Nehemia 10:34 - Katɔti Ɔku Kedee

³⁴ Na abu ku bakpane ku Lewiƒuɔ bɔdubutaatu egulabi teenwini lɛkwa biala teeti taawia kaba kani ɔlɛka bawia ekyweni ani badubuti bɔbla bɔkyula akpala teeti teete bula Unwoti Katɔti aani kalɛ na ɔda bubo bɔmmɔ bɔɔsu.

Nehemia 10:34 ပူးပေါင်းရင်းမြစ်များ

Ala Alɛdi 1 24:5

Ɔƒɛni ni, kakpakɔ benengu ku bakpane bammɔ alati ƒui bakya atɔƒi anyɔ ammɔ kemmo, nsu ɔdi bele kabla kammɔ na anumi bɔnu bɔbla lɛla lɛdi bulakya-nwu kemmo. Anwuɔsu Dawid úvele Unwoti na ɔtina-nwu lɛla lɛni na wabla.

Ala Alɛdi 1 24:7

Anwuɔsu bakpane lisu biala baadi bana lɛtɔƒi unengu lɛnyi. Na kalɛ na béle kabla kammɔ atɔ asia ndi kalɛ na ɔdubo mɛni. Yehoiarib asa na Yedaia asa na Harim asa na Seorim asa na Malkiya asa na Miyamin asa na Hakos asa na Abiya asa na Yesua asa na Sekania asa na Eliasib asa na Yakim asa na Hupa asa na Yesebeab asa na Bilga asa na Imer asa na Hesir asa na Hapises asa na Petahia asa na Yeheskel sa na Yakin asa na Gamul asa na Delaia asa na Maasia.

Ala Alɛdi 2 2:3

Ɔmmɔ kama ni, Salomo ɔ́sia Hiram ɔni ndi Tiroƒuɔ ɔga kenye ɔnini, “Uwi ɔni na mina ɔti Dawid ɔɔtú nwuna ɔga kesii na akwa adi kama mɛni ni, awɔ na ɔ́ya na éboku-nwu ligyigba lɛbuni kpakplaa lɛni kabla na ɔ́bla. Adubɔsɔ akana na ete-mi lɛdi ɔƒɛni?

Esra 3:5

Ɔmmɔ kama ni, bábla bɔkyula akpala ku kɔbuli kɔwɔdi akpala ku akpala ani na ese ete Unwoti emeyi bɔdi. Na básɔ bábla akpala bamba ani ndi kaƒɔ ƒaa etela ani na bekyuli bammɔ béboku.

Nehemia 11:1

Batɔnkune bammɔ bétélie Yerusalem, na bekyuli bammɔ bátu egulabi bánu na bédie kaduli kenwi bekyuli bálɛku kɔduli leevu kemmo, na bétélie Yerusalem ɔma kedee ɔmmɔ kemmo. Na bekyuli bakladi bétélie lɛma lɛkladi kemmo.

Nehemia 13:31

Na lɛ́ya béyi kugyiikɛ kɔni beeti taakyula akpala na béti béboku nwuna uwi lɛlɔ. Na básɔ béyi bana edula ebi edeedi ani na báƒɛ ku adingyii ebi edeedi ani béde na béti béboku bábabla akpala na uwi lɛlɔ. Amu na lívele Katɔti ka unyimo-mi na nwuna kɔnyana bɔnu kemmo.

Agba 18:18

Baakana na baatu egulabi taanu na bayikune inyɔ bani mɔɔkya unyeƒi ɔdi lɛlɔ na unyeƒi ɔsa.

Yesaia 40:16

Lebanon egyii ƒui étedu ka basala-nya ogya babla lɛkpa. Na bebuo bani nkya Lebanon abi lɛlɔ mmɔ ƒui bétedu ka beti-ma bakyula babla akpala bete Unwoti.

Lewiƒuɔ Ɔda Bubo 24:5

“Ti akyami leevu-inyɔ ɔni na ana ƒui ese unwi na eti ɔlaaƒɔ na anwu bodobodo akya-nya kemmo na eƒi.

Lewiƒuɔ Ɔda Bubo 24:6

Na eti bodobodo atásia ala kasiakɔ kani béti sika ugyiedi bakwa-nwu lɛlɔ. Na atɛ-nwu ɔgaala inyɔ na ɔgaala biala ɔbla ɛku.

Bumomo Bɔka 28:2

“Bo ɔda te Israelƒuɔ anini, ‘Bitaabla akpala teete-mi na uwi ɔni líse-mii lɛlɔ limeyi ndi limeyi. Na akpala ammɔ uyɔ ɔnyi ƒɛƒɛɛ ɔyɔ-mi kaƒɔ.’

Batalane Kabla 1:26

Na ka bátu egulabi bánu na nkyuli inyɔ bamɛni lɛlɔ ni, Matia ɔdi nénwini úwi na béti-nwu bébunku nkyuli leevu-unwi bammɔ.

Yosua 9:27

Nsu ɔ́ya na Gibeonƒuɔ bammɔ bénwini Israelƒuɔ kabla bablane na baayɔ́ ekyweni na beesié ketu teete-ma ku kesii biala na Katɔti ɔsia kɔnu ka bataakpa-nwu. Ɔmmɔ ndi-ma kabla úti úbedu ɔmwi.