Yosua 11:12 - Katɔti Ɔku Kedee

¹² Na Yosua úkpo ɔdi lɛma lɛni nkya mmɔ ku bana baga ƒui lɛlɔ. Na ɔ́du ukyuli biala aani kalɛ kani na Mose ɔni ndi Unwoti kabla ɔblane úbo-nwu ɔda kalɛ.

Yosua 11:12 ပူးပေါင်းရင်းမြစ်များ

Lɛkpa Ulu 7:2

Unwoti ɔdubo-ma budie bute-mii na bɛbɔku-ma bɛlɛku kalɔ kammɔ lɛlɔ. Na mmɔ na ɔlɛka bɛyila-ma udu ƒui na bitanu ɔdi biala kɔnyana lɛnɔ. Amii ku-ma bitenyimi lɛla biala bitete lɛlɔ.

Lɛkpa Ulu 9:3

Nsu ɔƒɛni amii ɔlati bɛdubo bɔnu ka bina Unwoti Katɔti ɔdubo bɔgyu bɔtɔ-mii anumi aani ogya ɔni mɔɔkyula ala kalɛ. Na ɔdubo-ma udu bɔyila na ɔdi-ma lɛlɔ uwi ɔni na bɛ́kpɛ bíde-ma kalɛ na bɛkɛ kuƒi na bɛbɔku-ma bɛlɛku bana lɛma. Na ɔdia na bɛyila-ma udu pla aani kalɛ úse kenye úse.

Yosua 10:20

Anwuɔsu Yosua ku nwuna bekpone bádu bekisine bammɔ ƒui. Nsu badi bakana bukeli bétéduo bana lɛma lɛni bátu awodu bámana-nya kemmo na bátadu-ma.

Yosua 10:28

Ɔmmɔ kama ni, Yosua ku Israelƒuɔ besie na bétékpoku Makedaƒuɔ na ɔ́di-ma lɛlɔ limeyi lɛmmɔ kani. Na ɔ́du ukyuli biala na ɔkya ɔma ɔmmɔ kemmo ɔni na ukyuli biala útebu. Na lɛla lɛni na ɔ́bla Yeriko ɔga ni, lɛni kani na ɔ́bla Makeda ɔga.

Yosua 10:30

Na Unwoti ɔ́ya na Israelƒuɔ bádi Libnaƒuɔ lɛlɔ. Na bádu bekyuli bani ƒui nkya ɔma ɔmmɔ kemmo ɔni na bátanu ukyuli ɔdi kɔnyana. Na lɛla lɛni na béti bábla Yeriko ɔga ni, lɛla lɛmmɔ kani na béti bábla Libna ɔga lɛnɔ.

Yosua 10:32

Na bádu ukyuli biala ɔni na bátanu ɔdi kɔnyana.

Yosua 10:35

Na bádi-ma lɛlɔ limeyi lɛmmɔ kani. Na bádu bekyuli bammɔ ƒui kede kede aani kalɛ kani na béti bábla Lakisƒuɔ pɛpɛɛpɛ.

Yosua 10:37

Na bádi Hebronƒuɔ lɛlɔ na bádu bekyuli bani ƒui nkya ɔma ɔmmɔ kemmo ku bana ɔga. Na bávi bésie akpaklɔ ani nde Hebron na bádu bekyuli bani nkya mmɔ ƒui kede kede aani kalɛ na bábla Eglonƒuɔ. Na báyila ɔma ɔmmɔ udu ku bekyuli bani nli-nwu kemmo.

Yosua 11:13

Nsu Israelƒuɔ batakyula lɛma lɛni nkya abi lɛlɔ mmɔ ɔdi biala. Hasor lɛti kani na bákyula.

Yosua 11:15

Na kalɛ na Unwoti úbo Mose ɔni ndi nwuna kabla ɔblane ɔda ni, lɛni kani na Mose lɛnɔ úbo Yosua ɔda. Na Yosua lɛnɔ ɔ́bla ɔ́siaku kalɛ kani na Mose úbo-nwu ɔda ɔmmɔ ɔni na útada útavia ɔda bubo bɔmmɔ bɔdi. Ɔ́bla lɛla biala pɛpɛɛpɛ aani kalɛ na Unwoti úbo Mose ɔda.

Yosua 13:6

“Na bani ƒui nli abi lɛlɔ ɔ́si Lebanon útédu Misreƒot-Maim na badi Sidomƒuɔ ni, ami Unwoti ɔlati ndubo-ma bɔbɔku bute Israelƒuɔ. Na lɛla lɛni kani na ɔlɛka abla ndi ka ele kɔlɔ kɔmmɔ ete Israelƒuɔ aani kalɛ kani na líbo-ɔ ɔda nnii bla.

Yosua 21:44

Na Unwoti ɔ́ya na bákɛ atu bɔyɔ na kalɔ kammɔ ƒui kemmo aani kalɛ na ɔ́su bana bati kuuku úse. Na bana bekisine ƒui bátakana na bénye basiaku-ma. Ɔsika Unwoti ɔlati nékpo úte Israelƒuɔ.

Yosua 8:31

Na ɔ́tu-nwu ɔsiaku aani kalɛ na Mose ɔni ndi Unwoti kabla ɔblane úbo Israelƒuɔ ɔda kalɛ. Lɛni na bénweni bakya Mose ɔda bubo ɔku kemmo banini, “Biti atabi ani na béteti lɛbuala bátabwɛ bɛbla lɛkpabi bite-mi.” Na lɛkpabi lɛmmɔ lɛlɔ ni, bádu bebuo bákyula bakpa béte Unwoti na bábla unwi bɔbla akpala lɛnɔ.

Yosua 8:8

Na si úti ɔma ɔmmɔ ɔkya bina enu kemmo ɔ́wɔlɔ ni, na bɛtu ogya bɛkya ɔma ɔmmɔ kemmo na bɛbla bɛsia Unwoti ɔda ɔni na úbo-mii lɛlɔ. Na bɛdi mina litemi lɛmmɔ lɛlɔ.”

Yosua 9:24

Amu na Gibeonƒuɔ bammɔ bédie kenye banini, “Ati! Lɛla lɛni ɔsu bɔ́nyi ɔkɔ ɔmmɔ udu ndi ka búnu na ɔdi sɔsɔ ka bina Unwoti Katɔti úbo nwuna kabla ɔblane Mose ɔda ka ɔdubo kalɔ kani ƒui nkya mɛni buti bute-mii. Na ɔdubɔya na bɛdu bekyuli bani ƒui nkya-ka kemmo uwi ɔni na bikpo bisela anumi mɛni. Ɔƒɛni lɛnɔ bɔbla lɛni, ɔsika bɔɔyia-mii geen na bɔgyi ka bula ngba bɔkya ɔgbankpi kemmo.