Luka 6:38 - Katɔti Ɔku Kedee

³⁸ Bite bekyuli ala, na Katɔti lɛnɔ wete-mii ala. Geen ni, Katɔti ɔdubuyile-mii kɔvumi tɛtɛɛtɛ na nwuna lɛƒɔndia kenye. Keyile kani udu na ákɔku éte ukyuli ni, kana udu kani na Katɔti ɔdubɔkɔku ute-ɔ.”

Luka 6:38 ပူးပေါင်းရင်းမြစ်များ

Samuel 2 19:36

Ami ƒula kabla ɔblane ndubɔvia Yordan Ketu ku mina ati ku ɔga na bɔkɛ busie anumi blii kani na ɔmmɔ lɛti ɔ́bɔ-mi ɔ́vili.

Ester 7:10

Mmɔ kani na ɔga ɔmmɔ údie lɛdi úte-ma ɔnini, “Bɛgyunku-nwu na bitákya-nwu ɔbuli limɔ bɛƒala mmɔ!” Anwuɔsu béti-nwu na bátaƒala-nwu na anwu ɔlati ugyii lɛlɔ. Na ɔga ɔmmɔ kɔnyi kɔ́yɔ-nwu na kaƒɔ lɛnɔ kába-nwu.

Ester 9:25

Nsu uwi ɔni na Yudaƒuɔ lɛlɔ kelisa kekpidi kamɛni litemi líbeduo Ɔga Ahasweros kɔtu kemmo ɔkɛnku Beleku Ɔga Ester lɛlɔ ni, ɔ́ya na bénweni ɔku bamba bébile Haman lɛla lɛni na únyimi kemmo, na likpidi lɛmmɔ línwini líbo Haman ku nwuna bebi lɛlɔ mmomu ɔni na bákya-ma ɔbuli limɔ anwu ku nwuna bebi na báƒala-ma.

Hiob 42:11

Ɔmmɔ kama ni, Hiob ɔ́ya na bánwa adila na ɔ́lɔ nwuna banwani bananabi ku belekubi ku nwuna bakpana na bádi limeyi. Na nwuna bakpana béwulo-nwu kɔnyana na lɛbibo lɛni na Katɔti ɔ́ya na líbo-nwu lɛlɔ ɔsu. Na bana akɔ ɔdi biala úte-nwu sika ɔƒualadi ku ugyiedi kɔkwɛnimi.

Kɔgya 79:12

Unwoti, die kadi bekyuli bamɛni kasi akpa maatɛ na kalɛ na beedumi-ɔ kenye.

Israelƒuɔ Bɔlɛ 21:24

lɛnumi na lɛnumi kenye, kenye lɛnyi na lɛnyi kenye, kɔnu na kɔnu kenye ɔgba na ɔgba kenye.

Agba 10:22

Unwoti kusɛ kusɛ mɔɔyá na ukyuli uunwíni ɔlakɛne, na kɔnyana kɔdi kulásia ɔmmɔ lɛlɔ.

Agba 19:17

Si ébunku bawabane ni, Unwoti na eevó ala teete, na ɔdubɔƒɔ kayu kammɔ ɔsɔku ute-ɔ.

Agba 22:9

Bekyuli bani mbo lɛƒɔndia na beete bawabane ala ni, kusɛ kusɛ ɔdubɔsiaku-ma.

Yeremia 32:18

Aanu kaba bekyuli mpim mpim kɔnyana. Na lɛni kani na aaní bekyuli kɔtu na bana bawɔne ekpidi ani na bábla ɔsu. Awɔ ndi Unwoti Ɔyikune Ƒui.

Mateo 10:42

Binu ɔmɛni kaduɛ ka ukyuli biala meti ntu ɔɔƒɛɛ mete mina basiakune bamɛni akɔ ubliidi ƒui ka ɔsiaku-mi ɔsu ni, nwuna lɛyuƒɔla lilabɔ-nwu.”

Mateo 7:2

Ɔsika Katɔti ɔdubɔtɛku-mii litemi aani kalɛ kani na amii lɛnɔ bɛɛtɛku bekyuli litemi. Na ulu ɔni lɛlɔ bɛ́sia bɛ́tɛku-ma litemi ni, ulu ɔmmɔ kani lɛlɔ na ɔdubɔsia ɔtɛku amii lɛnɔ litemi.

Marko 4:24

Amu na Yesu ɔ́sɔ ɔ́su-ma ɔnini, “Bise atu kaduɛ na lɛla lɛni biinú lɛlɔ! Ɔsika kalɛ na aakɔ́ku bekyuli bamba taanu ni, lɛni kani na Katɔti ɔdubɔkɔku-ɔ bɔnu, utulo muedi!

Luka 6:30

Ukyuli biala ɔni mevele-ɔ lɛla lɛdi ni, te-nwu. Na si ɔdi úti-ɔ lɛla lɛdi ni, tasu anii aasia-ni kama.

Lɛkpa Ulu 15:10

Na bɛnu ka biite lɛlɔ ala ku kayi ƒaa ɔni na kasusu kekpidi kadi keeebo-nwu kemmo. Na si bɛɛbla lɛni ni, Katɔti ɔdubute-mii kusɛ kusɛ na lɛla biala bɛɛbla kemmo.

Yakobo 2:13

Ɔsika si Katɔti ɔɔtɛku ɔdi litemi ni, ɔɔɔdubo-nwu kɔnyana bɔnu si ukyuli ɔmmɔ ulánu kɔnyana. Nsu si ɔdi ɔɔnu kɔnyana ni, Katɔti uládu-nwu kɔtɔ.

Litemi Batɛne 1:7

Amu na Adoni-Besek ɔ́su ɔnini, “Líkulo baga liti ku aavlanyɔ lɛgba ku enu animigya ƒui. Na adila ani nálɛ ébo mina kadikɔ na lɛ́ya na bála bádi. Na ɔƒaani ni, kalala kani na lɛ́bla-ma kayu na Katɔti ɔ́ƒɔ-mi úti údie-mi kasi.” Na béti-nwu bésienku Yerusalem, na útékpi mmɔ.