Nliku-ɔ na ndubɔsia-a anu kesii biala na aaví. Na ndubɔsɔku-ɔ liboku kalɔ kamɛni lɛlɔ. Lɛɛɛdubo-ɔ bɔnyonu buse uwi ɔdi wetédu ka lɛ́bla lɛla lɛni kenye na líse-ɔ ka mabla.”
Anwuɔsu muuvele-ɔ nnii te mina kaduli bekyuli kusɛ kusɛ. Na ulu ɔmmɔ lɛlɔ kani na adubuti ada-ma na ataanu-ma lɛlɔ uwi ƒui. Ɔsika lɛni na awɔ Unwoti Ɔbune ásu kpakplaa ése. Na si ábla ɔmɛni sɔsɔ ni, na adubute mina kaduli bekyuli kusɛ kusɛ ɔmmɔ geen úsela uwi ƒui!”
Lɛ́ƒuna-a ka eti ala bɔbla ulu siin lɛlɔ eboku bekyuli akɔ. Na anwuɔsu na nnye-ɔ kudɔ. Lɛ́ƒuna-a na lɛ́tala-a ka enwini bukeye ku mina bunyimi kenye kani na líse ete kayawi kadi bekyuli.
“Unwoti Katɔti, ƒula kabla ɔblane na ndi. Nu-mi buvele ku kɔtɔ kɔni na muukpi-ɔ, na enwini anu ƒula kakpakɔ kani na bábwɛ béwi kalɔ, na aya na bɔsɔ bɔtalaku-ka, na ƒula lɛnyi likeye.
Na ɔƒɛni ni, lɛ́tɔlɔ ndubo-ɔ kudɔ. Na nsɔ lɛɛɛkya kayawi kamɛni kemmo. Nsu ama bamu bakya kayawi. Ati Kedee, gyumana-ma ɔkɛnku ɔyikun ala ani mɔɔlɛ́ si bákpali-ɔ lɛnyi. Na lɛnyi lɛmmɔ kani na éti éte-mi. Ɔmɛni ndubɔya na babla unwi aani kalɛ na ami ku awɔ bɔdi benwi.
Na si enye aagyá Katɔti enu na ƒula kɔyu kemmo kani ni, dɛ na wabla asa na ukyuli ɔni nkya-a kudɔ unu lɛla lɛni na aasu asa na wasu ɔnii ƒula katɔ bɔkpali bɔsia lɛni aani kalɛ na aagyá Katɔti enu ka ulenu lɛla lɛni geen na aasu mmɔ kalɔ?
Na buuvele Katɔti ɔni muute-bu keyi buɛɛ bɔnii ɔbla-mii kedee na ulu biala lɛlɔ. Na ɔgyumana bina kɔyu ku kasusu ku ɔlɔna ƒui kalɛ na bɛlɛ kɔtɔ bɔdu kemmo uwi ɔni na Blɔti Yesu Kristo wasɔ webo.
Na anwu ɔni ndubɔkana na uƒie-mii ɔda na bilebuli ni, ɔdubɔkana na ɔbla-mii kedee lɛnɔ. Na lɛlɔ lɛyɔ-mii na ɔya na bɛkana na binye nwuna anumi ani muukeye lɛtɔtɔ na bilásɔ.
Na uwi útetu asa na Boas ɔlati ɔ́si Betlehem na ɔ́da ɔ́lɛ kemo mmɔ. Na ɔ́kya kabla bablane bammɔ kenye ɔnini, “Blɔti ulieku-mii.” Na kabla bablane bammɔ lɛnɔ bédie kenye banini, “Blɔti ute-ɔ kusɛ kusɛ.”
