Yakobo 4:11 - Katɔti Ɔku Kedee

¹¹ Banwa, bitalɔ lɛlɔ anyikpi. Si ɔdi ɔ́bla lɛni iye ɔ́tɛku ɔnwani ɔdi litemi ni, na ulábu ɔda bubo bɔmmɔ na ɔ́ta únye-mu lɛlɔ lɛnɔ. Si bɛ́ta bínye ɔda bubo bɔmmɔ lɛlɔ ni, na ɔɔtina ka bɛ́da ɔda bubo bɔmmɔ lɛlɔ bɔdi bɛ́ya. Na bínwini bɛɛtɛku ɔda bubo bɔmmɔ litemi.

Yakobo 4:11 ပူးပေါင်းရင်းမြစ်များ

Kɔgya 140:11

Taya na ukyuli ɔni muubile bekyuli anyi ɔkɛ bɔnwuna bɔdi na kalɔ kamɛni lɛlɔ. Ya na lɛbibo lɛsiaku bekyuli bani muuti kalala kasusu.

Luka 6:37

“Bitababla bitatɛku bekyuli litemi, na Katɔti lɛnɔ ulatɛku-mii litemi. Bitadu bekyuli kɔtɔ, na Katɔti lɛnɔ uládu-mii kɔtɔ. Biti bɛkyiɛ bekyuli, na Katɔti lɛnɔ weti wakyiɛ-mii.

Romaƒuɔ 2:1

Anwuɔsu ni, si awɔ ɔdi aatɛku ukyuli litemi na aadú-ma kɔtɔ ni, eeebo kenye kadi na eedie. Na ulu biala lɛlɔ na ádu ƒula bakpana kɔtɔ ni, ƒula lɛlɔ na aadú kɔtɔ. Ɔsika ala ani na bábla ni, ana udu kani na awɔ lɛnɔ aabla.

Romaƒuɔ 2:13

Ɔsika ɔɔɔdi bekyuli bani na bunu kani na beenú ɔda bubo bɔmɛni ndubɔbla siin na Katɔti anumi. Mmomu bekyuli bani mɔɔbla taasiaku lɛla lɛni nkya ɔda bubo bɔmmɔ kemmo ndubɔbla siin.

Romaƒuɔ 7:7

Na ɔmɛni ɔsu ni, bi na ɔdi ka bɔsu? Bɔsu na bɔsu bɔnii Katɔti ɔda bubo bɔdi likpidi? Kudii! Geen ni, ɔkɛnku ɔda bubo bɔmɛni lɛlɔ na bɔɔtí lɛla lɛni ndi likpidi. Si ɔda bubo bɔmɛni bútasu bɔnii, “Taya na anumi egyie-ɔ na ukyuli ɔdi ala lɛlɔ” ni, na nka lɛɛɛgyi lɛla lɛni ndi lɛnungyie likpidi.

Korintoƒuɔ 1 4:5

Anwuɔsu ni, ɔdi utatɛku ɔkpanadi litemi wetédu ka uwi ɔbuni ɔmmɔ webo. Si uwi ɔni na Blɔti úbo ni, anwu ndubɔtɛku ukyuli biala litemi na limeyi likplodi lɛmmɔ lɛlɔ. Na anwu ndubudie kasuudikɔ ala abɛdi keyi na ɔdubudie ala ani na bekyuli kakali kadanku ɔtina. Mmɔ na Katɔti ɔdubumwi ukyuli biala kalɛ na ɔ́bla nwuna kabla ɔ́vinku.

Korintoƒuɔ 2 12:20

Mɔɔyia ka si líbo mmɔ ni, ndububo mbanu ka bɛ́vumana kalɛ na mɔɔwia-mii lɛnu. Na lɛni kani na amii lɛnɔ bɛdubɔnu ka lɛ́vumana kalɛ na amii lɛnɔ bɛɛwia ka bɛnu. Mɔɔyia ka ndububo mbanu ka bɛɛdɔ, na bɛɛbla lɛnungyie likpidi, na biiti kɔnyi taakya lɛlɔ, na bɛɛwia kalɛ na ɔdia ute amii lɛti pɛ, na biidumi lɛlɔ, na bɛɛlɔ lɛlɔ anyikpi, na bɛɛtalaku lɛlɔ katɔ, na biiƒú na lɛla biala kemmo.

Eƒesoƒuɔ 4:31

Livo lɛda-mii buƒi lɛya na bekyuli lɛlɔ. Bɛya na bekyuli ala ada-mii kayi bɔtu aya. Na bɛda kɔnyi buti bɛya. Na bɛda kadɔ bɔdɔ bɛya. Na bɛsɔ bitalɔ lɛlɔ anyikpi. Na bɛsɔ biteti lɛlɔ kasusu biala.

Timoteo 1 3:11

Bana beleku lɛnɔ ni, ɔlɛka babla beleku bani nda udu buni, na baaadi bekyuli lɛlɔ atɛ batɛmine. Mmomu ɔlɛka babla beleku bani náda anu, na baabla lɛla biala kaduɛ.

Timoteo 2 3:3

Badi bekyuli bani na ukyuli bamba lɛlɔ lilakywi-ma kaƒɔ, ku bani naaanu kɔnyana. Badi bekyuli bani mɔɔnyi ɔkɔ taada litemi taasia bekyuli lɛlɔ, ku bekyuli bani mbo kalala. Na bana anumi eeese buɛɛ. Na badi bekyuli bani nkisi lɛla lɛbuni.

Tito 2:3

Lɛni kani na beleku benengu bammɔ lɛnɔ ni, tina-ma anii belie ngba bɔni námanku beleku bani nse kedee ka belie. Na batataalɔ bekyuli anyikpi. Na ntɛ bɔni lɛnɔ butadi-ma lɛlɔ. Mmomu batina bekyuli udu buni.

Yakobo 1:16

Banwa bayɔne, bitaya na ukyuli ɔdi ɔtɔlɔ-mii.

Yakobo 1:19

Banwa bayɔne, binyimo na ukyuli biala use atu unu lɛla biala. Na uwi lɛlɔ na ɔkɔsi bɔtɛmi. Na uteteeti kɔnyi pla pla.

Yakobo 1:25

Litemi buni lɛmmɔ ndi Katɔti ɔda ɔni na úbo-bu geen. Na ani mɔɔyá bekyuli baakɛ́ bɔnwuna. Si ukyuli únu na úduo etemila ammɔ kemmo kaduɛ na útayiƒala ka ɔbla ɔsiaku-nya lɛlɔ ni, ala ani na ɔɔbla ƒui adubɔtɛ ete-nwu.

Yakobo 2:8

Na si bɛ́di Katɔti ɔda bubo bunengudi bɔmɛni lɛlɔ ni, bɛ́bla-nwu kaduɛ. Ɔkya Bunweni Kedee Ɔku kemmo ka, “Yɔ ƒula ukyulikpana aani ƒula lɛlɔ kalɛ.”

Yakobo 5:10

Mina banwa, bɛnu Katɔti kenye bediene bani násu Katɔti litemi buni ku kalɛ bákɛ kayi na bénye bébo abi biala. Bɛnu-ma bɛtɛya.

Yakobo 5:7

Banwa, kalɛ na umonsene ɔɔkɛ́ kayi teete kaƒendi ɔnantu ku ketudi ɔnantu ute nwuna edula ani na ɔ́va bɔdia ɔsu ni, lɛni kani na ɔlɛka bɛkɛ kayi utédu uwi ɔni na Blɔti wasɔ webo.

Yakobo 5:9

Banwa, bitadɔnku lɛlɔ, kalɛ na Katɔti lɛnɔ ulatɛku-mii litemi. Ɔsika Litemi Ɔtɛne ɔmmɔ úude na ɔ́ɔklibi lɛlɔ ka ɔda ɔlɛ.

Petro 1 2:1

Anwuɔsu bɛda kasusu kekpidi ƒui buti na bekyuli lɛlɔ bɛya. Na bɛsɔ bitanyi ɔkɔ iye bɛtɔlɔ bekyuli. Anumi etegyie-mii bekyuli ala lɛlɔ. Na bitalɔ lɛlɔ anyikpi.