Luka 23:2 - Katɔti Ɔku Kedee

² Mmɔ na bése baadá-nwu kenye banini, “Búƒie ukyuli ɔmɛni ka ɔ́kpanku bula kadi ɔɔvínku ulu ukpidi lɛlɔ. Na ɔɔsu-ma ɔnii basɔ bataƒɔ kuyi betete Romaƒuɔ Ɔga Unengudi. Na ɔ́su lɛnɔ ɔnii anwu ndi Katɔti Ukyuli Ɔƒunadi na ɔnii ɔdi ɔga lɛnɔ.”

Luka 23:2 ပူးပေါင်းရင်းမြစ်များ

Baga 1 18:17

Uwi ɔni na Ahab ɔ́nu Elia ni, ɔ́su-nwu ɔnini, “Awɔ Elia mmɔ? Awɔ nákya Israel ƒui lɛsɛ mmɔ?”

Kɔgya 35:11

Ɔkɔ banyine báta na bánwi etemila ani lɛlɔ na lɛɛɛgyi básia-mi ka ami nábla-nya.

Kɔgya 62:4

Baawia ka batu-mi bedie mina kenyekɔ na bayila-mi lɛnyi lɛni na lɛ́ƒɔ. Ɔkɔ bɔnyi bɔɔda-ma kubiti. Na baatɛmi minimini nsu ɔdu ukpidi sɔɔn náƒɔ-ma kayi kemmo.

Yeremia 20:10

Muunú ka bekyuli bammɔ baatɛmi kabɛnsɛ banini, “Ukyuli biala ɔɔyia na uwi ɔmɛni geen na ɔlɛka budie Yeremia bɔƒiɔ na bɔdu-nwu kɔtɔ!” Na bekyuli bani ƒui na mɔɔlɔ nnii mina bakpana ƒui benye kagyumana ka banu mina likpidi lɛdi na bakɛ kasiakɔ. Na baasu banini, “Ɔƒɛni kalɛ Yeremia ɔdubɔƒiɔ ɔbla lɛla lɛdi na ɔnu-bu kakpagyuɛ na bɔsia ɔmmɔ lɛlɔ bɔkɛ-nwu.”

Yeremia 38:4

Anwuɔsu bana ine bammɔ bésie ɔga kudɔ na bátásu-nwu banini, “Ɔdi ka adu Yeremia, ɔsika ɔɔkya bekpone bammɔ ku bekyuli ƒui liƒu, na ɔ́ya na baayia ɔni na basɔ beeebo lɛnunsia lɛdi munu munu. Ulebunku bula kadi bekyuli na ulu biala lɛlɔ, mmomu uubile-ma na ɔɔkya-ma ɔlɛ lɛlɔ.”

Amos 7:10

Mmɔ na Amasia ɔni ndi ɔkpane unengudi na Betel ɔ́tala na bátásu Yeroboam, Israelƒuɔ ɔga, ɔnini, “Amos unye ɔɔví-ɔ kalɔ momoomo ɔni na ɔɔɔdia na awɔ ɔlati ƒula kalɔ kemmo na Israel kalɔ lɛlɔ. Na mɔɔnu ka ɔmmɔ ɔdubo kalɔ kammɔ ƒui bubile na bekyuli bammɔ lɛnɔ balakana-nwu lɛlɔ bɔta búnye na beni lɛla lɛni na ɔɔsu.

Sakaria 11:8

Útedu kɔbuli kunwi asa na lɛ́ya na baƒonu badane ɛtɛ badi bátɔlɔ. Na lɛ́nu ka baƒonu balayɔ-mi litemi, na ńsɔ ńtakɛ kayi ńtete-ma.

Mateo 17:27

Nsu ka bulayɔ bɔnii bɔɔƒiɔ́ ukyuli ɔdi ɔsu ni, teesie ɛpu kɔtu na atátu ɔdaa. Na kabɛ kedeedi kani na adubɔni alɛku ni, adubɔnu ligulabi lɛdi na nwuna kenye lɛni ndubudu ami ku-ɔ kakpakɔ kuyi bɔƒɔ. Die-ni, na atáƒɔ-ma bula kuyi kayu.”

Mateo 22:21

Amu na bédie kenye banini, “Ɔga Unengudi Kaesare na ɔdi.” Anwuɔsu Yesu ɔ́su-ma ɔnini, “Biti lɛla lɛni ndi Kaesare lɛdi bite Kaesare. Na biti lɛla lɛni ndi Katɔti lɛdi bite Katɔti.”

Mateo 27:11

Na béti Yesu bényene Romaƒuɔ aban unengu Pilato anumi. Na úye-nwu ɔnini, “Awɔ ndi Yudaƒuɔ Ɔga?” Yesu údie kenye ɔnini, “Awɔ mɔɔsu.”

Marko 12:17

Amu na Yesu ɔ́su-ma ɔnini, “Amu ni, biti lɛla lɛni ndi Kaesare lɛdi bite-nwu. Na biti lɛla lɛni ndi Katɔti lɛdi bite Katɔti.” Ɔmɛni ɔsu ni, bébimi bana inye béwi, ɔsika ɔ́bla-ma dɛye dɛye.

Marko 15:2

Mmɔ ni, Pilato úye Yesu ɔnini, “Awɔ ndi Yudaƒuɔ Ɔga?” Yesu ɔ́su-nwu ɔnini, “Ɛɛn, lɛni na use aani kalɛ na adaku bɔsu.”

Luka 23:14

Na ɔ́su-ma ɔnini, “Bɛ́kpanku ukyuli ɔmɛni biboku-mi bɛnii ɔɔkpanku bekyuli taavinku ulu ukpidi lɛlɔ. Na ɔƒɛni ni, líye-nwu ala na amii alati anumi. Na ńtanu lɛla likpidi lɛdi na nwuna lɛlɔ aani kalɛ na amii bɛ́da-nwu kenye.

Luka 23:5

Nsu bénye kpakplaa bébu na básu banii, “Nwuna ala ani na ɔɔtina éti lɛsɛ éboku Yudea bekyuli ƒui akɔ. Úse ɔmɛni kalɔ na Galilea, na úubo úbedu mɛni lɛnɔ.”

Yohane 18:29

Ɔmmɔ ɔsu Pilato ɔ́lɛ úbo-ma kudɔ na ɔba kenye mmɔ, na úye-ma ɔnini, “Likpidi lɛmani na ɔ́bla?”

Yohane 18:30

Amu na bédie kenye banini, “Si ɔɔɔdi likpidi bonwu lɛdi na ɔ́bla ni, nka bulakpanku-nwu buleboku ƒula kudɔ.”

Yohane 19:12

Ka Pilato únu lɛla lɛmɛni ni, ɔ́wia ulu ɔni lɛlɔ na ɔsia na ɔnyonu Yesu. Nsu bekyuli bammɔ bakya baava taasu banini, “Si ányonu-nwu ni, asɔ aaadi Ɔga Unengudi Kaesare kabla ɔblane! Na ukyuli biala ɔni meti lɛlɔ mabla ɔga ni, ɔ́ta únye Kaesare ɔmmɔ lɛlɔ!”

Batalane Kabla 24:13

Na bekyuli bamɛni ɔdi ulakana lɛla lɛdi ugyii bɔlɛ geen na bɔnu bɔti ka etemila ani na básu básiku-mi lɛlɔ mɛni ni, sɔsɔ na adi.

Batalane Kabla 24:5

“Ɔsika bɔ́nu-nwu bɔ́ti ka lɛsɛ ɔkyane na ɔdi, na ɔkɛ ɔɔví uwi ndi uwi uunwíni Yudaƒuɔ kasusu na kesi kesii na kayawi kamɛni ƒui ɔnii bataabla basa basa na bata benye aban lɛlɔ. Na anwu ndi lɛkpa lɛni na baalɔ banii Nasareƒuɔ ɔtɔnkune.

Romaƒuɔ 13:7

Anwuɔsu ni, bɛƒɔ bana ɔdi biala kayu kani na bɛda-nwu. Si kalɔ kammɔ egulabi ani na báda béte ɔdi biala na ɔdi ni, na bɛƒɔ-ka. Si kuyi kɔdi ni, na bɛƒɔ aku lɛnɔ. Si ɔbu na ɔdi ka bite ni, na bite. Na si bumwi lɛnɔ ɔdi ni, na bimwi.