Romaƒuɔ 8:10 - Katɔti Ɔku Kedee

¹⁰ Ina Kristo ɔkya-mii kemmo ni, bina ɔlɔna ɔdubo bukpi na likpidi ɔsu. Nsu bina kɔyu kɔdubɔsɔ kɔkya ngba, ɔsika Katɔti ɔ́bla-mii siin.

Romaƒuɔ 8:10 ပူးပေါင်းရင်းမြစ်များ

Lewiƒuɔ Ɔda Bubo 13:40

“Si ketikɔ kápa ukyuli ɔdi ni, ukyuli ɔmmɔ útasɔ use sɛɛn, na lili kani nápa-nwu.

Yohane 14:23

Mmɔ na Yesu údie kenye ɔnini, “Ukyuli biala ɔni mɔɔyɔ́-mi ni, ɔdubɔdi mina ala ani mɔɔtina lɛlɔ. Na mina Ɔti ɔdubɔyɔ-nwu. Na ami ku mina Ɔti bɔdububo-nwu kudɔ na abu ku-nwu bɔsɔ bulie.

Yohane 15:5

“Ami ndi kɔdingyii kɔmmɔ, na amii ndi kuna kɔgba. Ukyuli ɔni nliku-mi na ami lɛnɔ nliku-nwu ni, ɔɔnwu ebi pii. Ɔsika bilakana lɛla lɛdi bɔbla si liiibo-mii kemmo.

Yohane 17:23

Ami nliku-ma, na awɔ eliku-mi. Ya na babla unwi bawɔlɔ kalɛ na kayawi bekyuli banu bati ka awɔ nátala-mi, na aayɔ́-ma kalɛ kani na aayɔ́-mi.

Yohane 4:14

Nsu ntu bɔni na ndubute ni, utukwɛ ɔsɔ ulada ukyuli ɔni mani-mu. Mmomu bɔdubunwini libiɔ lɛni mɔɔyu na bana lɛlɔ kemmo, na ɔdubute-ma ngba bɔni nsɔ naaadubo bɔsa kudii.”

Yohane 6:54

Ukyuli ɔni mɔɔdi mina ɔlɔna na ɔɔní mina ubugya ni, anwu muulie ngba bɔni nsɔ naaadubo bɔsa kudii. Na ndubɔgyila-nwu na limeyi likplodi lɛlɔ.

Yohane 6:56

Ukyuli ɔni mɔɔdi mina ɔlɔna na ɔɔní mina ubugya ni, ɔɔblaku-mi unwi, na ami lɛnɔ mɔɔblaku-nwu unwi.

Romaƒuɔ 5:12

Likpidi lɛ́sia ukyuli unwi lɛlɔ na líbo kayawi, na likpidi lɛmmɔ lɛdanku kukpi líboku kayawi. Ɔmɛni ɔsu kukpi kúbo ukyuli biala lɛlɔ. Ɔsika ukyuli biala ɔ́bla likpidi.

Romaƒuɔ 5:21

Anwuɔsu kalɛ na likpidi lɛ́ya na kukpi kɔ́di bekyuli lɛlɔ ni, lɛni kani na Katɔti lɛƒɔndia lɛdubɔya na bɔbla siin na buduo ngba bɔni nsɔ naaadubɔsa kudii lɛga bɔdi kalɔ ɔkɛnku Blɔti Yesu Kristo lɛlɔ.

Romaƒuɔ 8:11

Na si Katɔti Kɔyu kɔni nágyila Yesu ɔ́lɛku bekpine akɔ kɔkya-mii kemmo ni, anwu ɔni nágyila Kristo Yesu ɔ́lɛku bekpine akɔ mɛni ndubute bina ɔlɔna ɔni ndubukpi mɛni ngba ɔkɛnku nwuna Kɔyu kɔni nli-mii lɛlɔ kemmo ɔsu.

Korintoƒuɔ 1 15:45

Ɔsika ɔkya Bunweni Kedee Ɔku kemmo ka ni, “Ukyuli udeedi ɔni ndi Adam ni, Katɔti nédie-nwu na úte-nwu ngba aani ɔyawine.” Na Adam ukplodi ɔmɛni anwu ni, ɔdi Kɔyu kɔni muute ngba geen.

Korintoƒuɔ 2 13:5

Amii alati biduo bina lɛlɔ kemmo na bɛkɔku lɛlɔ bɛnu. Na bɛti si bɛkya bɔƒɔtaadi bɔmmɔ kemmo. Bɛɛɛgyi ka Yesu Kristo ɔkya-mii lɛlɔ kemmo? Bɛgyi nii! Ntu bɔnu na bɛ́nu bɛ́ti ka bina lɛlɔ bɔkɔku bútedu.

Korintoƒuɔ 2 4:11

Sɔsɔ na bula ngba bulie kemmo ƒui ni, bɔkya kukpi ɔgbankpi kemmo na Yesu ɔsu. Nsu ɔyikun ɔni na úte-bu na bula ɔlɔna kemmo ɔsu ni, ɔdubɔya na bekyuli banu nwuna ngba bati.

Korintoƒuɔ 2 5:21

Kristo útabla likpidi lɛdi. Nsu bula alaekpidi lili ɔsu na Katɔti úti-nwu ɔ́bla alaekpidi ɔblane. Na ɔmɛni maya na abu bani mablaku-nwu unwi ni, bɔbla siin na Katɔti anumi.

Galatiƒuɔ 2:20

Ami ku Kristo na bákana bámana ugyii lɛlɔ. Ɔsɔ ɔɔɔdi ami nli ngba, mmomu Kristo nli ngba na mina kemmo. Na ngba bɔni na nli ɔƒɛni ni, nli-mu ɔkɛnku ɔyikun ɔni na lɛ́kɛ ka lɛ́ƒɔ Katɔti Ubidi ɔmmɔ lɛ́di ɔsu. Anwu néti nwuna ngba ɔ́kpa na mina lili, ɔsika ɔɔyɔ́-mi.

Eƒesoƒuɔ 3:17

Na muuvele nnii Kristo ɔsia bina bɔƒɔtaadi lɛlɔ na ulie-mii kayi kemmo kalɛ na si bina bɔyɔ bɔni na bibo búdie litu na bɔda kalɔ kpakplaa aani kugyii kalɛ ni,

Ƒilipiƒuɔ 1:23

Mina kasusu kéƒu na ala akpa anyɔ amɛni lɛlɔ. Ndubɔyɔ si lɛ́tɔlɔ na lísie nkya Kristo kudɔ. Nka ɔmɛni ɔdia-mi utulo.

Ƒilipiƒuɔ 3:9

Na mɔɔwia ka liti mina lɛlɔ ƒui lite-nwu. Ɔmɛni ɔdubɔtina ka mina siin bɔbla útasi ami ɔlati kudɔ aani bɔni udu na bekyuli baakali ka baakɛ́ ɔkɛnku ɔda bubo lɛlɔ bɔdi kemmo, mmomu bɔkɛnku Kristo bɔƒɔtaadi kemmo. Na siin bɔbla bɔmɛni nási Katɔti kudɔ na bɔdanku bɔƒɔtaadi.

Koloseƒuɔ 1:27

Katɔti bɔyɔ ndi ka bekyuli bani naaadi Yudaƒuɔ ƒui bati lɛla libendi lɛni na ɔ́da úse-bu, na lɛ́ƒɔ kuye geen. Na ani ndi Kristo ɔni nkya-bu kayi kemmo. Na anwu ndi bula lɛnunsia ka abu lɛnɔ bubo kadikɔ na Katɔti bukeye kemmo.

Tesalonikaƒuɔ 1 4:16

Uwi ɔmmɔ kemmo ni, bɔdubunu Blɔti bubo kɔku ku kudu kubendi. Bɔdubunu Katɔti ɔtu unengudi lɛdi. Na Katɔti kakpɛɛ kadubɔku. Na Blɔti ɔlati ɔdubɔda ɔlɛ kayaa. Na bekyuli bani náƒɔ Kristo bádi asa na békpi ni, badubɔka bɔta buli ngba.

Hebriƒuɔ 12:23

Na bíbo bíbasiaku Katɔti bekyuli bani nse aani nwuna bebi bedeedi bani anyi na bénweni bése katɔ. Katɔti ɔni ndubɔtɛku bayawine ƒui litemi anumi na bíbo bínye na bekyuli babuni bani nékpi na Katɔti ɔ́bla bana ayu sɛɛn ɔ́wɔlɔ akɔ.

Hebriƒuɔ 9:27

Katɔti ɔ́lɛ ugyii úse ka ukyuli ukpi kunwi pɛ kani, na ɔmmɔ kama na ɔtɛku-nwu litemi.

Budie Taatina 14:13

Ɔmmɔ kama línu lɛdi lɛdi ka lɛ́si katɔ na lɛɛsu lɛnini, “Nweni ala amɛni. Bekyuli bani na lɛlɔ lɛdubɔyɔ-ma ndi bani ndubukpi ka básiaku Blɔti kama ɔ́si ɔƒɛni úsela ɔsu.” Na Katɔti Kɔyu kɔɔtuna kɔnini, “Ɛɛn, badubɔkɛ bɔnwuna! Na badubɔkɛ bana kabla kɔsia!”