Romaƒuɔ 1:1 - Katɔti Ɔku Kedee

¹ Ami Paulo, ɔni ndi Yesu Kristo kabla ɔblane na ndi ɔtalane ɔni na Katɔti ɔ́ƒuna ka lɛkɔ-nwu litemi buni lɛsa ni, ami muunweni ɔku ɔmɛni.

Romaƒuɔ 1:1 ပူးပေါင်းရင်းမြစ်များ

Ala Alɛdi 1 23:13

Na Amram ɔmɛni náwɔ Aaron ku Mose. Na Aaron ku nwuna kaba kemmo bebi na báƒuna ka bataanu kakpakɔ ala kedee ammɔ lɛlɔ. Na bataabla Unwoti kabla na akpala bɔkyula kemmo na ama ndubo buteete bekyuli kusɛ kusɛ na Unwoti lɛnyi kemmo.

Yesaia 49:1

Ukyuli biala use kɔtu na unu, amii ɔgyu kadi bamba bekyuli ƒui bani nkya ɛpu ɔvi. Unwoti ɔ́ƒuna-mi na ɔ́sia-mi lɛnyi asa na báwɔ-mi.

Yeremia 1:5

“Yeremia, asa na ndubɔvɔ-ɔ lɛkya kaƒɔ kemmo na bawɔ-ɔ ni, lɛ́ƒuna-a líse ka ebo ebenwini kenye udiene ete kadi bekyuli ƒui.”

Marko 1:14

Uwi ɔni na béƒie Yohane ɔni mɔɔbla ntu bɔkpila ɔdi bákya ɔtɔ ni, Yesu ɔ́tɔlɔ úsie Galilea na útásu Katɔti litemi buni mmɔ.

Yohane 12:26

Ukyuli biala ɔni mɔɔwia ka ɔbla-mi kabla ni, ɔdi ka ɔsiaku-mi. Na kesii kani na nlie ni, mmɔ na mina kabla ɔblane ɔmmɔ lɛnɔ welie. Na ukyuli biala ɔni mɔɔbla-mi kabla ni, mina Ɔti ɔdubute-nwu ɔbu.

Yohane 15:15

Nsɔ naaalɔ-mii mina kabla bablane ɔƒɛni, ɔsika ukyuli ɔni mɔɔbla ukyuli bamba kabla ni, ɔɔɔgyi lɛla lɛni na nwuna unwoti ɔɔbla. Mmomu mɔɔlɔ-mii nnii bakpana. Ɔsika lɛla biala na línu lɛ́siku mina Ɔti kudɔ ni, ani na lɛ́su-mii.

Yohane 15:20

Binyimo ka lɛ́su-mii nnii, ‘Ukyuli ɔni mɔɔbla ukyuli bamba kabla ni, uletulo nwuna unwoti.’ Si bekyuli békpoku-mi ni, bɛti ka badubo amii lɛnɔ bukpoku. Si bádi ala ani na lɛ́tina-ma lɛlɔ ni, badubɔdi amii adi lɛnɔ lɛlɔ.

Batalane Kabla 13:9

Nsu Saulo ɔni lɛnɔ baalɔ banii Paulo ni, ɔ́nu uvone ɔmɛni ku livoƒi, na údie lɛdi ɔ́kya-nwu ku Katɔti Kɔyu ɔyikun ɔnini, “Awɔ Satan ubidi, éyi ku katɔlɔ ku lɛkwɛnkpi, na ekisi lɛbuni bɔbla, na aatu Blɔti litemi teenwini. Adubɔnuku-ni!

Batalane Kabla 20:24

Nsu ɔmmɔ ɔɔɔdi-mi lɛla lɛdi. Ɔsika si ńtakana na lɛbla lɛla lɛni na Blɔti Yesu ɔ́tala-mi ɔnii mbabla ni, mina ngba buuubo-mi kɔsia kɔdi. Lɛla lɛni na Yesu ɔ́tala-mi ɔnii mbabla ndi ka lɛsu bekyuli Blɔti litemi buni ku kalɛ na Katɔti ɔɔnu-bu kɔnyana.

Batalane Kabla 21:40

Amu na unengu ɔmɛni ɔ́tuna ɔnii Paulo ɔtɛmiku-ma. Na Paulo úbenye kayakun ubili kakɔkɔ mmɔ na ɔ́kɔliku kɔnu katɔ na ɔ́bala bekyuli lisu lɛmɛni. Na ka báda lɛsɛ báya ni, útemi úte-ma na Yudaƒuɔ butemi kemmo ɔnini,

Batalane Kabla 22:21

“Nsu Blɔti ɔ́su-mi ɔnini, ‘Ta, na eteesie ɔgyu kakaaka na kesii kani mɔɔtala-a na bekyuli bani naaadi Yudaƒuɔ akɔ!’ ”

Batalane Kabla 22:7

Amu na líbuli lɛ́tɛ kalɔ na línu ka lɛdi lɛdi lɛɛsu-mi lɛnini, ‘Saulo, Saulo, bi ɔsu na eekpóku-mi lɛni?’

Batalane Kabla 26:1

Amu na Agripa ɔ́su Paulo ɔnini, “Kuƒi kɔtɛ ka ataasu ƒula litemi.” Anwuɔsu Paulo ɔ́gya enu na ɔ́tɛmi údie lɛlɔ ɔnini,

Batalane Kabla 26:14

Mmɔ ka bula ƒui búbuli ni, línu lɛdi lɛdi ka lɛɛtɛmi na Hebri lɛdi kemmo taasu lɛnini, ‘Saulo, Saulo, bi ɔsu na eekpóku-mi lɛni? Si aata liyu ni, ƒula lɛlɔ kani na aadú.’

Batalane Kabla 27:23

Ɔsika kamaadi usien ni, Katɔti ɔni mbo-mi na anwu na mɔɔkpá ni, nwuna ɔtu ɔdi úbenye-mi kudɔ.

Batalane Kabla 9:15

Nsu Blɔti ɔ́su-nwu ɔnini, “Teesie, na atábla kalɛ na lɛ́su-ɔ. Ɔsika ami lɛ́ɛƒuna Saulo aani mina ukyuli ɔni meti mina litemi buni lɛmɛni mesienku ama bani naaadi Israelƒuɔ ku baga anumi ku Israelƒuɔ ƒui kudɔ.

Romaƒuɔ 1:16

Litemi buni lɛmmɔ lilekpo-mi kɔƒa, ɔsika lɛdi Katɔti ɔyikun ɔni mɔɔyá na ukyuli biala ɔni mɔɔƒɔ́ taadi ɔɔkɛ́ ngba bɔƒɔ. Na Yudaƒuɔ ndi bedeedi bani ndubunu asa na bani naaadi Yudaƒuɔ basia.

Romaƒuɔ 1:5

Na ɔkɛnku Kristo lɛlɔ ni, Katɔti ɔ́nu-bu kɔnyana na úti-bu ɔ́bla batalane úte Kristo kalɛ na bɔya na kadi ƒui bekyuli baƒɔ badi na babla nwuna lɛyɔla.

Romaƒuɔ 1:9

Katɔti ɔni kabla na mɔɔbla ku mina kayi ƒui na litemi buni lɛni lɛsa mɔɔkɔ́ ɔkɛnku ubidi lɛlɔ ni, ani ndubudie-mi kenye ɔ́si kalɛ na naaayiƒala-mii uwi biala kemmo si mɔɔkpali katɔ.

Romaƒuɔ 11:13

Na amii bani naaadi Yudaƒuɔ ni, mɔɔsu-mii nnii uwi ɔni kemmo na ami ndi ɔtalane nte-mii mɛni ni, muubo mina kabla kudu.

Romaƒuɔ 15:16

Ɔsika ɔ́bla-mi ɔnii nnwini Kristo kabla ɔblane nte bekyuli bani naaadi Yudaƒuɔ. Na mɔɔbla ɔkpane kabla kani ndi ka lɛkɔ Katɔti litemi buni lɛmmɔ lɛsa lite bekyuli bani naaadi Yudaƒuɔ kalɛ na lɛkpanku-ma liboku Katɔti aani akpala ani Katɔti Kɔyu kɔ́bla kedee na adubɔƒɔ Katɔti anu.

Romaƒuɔ 15:29

Ngyi ka ɔni na ndubo-mii kudɔ ni, ndanku Kristo kusɛ kusɛ ƒui ndububoku-mii.

Romaƒuɔ 16:18

Ɔsika bekyuli bammɔ udu ni, balábla Blɔti Yesu Kristo kabla. Mmomu ama alati bana ayɔla na baabla. Na bada kenye emini atɛ ku katɔlɔ beeƒú bekyuli bani naaagyi lɛla lɛdi kasusu.

Romaƒuɔ 16:25

Na ɔƒaani ni, bɛya bumwi Katɔti. Anwu ndubɔkana na ɔda-mii na binye kpakplaa aani kalɛ na mɔɔsu na litemi buni lɛni kudu na muubó kemmo ɔkɛnku Yesu Kristo lɛlɔ. Litemi buni lɛmɛni nkɛnku ala abɛdi ani na Katɔti údie keyi na ábɛ-bu na akwa pii ani návi kemmo.

Korintoƒuɔ 1 1:1

Ami Paulo ɔni nkɛnku Katɔti lɛƒɔyɔ lɛlɔ ɔsu na ndi Yesu Kristo ɔtalane ku bula ɔnwa Sostene muunweni-mii ɔku ɔmɛni.

Korintoƒuɔ 1 9:1

Bɛɛbu bɛnii liiibo kuƒi na lɛbla lɛla lɛni mɔɔyɔ́? Munuu lɛɛɛdi ɔtalane na ńtanu Blɔti Yesu? Na ɔɔɔdi amii ndi mina ebi ani na lɛ́nwu na mina kabla kani na lɛ́bla líte Blɔti kemmo?

Korintoƒuɔ 2 1:1

Ami Paulo ɔni nkɛnku Katɔti lɛƒɔyɔ lɛlɔ na ndi Blɔti Yesu Kristo ɔtalane ni, ami ku Ɔnwa Timoteo muunweni ɔku ɔmɛni bute amii Korintoƒuɔ bani néti lɛlɔ bíte Katɔti ku bekyuli bani ƒui mɔɔbla Katɔti kabla na Akaia kalɛkɛ lɛlɔ mmɔ.

Korintoƒuɔ 2 11:5

Nsu lɛ́ƒɔ lɛ́di ka lɛ́ƒɔ kuye ntulo bekyuli bani na biigyingya enu taaƒɔ aani si badi batalane babuni sɔsɔ.

Korintoƒuɔ 2 11:7

Uwi ɔni na lɛ́ka litemi buni lɛmmɔ lɛsa bɔkɔ bute-mii ni, ńtakya-mii kayu kadi. Mmomu líboku lɛlɔ kalɔ kalɛ na lɛtalaku-mii katɔ. Na ɔni na lɛ́bla ɔmɛni ɔsu na lɛ́bla likpidi lɛdi?

Korintoƒuɔ 2 12:11

Mɔɔsu ala aani ɔdɔlɔdi kalɛ, nsu amii náya na úbo úte lɛni. Ɔsika amii na ɔlɛka nka bimwi-mi. Ina lɛɛɛdi lɛla lɛdi muedi ni, ńtasɔ na ulu biala lɛlɔ ku bekyuli bani mɔɔnu lɛlɔ aani batalane babuni.

Korintoƒuɔ 2 2:12

Uwi ɔni na líbo ḿbakɔ Kristo litemi buni lɛmmɔ lɛsa na Troia ni, Blɔti ɔ́lɛmi kuƒi ka lɛbla nwuna kabla na mmɔ.

Korintoƒuɔ 2 4:5

Bulakɔ abu alati lɛlɔ lɛsa teete-mii, mmomu Yesu Kristo lɛlɔ lɛsa na bɔɔkɔ́ teete-mii ka ɔdi Blɔti. Na abu bɔdi kabla bablane bute-mii na Kristo ɔsu.

Galatiƒuɔ 1:1

Ami Paulo ɔni ndi Kristo ɔtalane ni, mina bɔlɔ bútasi bekyuli kudɔ iye ɔɔɔdi ukyuli ɔdi náƒuna-mi. Mmomu mina bɔlɔ bɔ́si Yesu Kristo ku Katɔti ɔni nágyila Yesu ɔmmɔ ɔ́lɛku bekpine akɔ kudɔ.

Eƒesoƒuɔ 1:1

Ami, Paulo ɔni nkɛnku Katɔti lɛƒɔyɔ lɛlɔ ɔsu na ndi Kristo Yesu ɔtalane ni, ami muunweni ɔku ɔmɛni lite amii Katɔti baƒɔtaadine bani nkya Eƒeso na bɛ́blaku Kristo unwi na bɛɛdi nwuna etemila lɛlɔ.

Eƒesoƒuɔ 1:13

Lɛni kani na béti amii lɛnɔ bébunku Kristo badi akɔ ɔkɛnku litemi geen lɛni na bɛ́ƒɔ bɛ́di ɔsu. Na litemi buni lɛmmɔ néti ngba bɔƒɔ búboku-mii. Na ka bɛ́ƒɔ Kristo bɛ́di ɔsu ni, Katɔti úti nwuna Kɔyu kɔni na ɔ́su úse ka wete-bu mmɔ úse-bu likpo.

Eƒesoƒuɔ 4:11

Anwu néti etela úte bekyuli na údie badi ka babla batalane, na badi lɛnɔ badi kenye bediene, na badi lɛnɔ badi lɛsa bakɔne, na badi lɛnɔ badi baƒɔtaadine lɛlɔ banune ku ala batinane.

Lɛkpa Ulu 10:8

Na uwi ɔni na líti atabi ammɔ lɛ́yulaku kɔbi ḿbakya Bunyimi Adaka ɔmmɔ kemmo ni, Unwoti údie Lewi kɔdua bekyuli ka ama nteeti adaka ɔmmɔ. Na bénwini Unwoti Bakpane. Na ama ndubo kusɛ kusɛ buteeti teete Israelƒuɔ na Unwoti lɛnyi kemmo. Na bataabla-nwu kabla aani kalɛ na use ɔmwi.

Ƒilipiƒuɔ 1:1

Ami, Paulo ku Timoteo bani ndi Kristo Yesu kabla bablane ni, abu nénweni ɔku ɔmɛni. Na búti buute amii Kristo Yesu badi ƒui ku baƒɔtaadine lɛkpa batɔnkune ku bebunkune bani ƒui nkya Ƒilipi.

Ƒilipiƒuɔ 2:11

Na ukyuli biala ɔdubudie kenye ɔnii Yesu Kristo ndi Blɔti. Na beti bumwi bete Unwoti Katɔti.

Koloseƒuɔ 1:1

Ami Paulo ɔni nkɛnku Katɔti lɛƒɔyɔ lɛlɔ ɔsu na ndi Yesu Kristo ɔtalane ni, ami ku bula ɔnwa Timoteo muunweni ɔku ɔmɛni.

Koloseƒuɔ 1:25

Baƒɔtaadine lɛkpa lɛmmɔ ɔsu na ḿbenwini Katɔti kabla ɔblane na kabla kani na úte-mi kenye, kalɛ na lɛkɔ litemi buni lɛmmɔ ƒui lɛsa lite-mii nwaa.

Tesalonikaƒuɔ 1 2:2

Na bɛgyi kalɛ na búbo abi na béwi-bu anumi kalɔ na Ƒilipi asa na búbedu bina kudɔ na Tesalonika mɛni. Nsu ina ka békpoku-bu mɛni lɛnɔ ni, Blɔti ɔ́kya-bu ɔkplu na bɔ́su-mii nwuna litemi buni.

Tesalonikaƒuɔ 1 2:8

Ka bɔɔyɔ́-mii ku kaƒɔ nwaa ɔsu ni, bɔɔwia ka amii lɛnɔ binu litemi buni lɛmɛni. Na ɔɔɔdi Katɔti litemi buni lɛmmɔ lɛti. Mmomu búti bula ngba lɛnɔ bɔ́kpa na bina lili, ɔsika bɛ́ƒɔ-bu kuye geen.

Tesalonikaƒuɔ 1 2:9

Banwa binyimo ka uwi ɔni na bɔ́kya-mii kudɔ na bɔ́su-mii litemi buni lɛmɛni ni, búni ewulu usien ku ɔƒɛ na bɔ́bla kabla na bútenwini etila bútasia-mii lɛlɔ.

Timoteo 1 1:1

Ami Paulo ɔni ndi Yesu Kristo ɔtalane ɔkɛ bula Ɔƒɔne Katɔti ku Kristo Yesu ɔni lɛlɔ na bɔsia anu na muunweni ɔmɛni.

Timoteo 1 2:7

Na ɔmɛni ɔsu na Katɔti ɔ́bla-mi lɛsa ɔkɔne ku ɔtalane. Na ɔɔɔdi ɔkɔ na mɔɔnyi. Mɔɔsu-mii geen nnii údie-mi aani ala ɔtinane ɔnii mbedie bɔƒɔtaadi kenye ntina bekyuli bani naaadi Yudaƒuɔ.

Timoteo 2 1:11

Katɔti úti-mi ɔ́bla lɛsa ɔkɔne ku ɔtalane ku nwuna litemi buni lɛmɛni ala ɔtinane.

Tito 1:1

Ami Paulo ɔni ndi Katɔti kabla ɔblane ku Yesu Kristo ɔtalane ni, ami muunweni-ɔ ɔku ɔmɛni. Katɔti ɔ́ƒuna-mi na ɔ́tala-mi ɔnii mbunku nwuna bekyuli baƒunadi bɔƒɔtaadi na lɛtɔnku-ma na banu litemi geen lɛni na bula bɔƒɔtaadi ulu ɔɔtina bati.

Hebriƒuɔ 5:4

Ukyuli ɔdi ulakana ɔkpane unengudi kenyekɔ kamɛni bɔƒuna bute lɛlɔ. Mmomu ɔdi ka Katɔti náƒuna-nwu aani kalɛ na ɔ́ƒuna Aaron.

Hebriƒuɔ 7:26

Ɔmɛni ɔsu ni, Yesu ɔmɛni ndi ɔkpane unengudi ɔni kani ndubɔbla lɛla lɛni na bɔɔwia ute-bu. Na use kedee, na lɛla lɛdi lɛɛɛda-nwu. Use sɛɛn na Katɔti údie-nwu ɔ́lɛku alaekpidi bablane akɔ, na ɔ́kɔliku-nwu útése sɛsɛɛ na katɔ kakaaka ƒui.

Yakobo 1:1

Ami Yakobo ɔni ndi Katɔti ku Blɔti Yesu Kristo kabla ɔblane muugyele amii Katɔti bekyuli ƒui bani négyingya bakya kayawi ekpo ekpo ƒui.

Petro 1 4:17

Litemi bɔtɛ limeyi lɛmmɔ líide, na Katɔti ɔdubɔka nwuna bekyuli litemi bɔtɛku. Na si abu nwuna bekyuli lɛlɔ na wese kalɔ lɛni ni, dɛ na ɔdubɔwɔlɔku bekyuli bani na bétemonku nwuna litemi buni lɛmmɔ bɔƒɔ bɔdi.

Petro 2 1:1

Ami Simon Petro ɔni ndi Yesu Kristo kabla ɔblane ku ɔtalane ni, ami muunweni ɔku ɔmɛni lite amii baƒɔtaadine ƒui bani na abu ku-mii ƒui bɔdi benwi ku Katɔti. Na ɔ́ya na bula ƒui bɔ́ƒɔ bula Ɔti ku Ɔƒɔne Yesu Kristo ɔni nse siin bɔ́di.

Yuda 1:1

Ami Yuda ɔni ndi Yesu Kristo kabla ɔblane na ndi Yakobo ɔnwani ni, muunweni ɔku ɔmɛni lite amii bani nénu Katɔti bɔlɔ. Na ka bɛ́siaku-nwu ɔsu ni, ɔɔyɔ́-mii. Na Blɔti Yesu Kristo lɛnɔ ɔɔgyumana-mii geen.

Budie Taatina 1:1

Ɔku ɔmɛni ndi ala ani na Katɔti údie ɔ́tina nwuna kabla bablane ɔkɛnku Yesu Kristo lɛlɔ ka adubo bɔlɛ na uwi klukui kemmo. Báti ɔmɛni ɔkɛnku Katɔti ɔtu ɔni na Kristo ɔ́tala ɔ́kya nwuna kabla ɔblane Yohane na ala ani na údie ɔ́tina-nwu kemmo.

Budie Taatina 22:6

Amu na Katɔti ɔtu ɔmmɔ ɔ́su-mi ɔnini, “Etemila amɛni adi ukyuli kama kekpokɔ na adi etemila geen. Na Unwoti Katɔti ɔni muuti nwuna Kɔyu teete nwuna kenye bediene ni, anwu nátala nwuna ɔtu ɔnii ubatina nwuna kabla ɔblane ala ani ndubo abalɛ na uwi klukui kemmo.”

Budie Taatina 22:9

Nsu ɔ́su-mi ɔnini, “Tabla lɛni! Ami lɛnɔ kabla ɔblane ɔkpana na ndi aani ƒula kalɛ ku ƒula banwa kenye bediene babambadi ku bakladi bani mɔɔda etemila ani nkya ɔku ɔmɛni kemmo ƒui kaduɛ. Katɔti kani na ɔlɛka emwi lɛni!”