“Ndubo-ma udu bɔyila budie kalɔ kammɔ lɛlɔ ƒui. Ɔsika bese aani egyiibi kɔbuli kɔni lɛlɔ na egyiibi aaasia iye kɔnwingyie kɔni lɛlɔ na ebi iye evete aaasia. Na ala ani na lɛ́su-ma ƒui bátabla ɔdi! Ami Unwoti násu lɛni.”
“Lɛ́ya na bina edula ƒui ku adingyii mmo bɔ́kwii na lɛla biala lɛ́bla ƒuƒuu linye. Baalɔlɔ bádi bina anwingyie ku nnɔ egyii mmo ƒui. Nsu ɔmɛni ƒui bítenwini. Ami Unwoti násu.
Ina adingyii lidu ƒui líbulo bɔnwu, na lɛla lɛdi liiibo na edula ɔƒɛwi na bekyuli baƒɛ bakya linwu, iye bebuo ayu ƒui ese ukpludi na baƒonu iye ɔmantɛ bɔkɔ beeebo-ni kemmo,
Na líbo ɔda ka bina ala ƒui asɔ aaadubo bɔbla kaduɛ. Bina mmo ku bebuo kadikɔ ku adingyii mmo ku nnɔ egyii mmo ku bebuo ku amii alati ku bina kabla biala kadubɔbla keeke.”
Ami nébo-mii na líbile-mii kabla ƒui lɛni ɔni na liwulu ɔƒɛƒɛɛ ku etubankɛ áya na bina edula ákwɛ kuyii na ébulo bɔdia. Nsu ɔmɛni ƒui bíni ka binwini bibo-mi kudɔ.
“Mmomu ni, ndubɔnu ka bɛkya bina edula ɔƒaamu na atu bɔyɔ kemmo, na bina adingyii mmo lɛnɔ adubɔbla kaduɛ na anwu ebi pii. Na bina katumalɔ kadubulie lɛmwi, na amii ayu ewi bina edula lɛlɔ.