Romaƒuɔ 5:6 - Katɔti Ɔku Kedee

⁶ Uwi ɔni na bulakana lɛlɔ bubunku ni, Kristo úbekpi na bekyuli bekpidi lili. Na ɔ́lɛ lɛni na uwi ɔni kemmo na Katɔti ɔlati ɔ́lɛ ugyii úse lɛlɔ.

Romaƒuɔ 5:6 ပူးပေါင်းရင်းမြစ်များ

Kɔgya 1:1

Katɔti ɔdubɔya na lɛlɔ lɛyɔ bekyuli bani naaabla taasiaku bekyuli bekpidi kasusu kani na baakya bekyuli lɛlɔ. Na balásiaku alaekpidi bablane ɔbladu kama. Na baládiku-ma kɔkpana na bataama anwu Katɔti lɛnɔ.

Kɔnyana Buwulo 1:6

Kalɛ na Sion uukeye ɔ́yii udu, na nwuna batɔnkune báta bábla aani bakwa bani nsɔ naaakɛ́ taadi, anwuɔsu basɔ beeebo ɔyikun na bekeli na bagbini bammɔ kudɔ.

Daniel 11:15

Na ɔmmɔ kama ni, bekpone bani nási katɔ kakɛ mmɔ badubɔka bekyuli bani nkya kada bammɔ kɔgyumanakɔ kpakplaa kɔmmɔ bakya na beƒie kadi baƒɔ. Na bekpone bakukudi bani náƒɔ lɛnyi na bagyi kekpo ala kaduɛ muedi badi balási kada kakɛ mmɔ na bakana bekpone bani nási katɔ mɛni bɔbɔku na benwini kama.

Bumomo Bɔka 7:15

na úte ɔmantɛ akɔ ɔkɔdi ku koƒonu kɔgyani ku koƒonu kɔkɔdi kɔni ndi kɔgyani na kɔ́ɔƒɔ lɛkwa linwi úte bɔkyula akpala,

Romaƒuɔ 11:26

Na ulu ɔmɛni lɛlɔ na Yudaƒuɔ ƒui badubɔkɛ bɔƒɔ aani kalɛ na Katɔti ɔ́su na Bunweni Kedee Ɔku kemmo ɔnini, “Ɔƒɔne ɔdubɔsi Sion na ɔdubo ubedie likyulikpi na Yakob kaba kemmo.

Romaƒuɔ 4:25

Katɔti úte kuƒi na bekyuli bádu Kristo ɔ́si bula ekpidi ani bɔ́bla ɔsu. Na Katɔti ɔ́gyila-nwu ɔ́lɛku bekpine akɔ kalɛ na Katɔti ɔnu ka buse siin.

Romaƒuɔ 4:5

Nsu na Katɔti kudɔ ni, ukyuli ɔni néteti anu útasia nwuna kabla lɛlɔ mmomu na úti nwuna anu ɔ́sia Katɔti lɛƒɔndia lɛlɔ ni, Katɔti ɔɔnu ukyuli ukpidi ɔmmɔ ka use siin.

Romaƒuɔ 5:10

Na si Katɔti ɔ́sɔku abu ku-nwu ntɛ ɔ́klibi ɔkɛnku ubidi kukpi lɛlɔ na uwi ɔni kemmo na nka bɔdi-nwu bekisine mmɔ ni, na uwi ɔni na abu ku-nwu ntɛ bɔdia mɛni ni, Katɔti ɔdubɔnu-bu kɔnyana utulo ƒui na bɔkɛ ngba bɔƒɔ ɔkɛnku Kristo ɔmmɔ lɛlɔ.

Romaƒuɔ 5:7

Ubo ɔkplu ka ukyuli ɔdi ukpi na ukyuli ɔni nse siin lili. Nsu ɔƒaalɛ ukyuli ɔdi ɔkana na use kayi na ukpi na ukyuli ɔbuni lili.

Romaƒuɔ 5:8

Nsu Katɔti údie ɔ́tina-bu kaduɛ kalɛ na ɔɔyɔ́-bu. Ɔsika uwi ɔni na bɔkya bula ekpidi kemmo ni, ɔ́ya na Kristo úkpi na bula lili.

Romaƒuɔ 8:32

Na si Katɔti útenye útada Ubidi mmomu úti-nwu ɔkpa na bula lili ni, bi ɔsu na ulete-bu ala ƒui ku kaƒɔ ƒaa ɔkɛnku Ubidi ɔmmɔ lɛlɔ?

Romaƒuɔ 8:34

Na ɔma ndubɔkana na ɔdu-ma kɔtɔ? Kristo Yesu ndi ukyuli ɔni nékpi, na ɔni nsɔ nsia ndi ka Katɔti ɔ́gyila-nwu ɔ́lɛku bekpine akɔ na ɔ́sɔ úbo uli ngba na ulie Katɔti kɔdianu na uuvele-nwu teete-bu.

Galatiƒuɔ 2:20

Ami ku Kristo na bákana bámana ugyii lɛlɔ. Ɔsɔ ɔɔɔdi ami nli ngba, mmomu Kristo nli ngba na mina kemmo. Na ngba bɔni na nli ɔƒɛni ni, nli-mu ɔkɛnku ɔyikun ɔni na lɛ́kɛ ka lɛ́ƒɔ Katɔti Ubidi ɔmmɔ lɛ́di ɔsu. Anwu néti nwuna ngba ɔ́kpa na mina lili, ɔsika ɔɔyɔ́-mi.

Galatiƒuɔ 4:4

Nsu ka uwi ɔni na Katɔti úse mmɔ geen údu ni, ɔ́tala Ubidi ɔ́kya-bu. Na ɔ́ya na uleku ɔdi ɔ́wɔ-nwu ɔ́kya kadi kadi akɔ na bana ɔda bubo bɔdi-nwu lɛlɔ

Eƒesoƒuɔ 5:2

Na bɛsiaku Kristo ɔbladu kama na bɛyɔ lɛlɔ aani kalɛ na ɔɔyɔ́-bu na úti lɛlɔ ɔ́kpa na bula lili aani akpala ƒɛƒɛɛ úte Katɔti. Na adi akpala ani mɔɔyɔ́ Katɔti kaƒɔ.

Koloseƒuɔ 2:13

Uwi ɔdi kemmo ni, bíkpi na kɔyu kemmo ɔ́si bina ekpidi ɔsu ku ka bátabla-mii ekpidi bukulo teedie ɔdi ɔmmɔ ɔsu. Nsu Katɔti ɔ́ya na bɔ́sɔ búnwini búbo bulie ngba ku Kristo ka úti bula ekpidi ƒui ɔ́kyiɛ-bu ɔsu.

Tesalonikaƒuɔ 1 5:9

Ɔsika Katɔti útedie-bu ɔnii nwuna kɔnyi kubo-bu lɛlɔ. Mmomu ɔnii bɔsia Blɔti Yesu Kristo lɛlɔ na bɔkɛ bɔƒɔ.

Timoteo 1 1:9

Na ɔlɛka buteenyimo lɛnɔ ka ni, ɔɔɔdi bekyuli babuni na bébo ɔda béte, mmomu batuɔkplune bani mɔɔƒiɔ́ Katɔti ɔda bubo ku bakantankpine ku bana udu bani ngba néyi ku ekpidi bɔbla. Badi bekyuli bani naaasiaku bɔƒɔtaadi bɔdi kama ku bani mɔɔdú bana bati ku beni ku bekyuli badune babambadi lɛnɔ.

Tito 2:12

Lɛƒɔndia lɛmmɔ mɔɔtina-bu ka ɔlɛka bɔda atu budie ngba bukpidi bulie kemmo ku kayawi ala keeke kama bɔsiaku. Na bɔda lɛlɔ kaduɛ, na bulie ngba bɔbuni, na bɔbla lɛlɔ kedee na kayawi kamɛni kemmo.

Hebriƒuɔ 8:3

Báƒuna ɔkpane unengudi biala ka uti ala ani na béte ku ani na badubuti bakpa ƒui ɔkpa ute Katɔti. Na lɛni kani na ɔlɛka ɔkpane ɔmɛni lɛnɔ uti lɛla lɛdi ɔkpa ute Katɔti.

Hebriƒuɔ 9:26

Si lɛni na use ni, ɔlɛka nka Yesu ɔsɔ ubebo abi ɔsia kama kɔlɛ kɔlɛ ɔ́si kayawi kalɔ kesekɔ ƒui. Nsu kalɛ na use ni, kunwi pɛ kani na úbo kayawi kamɛni kemmo úbedie-bu na ekpidi ƒui kemmo ku nwuna ubugya ɔni na úti ɔ́kpa na bula lili. Na ɔdanku uwi ƒui utédu kayawi kawɔlɔkɔ.

Petro 1 1:20

Katɔti ɔ́ƒuna Kristo úse asa na údie kayawi. Na amii ɔsu na Katɔti údie-nwu keyi na uwi ukplodi ɔmɛni kemmo.

Petro 2 3:7

Na litemi lɛni lɛlɔ na ɔkɛ údie katɔ ku kalɔ ƒui ni, litemi lɛmmɔ kani na úti ɔda kayawi kammɔ use ute uwi ɔni na ɔdubɔkyula-ka ku ogya. Na Katɔti ɔ́bla lɛni úse úte limeyi lɛni na ɔdubɔtɛku bekyuli bekpidi litemi na ɔkyula-ma.

Yuda 1:15

Bébo banii babatɛku bekyuli ƒui litemi. Na bekyuli bani ƒui na balábla Katɔti lɛƒɔyɔ ku ala ani ƒui na bábla ka baláyia Katɔti ɔsu ni, bátɛmi enyekpi na nwuna lɛlɔ. Anwuɔsu Katɔti ɔ́ni-ma kɔtu.”

Yuda 1:18

Básu banini, “Emeyi ekplodi ammɔ kemmo ni, bekyuli badubo-mii buti bɔbla lɛmala na ala ani baasu taasiku-mii lɛlɔ ɔsu. Na basiaku bana udunkpi ala ani na Katɔti ulayɔ kama.”

Yuda 1:4

Bekyuli bekpidi bani naaayia Katɔti bábɛ béduo-mii akɔ. Na Katɔti ɔ́lɛ ugyii úse ɔ́si kukuuku ƒui ka ɔdubɔdu-ma kɔtɔ na ɔyila-ma udu. Badi bekyuli bekpidi bani nákɛ kasiakɔ na bánu kalɛ na Katɔti ubo lɛƒɔndia úte-bu, na bátu ala bénwini kalɛ na bakɛ kuƒi bataabla bana lɛyalɛ ku likyulikpi ala na béni bula ɔga unengudi ƒui ɔni kani ndi Blɔti Yesu Kristo.