Mateo 5:3 - Katɔti Ɔku Kedee

³ “Lɛlɔ litaayɔ bekyuli bani nánu báti ka Katɔti lɛti lɛlɔ na basia anu. Ama ndubuduo Katɔti Lɛga Kadikɔ.

Mateo 5:3 ပူးပေါင်းရင်းမြစ်များ

Ala Alɛdi 2 33:12

Uwi ɔni na kekpo kéƒie Manase na úusie ɔkya mmɔ ni, úvele Unwoti Katɔti ɔnii uti nwuna ekpidi ɔkyiɛ-nwu na ubunku-nwu.

Ala Alɛdi 2 33:19

Kenye udiene Hosai únweni ala pii ɔ́siku Manase lɛlɔ úbunku kalɛ na útaakpali Katɔti ku kalɛ na Katɔti únu-nwu bɔkpali. Nsu ala ekpidi ani na ɔ́bla lɛnɔ asa na ɔdubɔsɔ unwini kayi ni, únweni ana ƒui. Na únweni ala ɔ́siku kesii kani bene na ɔ́tu kadi bamba baƒiɔ ku aƒiodu ɔ́lɛ ku kesii kani na ɔ́ya na bátaakpa Asera baƒiɔ beledi bammɔ.

Ala Alɛdi 2 33:23

Manase únwini kayi úbo Unwoti kudɔ, nsu ubidi Amon anwu úni na útabla ɔmɛni mmomu ekpidi enengudi na ɔ́bla ɔ́sia kama útulo ɔti ƒui.

Ala Alɛdi 2 34:27

Ka kayi kágyu-ɔ uwi ɔni na énu ala ani na lɛ́su ka mabla kalɔ kamɛni ku kana bekyuli ni, éboku lɛlɔ kalɔ na kayi kemmo na áni ƒula awu ábwɛ na éwulo na mina anumi. Na mɔɔsu-ɔ geen ka línu ƒula buvele. Anwuɔsu nu lɛla lɛni na ndubo bɔbla.

Ala Alɛdi 2 7:14

Si ami ɔlati mina kadi bekyuli badubo lɛlɔ kalɔ buboku na bakpali-mi bevele na benwini bebo-mi kudɔ na bada ekpidi bɔbla baya ni, ndubunu bana buvele na liti bana ekpidi lɛkyiɛ-ma na lɛya na kalɔ kammɔ kasɔ kataadia edula.

Hiob 42:6

Ɔmmɔ ɔsu na mina lɛlɔ lɛ́bɔ-mi na líbo nli ɔtumu ku ntɔ akɔ mɛni. Na mɔɔtina kalɛ na mina lɛlɔ libo kɔnyana.”

Kɔgya 1:1

Katɔti ɔdubɔya na lɛlɔ lɛyɔ bekyuli bani naaabla taasiaku bekyuli bekpidi kasusu kani na baakya bekyuli lɛlɔ. Na balásiaku alaekpidi bablane ɔbladu kama. Na baládiku-ma kɔkpana na bataama anwu Katɔti lɛnɔ.

Kɔgya 112:1

Bɛya na bumwi Unwoti. Lɛlɔ lɛdubɔyɔ ukyuli ɔni mɔɔyia Unwoti na ɔɔdi nwuna ɔda bubo etemila ƒui lɛlɔ.

Kɔgya 128:1

Ukyuli biala ɔni mɔɔyia Unwoti Katɔti ni, lɛlɔ lɛdubɔyɔ-nwu ka ɔɔsia ulu geen ɔmmɔ lɛlɔ ɔsu.

Kɔgya 146:5

Lɛlɔ lɛdubɔyɔ ukyuli ɔni néti nwuna anu ɔ́sia Yakob Unwoti Katɔti lɛlɔ ka ubunku-nwu, ɔsika úti Unwoti ɔ́bla nwuna Katɔti.

Kɔgya 2:12

Na biboku eli kalɔ bite-nwu. Na si ɔɔɔdi lɛni ni, Unwoti ɔdubɔkɛku-mii kɔnyi geen na ɔyila-mii udu kɔnakunwi. Nsu lɛlɔ litaayɔ bekyuli bani muukeli teesie-nwu kudɔ ka ɔgyumana-ma.

Kɔgya 34:18

Unwoti ude bani na enu áƒɛ-ma na ala étulo-ma. Na ɔɔƒɔ́ bani na bana lɛnunsia ƒui lɛ́sa.

Kɔgya 41:1

Lɛlɔ lɛdubɔyɔ ukyuli ɔni muulie taabla kasusu na bekyuli bani nse kpɛtɛ kpɛtɛ lɛlɔ ka ubunku-ma. Unwoti Katɔti ɔdubudie-nwu si úduo lɛbibo lɛdi kemmo.

Kɔgya 51:17

Mmomu akpala ani mɔɔƒɔ́-ɔ anu ndi ka ukyuli ekpidi eduo-nwu geen na nwuna kayi kemmo, na eleni ɔmɛni.

Kɔgya 84:12

O Unwoti Ɔyikune Ƒui, ukyuli ɔni mbo lɛnunsia na ƒula lɛlɔ ni, anwu na lɛlɔ lɛdubo bɔyɔ.

Agba 16:19

Ɔdia si awɔ ku bawabane bilie na bɛɛdi lɛla lɛni na bɛ́kɛ utulo si awɔ ku belikplune bilie na bɛɛdi ala ani na béƒie báƒɔ bekyuli kudɔ.

Agba 29:23

Ukyuli lɛlɔ katɔ bɔkɔliku muuboku nwuna kalɔ bubo. Na si éboku lɛlɔ kalɔ ni, bekyuli badubɔbu-ɔ na aƒɔ lɛnyi.

Agba 8:32

“Ɔmɛni ɔsu ni, mina bebi, binu-mi litemi, ɔsika lɛlɔ lɛdubɔyɔ bekyuli bani ƒui mɔɔsia-mi kasiakɔ.

Yesaia 30:18

Unwoti Katɔti ɔɔyɔ́ geen ka ɔnu-mi kɔnyana ku lɛƒɔndia, ɔsika Unwoti ɔdi Katɔti ɔni mɔɔtɛ litemi na ulu siin lɛlɔ. Na bekyuli bani ƒui muunye taanu-nwu anumi ni, uute-ma kusɛ kusɛ.

Yesaia 57:15

Bula Katɔti ɔni nse kedee uli katɔ kakaaka ƒui úsela uwi ƒui, na anwu mɔɔsu ɔnini, “Ina ka katɔ kakaaka kesii kani nse kedee na nli ni, nkya-mii akɔ mɛni ka libunku bani ƒui néboku lɛlɔ kalɔ na béti bana anu ƒui básia-mi lɛlɔ na baanu-mi anumi.

Yesaia 61:1

Unwoti Ɔyikune Ƒui Kɔyu kɔ́ƒɔ-mi lɛlɔ kemmo! Ɔsika ɔ́tala-mi ɔnii nkɔ litemi buni lɛsa nte bawabane. Na lɛbwi bani muunú ɔlɛ na bana kayi kemmo na basɔ beeebo lɛnunsia, na libo kudu lite bani na béƒie na bébo-ma lɛkpu ka badubɔkɛ bɔnwuna na balɛ kasuudikɔ mmɔ.

Yesaia 66:2

Mina kɔnu nábla ani bɛɛnu mɛni ƒui na ébo éte kalɛ na ese. Ami Unwoti násu. “Bekyuli bani mɔɔyɔ́-mi kaƒɔ ni, ama ndi bani muuboku lɛlɔ kalɔ na bana ekpidi eeduo-ma, na lɛlɔ lɛɛtɔ́-ma ku bɔyia si bénu-mi lɛdi, na mina lɛlɔ kani na bana anu asia.

Mika 6:8

Unwoti ɔlati ɔ́su-bu lɛla lɛni na ɔlɛka bɔbla. Na lɛla lɛni na ɔɔwia ɔsiku-bu kudɔ ndi ka bɔbla ala ulu lɛlɔ, na butaayɔ bekyuli ku lɛƒɔndia, na buboku lɛlɔ kalɔ buɛɛ, na bɔsiaku-nwu kama siin.

Mateo 11:25

Uwi ɔmmɔ kemmo ni, Yesu ɔ́sɔ ɔ́kpali katɔ ɔnini, “Ati, katɔ ku kalɔ Unwoti, mɔɔgyá-a enu. Éti ala amɛni ábɛla banundane ku bakutine, na édie-nya átina bani nétesie anumi na lɛlati lɛdi kemmo.

Mateo 11:6

Lɛlɔ litaayɔ bekyuli bani na bana kasusu kalabla inyɔ inyɔ na mina ala ani mɔɔbla ɔsu.”

Mateo 13:16

Nsu amii ni, lɛlɔ litaayɔ-mii geen ka bina anumi aanu na bina atu lɛnɔ eenú ɔsu.

Mateo 19:14

Amu na Yesu ɔ́su batɛyane bammɔ ɔnini, “Bɛya na banamu bammɔ bebo-mi kudɔ na bitetile-ma kuƒi. Ɔsika Katɔti lɛga kadikɔ kese kete bekyuli bani néboku lɛlɔ kalɔ aani banamu bamɛni udu kalɛ.”

Mateo 24:46

Kubiti geen ndubo kabla ɔblane ɔmmɔ bɔda si nwuna unwoti ɔ́si úbo úbanu ka ɔɔbla lɛla lɛni na ɔ́su.

Mateo 25:34

“Na Ɔga ɔmmɔ ɔdubɔsu bekyuli bani nnye-nwu kudɔ ɔnini, ‘Amii ndi bekyuli bani na Katɔti ɔni ndi mina Ɔti ɔ́ya na lɛlɔ lɛdubɔyɔ-mii kaduɛ. Anwuɔsu bibo na bibeduo lɛga kadikɔ kani na Katɔti ɔ́klibi úse úte-mii ɔ́si kayawi kalɔ kesekɔ ƒui.

Mateo 3:2

ɔnini, “Binwini kama bɛkya bina ekpidi, ɔsika uwi ɔni na Katɔti ɔdi lɛga na bula kɔyi kemmo úude.”

Mateo 8:11

Mɔɔsu-mii geen ka bekyuli pii badubɔsi ɔƒɛ katukɔ ku kanukɔ bebo Katɔ Ɔga Ɔma limeyi kadikɔ. Badubulie kalɔ na badi ku Abraham ku Isak ku Yakob na mmɔ.

Marko 10:14

Ka Yesu ɔ́nu lɛni ni, úbeti kɔnyi na ɔ́su nwuna batɛyane ɔnini, “Bɛya na banamu bebo-mi kudɔ, na bitetile-ma kuƒi. Ɔsika Katɔti lɛga kadikɔ kese kete bekyuli bani néboku lɛlɔ kalɔ aani banamu wɛlɛ wɛlɛ bamɛni udu kalɛ.

Luka 11:28

Amu na Yesu údie kenye ɔnini, “Bekyuli bani muunú Katɔti litemi na baabla taasiaku-ni lɛlɔ mmomu na lɛlɔ lɛyɔ!”

Luka 18:14

Mmɔ na Yesu ɔ́su-ma ɔnini, “Mɔɔsu-mii nnii ka básɔ bénwini bésie kaduli ni, kuyi ɔƒɔne ɔmmɔ ɔ́bla sɛɛn na Katɔti anumi na ɔɔɔdi Ƒarisini ɔmmɔ. Ɔsika ukyuli biala ɔni na ɔ́bla nwuna lɛlɔ ukyuli ubendi ni, Katɔti ɔdububoku-nwu kalɔ. Na ukyuli biala ɔni na weboku lɛlɔ kalɔ ni, Katɔti ɔdubɔkɔliku-nwu katɔ.”

Luka 22:29

Na aani kalɛ na mina Ɔti úte-mi kenyekɔ ka lɛdi bekyuli lɛlɔ ni, lɛni kani na ndubo-mii kenyekɔ kammɔ udu bute.

Luka 22:30

Bɛdubɔdi na bɛni na mina adila kadikɔ na mina lɛga kadikɔ. Na bɛdubulie bagaboku lɛlɔ na bɛdi Israel kaba leevu-inyɔ kɔmmɔ lɛlɔ.”

Luka 4:18

“Katɔti Kɔyu kɔ́ƒɔ-mi lɛlɔ kemmo ƒui, ɔsika Katɔti náƒuna-mi ɔnii nti litemi buni lɛmɛni mboku bawabane. Na ɔ́tala-mi ɔnii nkɔ lɛsa nte bekyuli bani na béƒie kalɛ na bakɛ bɔnwuna. Na bani na anumi ábwɛ-ma ni, bataanu. Na bekyuli bani na baanya taakya ku lɛbibo ni, bakɛ bɔnwuna.

Yohane 20:29

Amu na Yesu ɔ́su-nwu ɔnini, “Áƒɔ ádi ka ánu-mi ɔsu. Bekyuli bani nátanu-mi tɔ asa báƒɔ bádi ni, badubɔkɛ lɛlɔyɔ betulo!”

Lɛkpa Ulu 8:2

Na bitayiƒala kalɛ na bina Unwoti Katɔti ɔ́tɔnku-mii na kalɔ kakwiidi kamɛni kemmo akwa aavlene. Ɔ́bla ɔmɛni ɔnii ɔɔnu si bɛdubɔti ka anwu nda-mii. Na ɔkɔku-mii ɔnu si bina kasusu kadubɔsia-nwu lɛlɔ na bɛdi nwuna ɔda bubo lɛlɔ.

Yakobo 1:10

Lɛni kani na si Katɔti úboku ɔƒɔtaadine ɔni ndi ɔlakɛne kalɔ ni, anwu lɛnɔ ɔya na lɛlɔ litaayɔ-nwu. Ɔsika ɔlakɛne biala uwi ɔdububo ubavi aani kalɛ na lɛku kemmo kugyii kuuwiile kuna anwula teewi kalɔ.

Yakobo 1:12

Lɛlɔ lɛdubɔyɔ ukyuli ɔni náƒɔ ɔ́di na unye kpakplaa na ɔɔsiáku ala ani ƒui muukpóku-nwu. Ɔsika si enu átaƒɛ-nwu ni, ɔdubɔkɛ ngba ƒui lɛyuƒɔla lɛni na Katɔti ɔ́su úse ka ɔdubute bekyuli bani mɔɔyɔ́-nwu.

Yakobo 2:5

Banwa, binu! Bɛgyi geen ka Katɔti ɔ́ƒuna kayawi kamɛni bawabane ka babla nwuna badi. Na ka báƒɔ Blɔti Yesu Kristo bádi ɔsu ni, bénwini kɔyu kemmo ala bakɛne. Na ama ndubuduo Katɔ Ɔga Ɔma aani kalɛ na Katɔti ɔ́su bekyuli bani mɔɔyɔ́-nwu úse.

Budie Taatina 19:9

Mmɔ na Katɔti ɔtu ɔmmɔ ɔ́su-mi ɔnini, “Nweni ala amɛni. Lɛlɔ lɛdubɔyɔ ama bani na badubɔlɔ beboku uleku ketikɔ adila kadikɔ.” Na ɔ́sɔ ɔ́su-mi ɔnini, “Etemila amɛni adi Katɔti ɔlati etemila geen.”

Budie Taatina 22:14

“Lɛlɔ lɛdubɔyɔ bekyuli bani náklibi lɛlɔ bése aani kalɛ na baaƒɔ lɛwu sɛɛn. Ama ndubɔkɛ kuƒi ka badi kugyii kɔni muute ngba mmɔ ebi. Na badubɔsia kayakun mmɔ beduo Katɔ Ɔga Ɔma ɔmmɔ kemmo.

Budie Taatina 3:17

Bɛɛsu bɛnii, ‘Mbo ala na ɔdianku-mi, na mbo ala ani ƒui na mɔɔwia.’ Nsu bɛɛɛgyi bɛnii biisé lɛlɔ na bina lɛlɔ libo kɔnyana, na biiibo lɛla lɛdi, na anumi ábwɛ-mii, na bɛkɛ kasɔngya.