Tito 3:7 - Katɔti Ɔku Kedee

⁷ Na ɔkɛ nwuna lɛƒɔndia ɔsu ni, abu ku-nwu ntɛ bɔ́dia kalɛ na abu lɛnɔ bɔ́kɛ ngba ƒui bɔni lɛlɔ na bula anu asia.

Tito 3:7 ပူးပေါင်းရင်းမြစ်များ

Mateo 25:34

“Na Ɔga ɔmmɔ ɔdubɔsu bekyuli bani nnye-nwu kudɔ ɔnini, ‘Amii ndi bekyuli bani na Katɔti ɔni ndi mina Ɔti ɔ́ya na lɛlɔ lɛdubɔyɔ-mii kaduɛ. Anwuɔsu bibo na bibeduo lɛga kadikɔ kani na Katɔti ɔ́klibi úse úte-mii ɔ́si kayawi kalɔ kesekɔ ƒui.

Marko 10:17

Ka Yesu ɔ́ta ɔnii ɔɔtɔlɔ uteesie ulu ni, ɔnana ɔdi ɔkɛ usi úbo-nwu kudɔ úbalɛ akɔnkɔ na nwuna anumi, na úye-nwu ɔnini, “Ala ɔtinane buni, bi na ɔlɛka lɛbla asa makɛ ngba bɔni naaadubo bɔsa kudii?”

Romaƒuɔ 11:6

Nwuna lɛƒɔndia lɛlɔ na ɔkɛ ɔ́ƒuna-ma, na ɔɔɔdi bana lɛla lɛni bábla ɔsu na ɔ́ƒuna-ma. Na si Katɔti ɔɔƒuna bekyuli na bana kabla bɔbla kenye ni, na nwuna lɛƒɔndia lɛɛɛdi lɛƒɔndia geen.

Romaƒuɔ 3:24

Nsu ni, Katɔti ɔkɛnku Kristo Yesu ɔni náƒɔ bula lili kayu lɛlɔ ɔ́ya na bɔɔbla siin na nwuna lɛƒɔndia ɔsu.

Romaƒuɔ 3:28

Ɔsika bɔgyi nwaa ka ni, ɔkɛnku bɔƒɔtaadi lɛlɔ kani na ukyuli ɔɔbla siin na Katɔti anumi, na ɔɔɔdi nwuna ɔda bubo bɔmmɔ lɛlɔ bɔdi ɔsu.

Romaƒuɔ 4:16

Anwuɔsu ni, linyese lɛmɛni lɛdanku bɔƒɔtaadi, na ɔdi kama kekpokɔ ute bekyuli na Katɔti kaƒɔbuni kani na ɔ́bla bekyuli bani ƒui ndi Abraham bawɔ. Na ɔɔɔdi bani na Katɔti úte ɔda bubo bɔmmɔ lɛti pɛ ndi-nwu bawɔ. Mmomu bani nsiaku Abraham bɔƒɔtaadi bɔmmɔ kama lɛnɔ. Ɔsika ni, Abraham ɔdi baƒɔtaadine ƒui ɔti.

Romaƒuɔ 4:4

Ukyuli ɔni mɔɔbla kabla ni, ulábu nwuna lɛyuƒɔla aani litela, mmomu ɔdi lɛla lɛni námanku-nwu na nwuna kabla kenye.

Romaƒuɔ 8:17

Na si bɔdi nwuna bebi ni, na bɔdi nwuna ala badine. Na abu ku Kristo bɔdubɔdi Katɔti ala bɔsala. Na bɔdubukeye lɛnɔ aani nwuna kalɛ si búbo abi aani kalɛ na Kristo úbo abi.

Korintoƒuɔ 1 6:11

Lɛni na nka amii badi bíse. Nsu Blɔti ɔ́ƒɔ-mii ekpidi údie-mii lɛlɔ kemmo na ɔ́bla-mii kedee úte Katɔti. Na amii ku Katɔti ntɛ bɔ́sɔ bɔ́dia ɔkɛ Blɔti Yesu Kristo ku Katɔti Kɔyu ɔsu.

Galatiƒuɔ 2:16

Nsu bɔgyi ka Katɔti ɔɔsɔku anwu ku ukyuli ntɛ taaklibi ɔkɛnku bɔƒɔtaadi bɔni na ukyuli ubo na Yesu Kristo lɛlɔ kani ɔsu. Na ɔɔɔdi ɔda bubo bɔkukudi bɔmmɔ lɛlɔ bɔdi ɔsu. Abu lɛnɔ bɔ́ƒɔ Kristo Yesu bɔ́di ɔsu na Katɔti ɔ́klibi abu ku-nwu ntɛ ɔkɛnku bula bɔƒɔtaadi na Kristo kemmo ɔsu. Na ɔɔɔdi ɔni na bɔɔdi ɔda bubo bɔkukudi bɔmmɔ lɛlɔ ɔsu. Ɔsika Katɔti útaklibi anwu ku ukyuli ɔdi ntɛ na ɔda bubo bɔkukudi bɔmmɔ lɛlɔ bɔdi ɔsu.

Galatiƒuɔ 3:29

Anwuɔsu si bɛdi Kristo ɔdi ni, na bɛdi Abraham kaba bebi, na bɛdi Katɔti linyese lɛmmɔ ala badine.

Galatiƒuɔ 4:7

Anwuɔsu ni, bɛsɔ bɛɛɛdi bekyuli bani mɔɔbla kabla teete bekyuli badi lɛnɔ. Mmomu bɛdi nwuna bebi. Na ka amii lɛnɔ bɛdi nwuna bebi mɛni ni, Katɔti ɔ́bla-mii nwuna ala badine.

Tesalonikaƒuɔ 2 2:16

Na buuvele kebunku taasiku Blɔti Yesu Kristo ku bula Unwoti Katɔti kudɔ ɔni mɔɔyɔ́-bu, na úti kayi buse ku lɛnunsia úte-bu ɔ́si nwuna lɛƒɔndia ɔsu.

Tito 1:2

Ulu ɔmɛni ndanku ngba ƒui lɛnunsia lɛni bɔƒɔtaadi na bubo lɛlɔ. Na Katɔti ɔni naaanyi ɔkɔ ɔlati nése-bu kenye kamɛni úse asa na údie kayawi.

Tito 2:11

Ɔsika Katɔti údie nwuna lɛƒɔndia ɔ́tina-bu na ngba bɔƒɔ bɔni na ubo ute bekyuli bayawine ɔsu.

Tito 2:13

Lɛni na bɔdubuti butaanu ulu bute limeyi libendi lɛni lɛlɔ na bɔsia anu. Limeyi lɛmmɔ lɛlɔ na Utulone Blɔti, bula Ɔƒɔne, Yesu Kristo bukeye bɔdubɔda bɔlɛ.

Hebriƒuɔ 1:14

Na nwuna batu ƒui ama ni, ɔɔɔdi ayu ani muusié-nwu bɔtala ka beteebunku bekyuli bani na Katɔti ɔdubɔya na bakɛ bɔƒɔ na badi yoo?

Hebriƒuɔ 11:7

Uwi ɔni na Katɔti ɔ́lɛ Noa kpakplaa na ala ani na útanu tɔ lɛlɔ ni, Noa ɔ́ƒɔ ɔ́di. Anwuɔsu ɔ́nwi ɔkɔlɔ ubendi ɔni kemmo na anwu ku nwuna kaduli bekyuli béduo bákɛ bɔƒɔ na bɔyia bɔni na úti úte Katɔti ɔsu. Noa bɔƒɔtaadi bɔmɛni búnwini kɔtɔ bɔdu úte kayawi bekyuli ƒui. Na ka Noa ɔ́ƒɔ Katɔti ɔ́di ɔsu ni, Katɔti ɔ́su ka Noa ɔdi ukyuli ɔni nse siin.

Hebriƒuɔ 11:9

Ɔkɛnku bɔƒɔtaadi lɛlɔ na úlie kalɔ kani na Katɔti ɔ́su ka ɔdubute-nwu mmɔ kemmo. Na ɔ́kya mmɔ aani ɔƒɔ na kalɔ kammɔ lɛlɔ. Kevo lɛtɔ kemmo kani na ɔ́kya. Na lɛni kani na Isak ku Yakob lɛnɔ bebelie. Ama lɛnɔ badi Katɔti ala badine aani anwu Abraham kalɛ úte ala ani na Katɔti ɔ́su úse.

Hebriƒuɔ 6:17

Na ka Katɔti ɔɔwia ka bekyuli bani na úse kenye ƒui bati nwaa ka kavumana kadi kelebo nwuna linyese kemmo ɔsu ni, ɔ́kpali lɛlɔ úse kenye kammɔ.

Yakobo 2:5

Banwa, binu! Bɛgyi geen ka Katɔti ɔ́ƒuna kayawi kamɛni bawabane ka babla nwuna badi. Na ka báƒɔ Blɔti Yesu Kristo bádi ɔsu ni, bénwini kɔyu kemmo ala bakɛne. Na ama ndubuduo Katɔ Ɔga Ɔma aani kalɛ na Katɔti ɔ́su bekyuli bani mɔɔyɔ́-nwu úse.

Petro 1 3:7

Amii bagya lɛnɔ ni, bɛya ala kalɔ bunu bɔkya amii ku bina beleku ntɛ, ɔsika beeebo ɔyikun aani bina kalɛ. Biti ɔbu bite-ma, ɔsika amii ku-ma ƒui na Katɔti ɔ́su úse ka ɔdubuti ngba bɔni nsɔ naaadubo bɔsa kudii ute. Na si amii bagya bɛ́bla ɔmɛni ni, Katɔti ɔdubunu bina ƒui katɔ bɔkpali.