Mika 7:18 - Katɔti Ɔku Kedee

¹⁸ Unwoti Katɔti, beleti baƒiɔ badi balákɔku-ɔ, ɔsika eeti likpidi taakyiɛ abu ƒula bekyuli baƒunadi ɛlɛɛ bani nébu, na eléti kɔnyi taakya-bu uwi ƒui, mmomu aayɔ́-bu uwi ndi uwi.

Mika 7:18 ပူးပေါင်းရင်းမြစ်များ

Ala Kalɔ Buse 4:7

Si ábla lɛla lɛni na mɔɔyɔ́ ni, nka ƒula kayi kemmo kadubɔbla ƒaa. Nsu likpidi lɛɛtú-ɔ na lɛɛyɔ́ ka lɛdi-ɔ lɛlɔ. Anwuɔsu nye kagyumana na adi likpidi lɛmmɔ lɛlɔ.”

Baga 1 8:23

na ɔ́kpali Katɔti ɔ́su ɔnini, “O Unwoti, Israel Katɔti, benwoti biala beeese aani ƒula kalɛ na katɔ iye kalɔ. Aadi ƒula bunyimi bɔni na ényimi ku ƒula bekyuli lɛlɔ, na aayɔ́-ma uwi ndi uwi. Ama bani nénu kalɔ basiaku-ɔ kama siin baadi ƒula litemi lɛlɔ ku bana kayi ƒui.

Ala Alɛdi 2 30:9

“Na bekisine bani néƒie bina lɛlɔ bekyuli badi bátɔlɔku ni, badubɔya na basɔ benwini bebo ɔma. Unwoti Katɔti ubo lɛƒɔndia na ɔɔnu kɔnyana. Na si bínwini bíbo-nwu kudɔ ni, ɔsɔ ɔɔɔdubo nwuna kama bunwini bɔkya-mii kudii.”

Ala Alɛdi 2 6:21

Ƒula kabla ɔblane na ndi na Israel kadi bekyuli bammɔ ƒui awɔ mbo-ma. Anwuɔsu uwi biala na bekyuli bamɛni akɔ ɔdi únwini ɔ́nu kakpakɔ kamɛni na ɔ́kpali-ɔ ni, na enu-nwu bɔkpali asiku katɔ kesii kani na eli mmɔ na eti bula alaekpidi akyiɛ-bu.

Nehemia 9:17

Na béni ka benyimo ƒula akɔla lidu lidu ani na édie átina na bana akɔ. Na bana atuɔkplu ku bɔta bunye kemmo ni, bédie ɔtɔnkune ɔni nsɔ makpanku-ma matákya bana lɛbibo kabla kemmo. Nsu awɔ Katɔti aanu kɔnyana, na éyi ku bɔyɔ ku lɛƒɔndia, na éti bana ekpidi akyiɛ-ma. Ɔmmɔ ɔsu étenwini kama átakya-ma.

Kɔgya 103:13

Kalɛ na bebi lɛlɔ lɛɛbla bana bawɔne kɔnyana ni, lɛni na Unwoti lɛnɔ bekyuli bani mɔɔyia-nwu lɛlɔ lɛɛbla-nwu kɔnyana.

Kɔgya 130:4

Nsu ni, awɔ muuti alaekpidi taakyiɛ-bu, anwuɔsu na ɔlɛka bɔyia-a na bɔbu-ɔ.

Kɔgya 35:10

Na ndubɔsu ku mina kayi ƒui nnini, “Ukyuli ɔdi uuuse aani Unwoti kalɛ.” Ɔsika anwu muudie bekyuli bani nse kpɛtɛ kpɛtɛ taalɛku bayikune bani ntulo-ma enu kemmo. Na uudie bawabane taalɛku bayikune bani ntulo-ma na baanya-ma taakya enu kemmo.

Kɔgya 65:3

Na si uwi ɔni na bula alaekpidi aayu-bu unu taagya ni, awɔ muuti-nya taakyie-bu.

Kɔgya 65:4

Lɛlɔ lɛdubɔyɔ bekyuli bani na awɔ ɔlati áƒuna ka bebelie-ɔ kudɔ na ƒula kakpakɔ kedee kaduli. Na badubɔkɛ ebiti geen na ƒula kudɔ bulie kemmo na mmɔ.

Kɔgya 71:19

Na banu bati kalɛ na ébomo na ese siin aani kalɛ na baanu ka kayaa kébomo kalɛ. Ábla ala ebendi, na ɔdi ɔsɔ uuubo ƒula kalɛ.

Kɔgya 86:15

Nsu awɔ ni, Katɔti ɔni mɔɔnu kɔnyana na aayɔ́-bu geen na adi. Eléti kɔnyi buti buti mmomu aayɔ́-bu uwi ndi uwi na alalɛ ƒula litemi kama lɛnɔ.

Kɔgya 86:5

Aabla-bu lɛƒɔndia, na eeti ekpidi taakyiɛ na bani ƒui mɔɔkpali-ɔ ni, aayɔ́-ma uwi ndi uwi geen.

Kɔgya 89:6

Ɔsika kayaa ɔyikune ɔdi uuubo na beti bakɔku-ɔ. Na ɔyikune ɔdi lɛnɔ uuubo mmɔ na use aani ƒula kalɛ.

Kɔgya 89:8

Awɔ ndi Unwoti Katɔti Ɔyikune Ƒui, na ɔdi uuubo ɔyikun na ɔɔsia nwuna litemi kama ƒula kalɛ.

Israelƒuɔ Bɔlɛ 15:11

“Unwoti, baƒiɔ bamani nse aani ƒula kalɛ? Ɔma nse aani awɔ kalɛ? Ƒula lɛgadi lise kedee, na liikeye ku liƒu na aabla ala ebendi ku akɔla ala budie taatina.

Israelƒuɔ Bɔlɛ 34:9

Na ɔ́su-nwu ɔnii, “Unwoti, si mina lɛlɔ lɛ́da-a kubiti sɔsɔ geen ni, muuvele-ɔ nnii kpanku-bu ina ka bekyuli bamɛni bébo atu ɔkplu geen. Ti bula ekpidi kyiɛ-bu na aƒɔ-bu aani ƒula bebi.”

Yesaia 1:18

Unwoti ɔnini, “Bibo na bɔdi kasusu bɔsala, na bɔwia ala kemmo bɔnu. Ina dɛ na bina alaekpidi áya na bɛ́nwu aani aƒɛ muedi ni, ndubɔkana na lidie-nya bina lɛlɔ. Na lɛya biteekeye aani etubankɛ. Na si ina dɛ na ekpidi ammɔ áya na bígyie dɛ muedi ni, ndubɔƒɔ-mii lɛlɔ na bɛƒuala aani unwo.

Yesaia 33:24

Unwoti ɔdubuti bina ekpidi ɔkyiɛ-mii, na ɔdi ulasu ɔnii uuƒi.

Yesaia 38:17

Geen ni, ami mina bɔdia ɔsu na lɛbibo lɛmɛni líbo-mi lɛlɔ. Nsu na ƒula lɛƒɔndia ɔsu ni, ánu-mi lɛlɔ, na áda-mi édie kaƒiɔtɔ kani mɔɔyila ukyuli udu kemmo. Na énwini kama ákya mina alaekpidi.

Yesaia 40:18

Na si use lɛni ni, ɔma na ukyuli ɔdi ɔdubuti Katɔti bɔkɔku, iye bi udu na ukyuli ɔdubɔnwi uti ɔtina kalɛ na Katɔti use?

Yesaia 40:25

Ɔma na bɛdubuti Unwoti Kedee bɔkɔku? Buse na ukyuli ɔdi use aani nwuna kalɛ?

Yesaia 43:25

“Nsu na ukyuli ɔni na ndi ɔsu ni, mɔɔƒɔ bina ekpidi teedie-mii lɛlɔ uwi biala. Anwuɔsu ndubo bina ekpidi ani ƒui na bɛ́bla bɛ́ƒiɔ-mi bɔyiƒala.

Yesaia 44:22

Binwini bibo-mi kudɔ, ɔsika lɛ́ƒɔ-mii ngba na lídie bina ekpidi ƒui bina lɛlɔ aani kalɛ na liƒlukutu lɛɛyii takya kayaa.

Yesaia 55:7

Bɛda bina kalala ku likyulikpi ala bɔbla bɛya, na binwini kama bɛkya-nya na Unwoti ɔdubuti-nya ƒui ɔkyiɛ-mii.

Yesaia 57:10

Bíitu lɛlɔ kalɛ na bɛdubɔkana, nsu bítanu tɔ bítati bɛnii kɔsia kuuubo ɔmɛni ƒui kemmo na bɛda bɛya. Nwuna lɛlɔ kani binye, na bíkeli bɛkɛ bɛsia-ma kama na kesi kesii, ka bana ala akya-mii kayi kemmo kpakplaa ɔsu.

Yesaia 57:16

Mina kadi bekyuli, lɛɛɛdubo kɔnyi buti bɔsɔ bulie butaadu-mii kɔtɔ kani. Ɔ́bla bi ɔ́bla dɛ ni, ami nédie-mii líboku kayawi. Anwuɔsu lɛɛɛdubo bɔya na enu aƒɛ-mii na bɛyila lɛnunsia ƒui.

Yesaia 62:5

Kalɛ na ebiti aada okloƒu ɔni néti adagyaa na lɛlɔ lɛɛyɔ́-nwu na ɔɔda-nwu ni, lɛni na ƒula bebi badubɔda-kalɔ kammɔ. Na kalɛ na uleku ɔgya ku ulekudi beelie ku ebiti ni, lɛni na ebiti adubɔda Unwoti na ƒula lɛlɔ.

Yesaia 64:9

Unwoti, teti kɔnyi takya-bu tetulo kalɛ na ɔ́manku. Na sɔ tenyimo bula ekpidi eteesienku ƒui. Mmomu ni, Ati, bɔɔkpali-ɔ ka anu-bu kɔnyana, ɔsika awɔ ɔdi kani na bula ƒui bɔdi.

Yesaia 65:19

Na ndubɔdiku Yerusalem bekyuli bammɔ ƒui limeyi ɔni na kɔnyana buwulo iye keku kadi kasɔ kalakya ɔma unengudi ɔmmɔ kemmo.

Yeremia 3:12

Yeremia, nwini kenye sienku kalɔ kammɔ katɔ kakɛ na ebo kudu momoomo anini, ‘Israel, ami ndi bina Unwoti binwini bibo-mi kudɔ! Bɛ́lɛ-mi kama na bɛkya-mi kɔnyi geen. Nsu mɔɔnu kɔnyana ɔsu ni, ndubuti lɛkyiɛ-mii.

Yeremia 3:5

Na biivele-mi bɛnii nda kɔnyi buti taakya-mi lɛya, nsu bíni bɛnii bilada bina ekpidi anya bɔbla biláya.”

Yeremia 31:20

Israel kadi bekyuli, ami ɔlati mina bebi bani mɔɔyɔ́ geen na bɛdi. Ɔɔɔdi ami na mɔɔyɔ́ teetulo ƒui na kadi bekyuli akɔ yoo? Ina ka muubó-mii lɛnimi enwu ku kɔnyi taasu ka ndubo-mii bɔtina ni, bɔyɔ na mɔɔyɔ́ ka bɛni bide-mi na lɛnu-mii kɔnyana. Ami Unwoti násu.

Yeremia 31:34

“Na ɔ́si ɔƒɛni ni, ukyuli ɔdi ɔsɔ ulatina ɔkpanadi iye ɔnwani ka ɔti Blɔti. Ɔsika bana ƒui badubo-mi bɔti ɔ́si ubliidi ƒui útálɛ unengudi lɛlɔ. Na ɔ́si ɔƒɛni ni, ukyuli ɔdi ɔsɔ ulatina ɔkpanadi iye ɔnwani ka ɔti Blɔti. Ɔsika bana ƒui badubo-mi bɔti ɔ́si ubliidi ƒui útálɛ unengudi lɛlɔ. Na ndubuti bana alaekpidi ani ƒui bábla lɛkyiɛ-ma. Na nsɔ lɛɛɛdubo bana ekpidi bunyimo kudii.

Yeremia 33:8

Bábla alaekpidi na báta bénye-mi lɛlɔ, nsu ndubuti lɛkyiɛ-ma na lidie bana bɔƒiɔ ƒui bana lɛlɔ.

Yeremia 50:20

Ndubudie Israelƒuɔ ku Yudaƒuɔ nkyuli ɛlɛɛ badi na ndubuti bana ekpidi lɛkyiɛ-ma ɔni na ɔdi ɔsɔ ulanu ekpidi bɔƒiɔ biala bɔdi ka bɔkya-ma lɛlɔ.”

Yeremia 9:24

Na ukyuli ɔni mɔɔkun lɛmɛnɛ ni, ɔnu ka nwuna kasusu kese-nwu nwaa na ɔsiaku ami Unwoti. Na lɛla lɛni na mɔɔyɔ́ teetulo ƒui ndi lɛƒɔndia bɔbla ku etemila bɔtɛ siin ku bekyuli kɔnyana bɔnu na kalɔ kammɔ ƒui lɛlɔ.

Esekiel 18:23

Ami Unwoti Katɔti naaayɔ ka lɛnu ka ukyuli ukpidi ukpi. Mmomu ɔɔda-mi kubiti ka lɛnu ka únwini kama ɔ́kya nwuna ekpidi bɔbla na ulie ngba.

Esekiel 33:11

Su-ma anii kede kede nwaa ni, ami Unwoti Katɔti ɔni na nli ngba uwi ƒui mɛni ni, naaawia ukyuli ukpidi kukpi. Mmomu lɛlɔ mɔɔyɔ́-mi ka lɛnu ka ɔvumana udu na ɔ́da likpidi bɔbla ɔ́ya. Anwuɔsu si Israelƒuɔ baayɔ́ ka belie ngba bɔdi ni, ɔlɛka bada ekpidi bɔbla baya na benwini bebo-mi kudɔ.

Esekiel 33:16

Ndubuti alaekpidi ani ƒui na bábla bábavi lɛkyiɛ-ma. Na ka bábla lɛbuni ɔsu ni, badubulie ngba.

Daniel 9:9

Unwoti Katɔti, aanu kɔnyana na eeti likpidi taakyiɛ ina ka bɔ́bla alaekpidi na bɔ́ƒiɔ-ɔ,

Hosea 14:2

Nwini sie ƒula Unwoti Katɔti kudɔ na etévele-nwu na asu anini, “Ti bula ekpidi kyiɛ-bu, na aƒɔ bula linugya bumwi bɔni ndi akpala ani na búti buute-ɔ.

Hosea 14:5

Na ndubuse lite-mii aani amii ani mɔɔyu na bɛlɛ lili aani egyii anwula ani muubimi na bidie ligyiitu aani kugyii kalɛ.

Yoel 2:32

Uwi ɔmmɔ kemmo ni, ukyuli biala ɔni makpali Blɔti na wevele-nwu kɔnyana bɔnu ni, ɔdubɔkɛ ngba. Unwoti úse kenye úse ka badi badubo bubu bulie ngba na Sion ku Yerusalem na nwuna bekyuli baƒunadi badubɔkya-ma akɔ.”

Amos 1:11

Unwoti ɔnini, “Ndubo Edomƒuɔ kɔtu bɔni na bana ekpidi pii ani na ɔ́bla ɔsu, na lɛɛɛdubo mina kasusu bɔvumana. Bádu ama alati bana lɛlɔ bekyuli ku lɛnungyie lɛni ɔsu na bátakana na banu-ma kɔnyana ina blii suɛ.

Amos 7:8

Ɔ́kpali-mi úye ɔnini, “Amos, bi na aanu?” Amu na lídie kenye nnini, “Kabuli kani mɔɔtina kowodu bunye.” Mmɔ na ɔ́su-mi ɔnini, “Kabuli kamɛni na líti mɔɔkɔ́ku mina kadi bekyuli Israelƒuɔ taatina ka baaakɛ ligeen, mmomu bese aani kowodu kɔni nábu na nsɔ lɛɛɛdubo-ma buti bɔkyiɛ.

Amos 8:2

Amu na úye-mi ɔnini, “Amos, bi na aanu?” Mmɔ na lídie kenye nnini, “Mɔɔnu kagyigyɛ ku egyiibi egyiedi ani nánu mmɔ.” Amu na ɔ́su-mi ɔnini, “Mina kadi bekyuli Israelƒuɔ bani nánu bási kugyii lɛlɔ kawɔlɔkɔ na kadi mmɔ. Nsɔ lɛɛɛdubo lɛla lɛdi buti bɔkyiɛ-ma.”

Yona 4:2

Ɔmɛni ɔsu ɔ́kpali Katɔti ɔnini, “Unwoti ɔɔɔdi ɔmɛni na lɛ́su nnii aaadubo ɔma ɔmɛni bɔkyula iye ɔ́si ɔni nkya ɔma. Ɔmɛni ɔsu na lɛ́kya ɔkplu ka likeli lisie Tarsis! Ngyi ka awɔ adi kɔnyana ɔnune Katɔti na ebo kayi buɛɛ uwi ndi uwi, na aakana tavumana ƒula kasusu uwi biala kemmo kalɛ na aláni ukyuli kɔtu lɛnɔ.

Mika 2:12

“Ami Unwoti lise kenye ka ndubɔkpanku Israelƒuɔ bani nébu liboku mbasala aani kalɛ na baƒonu ɔdane ɔɔsála nwuna baƒonu na beemomo.

Mika 4:7

Na bekyuli bani nébu mɛni na badi balɛne na bani na béƒie bátɔlɔku mɛni kemmo ni, badubunwini mina bekyuli na lɛya na benwini kadi bani na bebo ɔkplu. Na ami Unwoti ndubo Sion Kɔbi lɛlɔ mmɔ bulie na Yerusalem, na ntaadi-ma lɛlɔ úsela uwi ƒui.

Mika 5:3

Na Unwoti ɔdubudie Israel atu wetédu uwi ɔni na uleku ɔni nda kɔƒɔ ɔdubɔwɔ lɛlɔ ɔdine ɔmɛni, na nwuna badi bakladi basɔ benwini bebo Israel.

Mika 7:14

Unwoti, tɔnku ƒula kadi bekyuli bani nlie lɛti na lɛku kemmo, na ada ama bani na áƒuna éte lɛlɔ aani baƒonu ɔdane kalɛ asiaku kalɔ kabuni kemmo kesii kani na badubɔkɛ livo lɛbuni na Basan ku Gilead kalɔ kemmo aani kalɛ na úse kuuku.

Seƒania 3:17

Unwoti Katɔti unye-mii kudɔ uwi ndi uwi. Ubo ɔyikun ka udie-mii. Na kalɛ na ɔɔyɔ́-mii ɔsu ni, ɔdubɔya na bɛkɛ bɔnwuna. Na amii ɔsu ni, uudie nwuna lɛlɔyɔ keyi ku lɛnu bɔtu.”

Bumomo Bɔka 23:21

“Ɔsika ńtanu ɔgbankpi ɔdi na Yakob kaba lɛlɔ, na ńtanu lɛƒɛda lɛdi na Israelƒuɔ lɛlɔ. Bana Unwoti Katɔti ɔ́kya-ma akɔ. Na beedie kudu taasu banii anwu ndi bana ɔga.

Luka 15:32

Nsu ni, ɔlɛka bɔdi limeyi na bɔkɛ ebiti, ɔsika búti-nwu bɔnii bukpi na ƒ'ɔnwani úkpi na ɔ́sɔ únwini úbo ngba. Bɔyii na ɔ́yii na bɔ́sɔ bɔ́nu-nwu.’ ”

Luka 24:47

Na nwuna basiakune badubɔkɔ lɛsa na nwuna lɛnyi kemmo bete kalɔ ƒui bekyuli banii benwini kayi kalɛ na Katɔti uti bana ekpidi ɔkyiɛ-ma. Na lɛsa bɔkɔ bɔmmɔ bɔdubuse kalɔ bɔsi Yerusalem.

Romaƒuɔ 11:4

Na kenye kamani na Katɔti údie Elia? Údie kenye ɔnini, “Lídie bekyuli mpim maatɛ líse líte lɛlɔ ɔni na bátalɛ akɔnkɔ kalɔ bétete Baal baƒiɔ.”

Lɛkpa Ulu 33:26

“Israelƒuɔ! Ɔti ɔdi uuutulo bula Katɔti. Na anwu muuti liƒlukutu taabla aani nwuna ɔpɔnkɔ kɛɛkɛ na ɔda ɔɔví na uubo teebebunku-mii.

Yakobo 2:13

Ɔsika si Katɔti ɔɔtɛku ɔdi litemi ni, ɔɔɔdubo-nwu kɔnyana bɔnu si ukyuli ɔmmɔ ulánu kɔnyana. Nsu si ɔdi ɔɔnu kɔnyana ni, Katɔti uládu-nwu kɔtɔ.

Litemi Batɛne 10:16

Mmɔ na bébo baƒiɔ bani na báƒɔ bése lɛlɔ mmɔ bévaakun, na bése kalɔ baabla Unwoti kabla. Ɔmɛni ɔsu ɔ́sɔ útakana bunye bɔnu Israelƒuɔ abi ani na beebó mmɔ.