegko nak keso náxop.”

APOCALIPSIS 18:10

Makhawók sat yekhegwók eñama apkeye m'a ektahakxa kéllegasáseykegkoho. Sat etnehek elpakmétek se'e: “¡Xép laye tegma apwányam Babilonia, tegma apwányam apyennakte, pelakkásók agko' nahan ekwa'a kéllegasáseykegkoho.”

APOCALIPSIS 18:21

Apya'ásek axta néten xama meteymog Dios apchásenneykha ekha apyennakte natámen xa, máxa axta m'a meteymog ekyawe agko' la'a, apyenyenték axta kañe' wátsam ekwányam. Aptahak axta appakmeta s'e: “Sat katnehek kéltegkeso exchep xa xép tegma apwányam Babilonia, megkólwetekxók sat cha'a.

APOCALIPSIS 5:2

Ekwet'ak axta nahan ko'o xama Dios apchásenneykha ekha apyennakte, aptéma axta cha'a apkelmaxneyeykencha'a yetlo ekyennakte agko' appeywa s'e: “¿Yaksak ekpayhawo kameykesek xa weykcha'áhak kélpexteteykekxoho nak, tén han kalekkesek xa yampápa kélapma nak?”