Luka 12:48 - Katɔti Ɔku Kedee

⁴⁸ Nsu kabla ɔblane ɔni naaagyi lɛla lɛni na nwuna Unwoti ɔɔwia ka ɔbla nsu ɔ́bla lɛla lɛni na bani-nwu kɔtu ni, nwuna kɔtu bɔni bɔɔbla blii suɛ. Si ukyuli ɔni na béte-ɔ ala pii ni, lɛni kani na ɔlɛka abla ala pii. Na ukyuli ɔni na béte-ɔ ala pii betulo ni, lɛni kani na ɔlɛka abla kabla pii etulo.

Luka 12:48 ပူးပေါင်းရင်းမြစ်များ

Lewiƒuɔ Ɔda Bubo 5:17

“Ɔƒɛni si ukyuli ɔdi ɔ́bla likpidi ɔ́ƒiɔ ala ani lɛlɔ ɔda na líbo-mii mɛni ɔdi ina útati asa na ɔ́bla-nya ni, ina amu ɔ́bla likpidi, na kɔtu bɔni bɔmmɔ bɔma-nwu lɛlɔ.

Bumomo Bɔka 15:27

“ ‘Nsu si ukyuli unwi ɔ́bla likpidi lɛni na útati asa na ɔ́bla-ni ni, ɔlɛka ɔwia ese uledi ɔni nákɛ lɛkwa linwi na uti ubabla likpidi lili buvele akpala.

Mateo 13:12

Ɔsika ukyuli ɔni mbo ala ammɔ udu ni, Katɔti ɔdubute-nwu ubu na ɔkɛ utulo kalɛ na ɔɔwia. Nsu ukyuli ɔni neeebo ala ammɔ adi ni, libliidi lɛni nse-nwu muedi ni, Katɔti ɔdubɔƒɔ-ni ɔ́siku-nwu kudɔ.

Mateo 23:14

Bɔbuɛ muute amii Katɔti ɔda bubo ala batinane ku Ƒarisiƒuɔ! Anumi lɛlɔ bekyuli bɛdi! Biisié bekpinele kudɔ ka bitébunku-ma, nsu bɛɛtɔ́lɔ-ma taaƒɔ-ma ala. Na bɛɛkpali katɔ gyɔlɔɔ taabu-ma kɔdɔlɔ. Ɔmɛni ɔsu ni, bina kɔtu bɔni bɔdubɔkɔ katɔ bubu!

Luka 12:41

Amu na Petro úye Yesu ɔnini, “Blɔti, abu na lɛgba lɛmɛni lɛdanku, munuu ukyuli biala na ada?”

Luka 12:49

“Líti Katɔti kɔtu bɔni líboku bekyuli akɔ ɔni nse aani ogya kalɛ. Na mɔɔwia geen ka nka ogya ɔmmɔ úuse kalɔ ɔdaku bɔda.

Luka 16:2

Ɔmɛni ɔsu ɔlakɛne ɔmmɔ ɔ́lɔ nwuna ala lɛlɔ ɔnune ɔmɛni na ɔ́su-nwu ɔnini, ‘Bi ndi lɛla lɛni udu na línu lɛ́siku-ɔ lɛlɔ mɛni? Bu akunta na kalɛ na éti aanu mina ala lɛlɔ ƒui boku-mi, ɔsika asɔ alakana mina ala lɛlɔ bɔsɔ bɔnu lɛnɔ.’

Yohane 15:22

Si bubo na ńtebo ńtabasu-ma lɛla lɛdi ni, nka ukyuli ɔdi uládu-ma kɔtɔ ka bábla likpidi lɛdi. Nsu ɔƒɛni ni, basɔ balakana bɔsu banii bátati asa na bábla likpidi.

Batalane Kabla 17:30

Na ɔ́si kalɔ kesekɔ úti úbedu uwi ɔmɛni kemmo ni, Katɔti útani bekyuli kɔtu ɔsika bátati-nwu. Nsu ɔƒaani ni, úbo-bu ɔda ɔnii bɔda anumi budie ala amɛni bene lɛlɔ na bunwini anumi buboku-nwu kudɔ.

Lɛkpa Ulu 25:2

Na ukyuli ɔni bádu kɔtɔ mmɔ nwuna kɔtu bɔni ndi ka bebo-nwu kugyiimi. Na asa na badububo-nwu kugyiimi kɔmmɔ ni, litemi ɔtɛne ɔmmɔ ɔlɛka unwini ukyuli ɔmmɔ anumi ubi kalɔ asa na beteewi-nwu kugyiimi kɔmmɔ. Na likpidi lɛni udu na ɔ́bla ndubɔtina kugyiimi bumomo bɔni na ɔlɛka bebo-nwu.

Timoteo 1 1:11

Na Katɔti litemi buni lɛni bɔsu na úti ɔ́kya-mi enu kemmo ni, nina kemmo kani na bɔdubɔkɛ ala bɔtina bɔbuni bɔmmɔ bɔni nási Katɔti ɔmmɔ ɔlati bukeye kemmo. Na anwu na bɔɔgyá enu.

Timoteo 1 1:13

Ina ka líkpoku-nwu na lɛ́tɛmi enyekpi ku edumi na nwuna lɛlɔ dii asa na ḿbenwini kayi ni, Katɔti ɔ́nu-mi kɔnyana. Ɔsika uwi ɔmmɔ kemmo ni, ńtaƒɔ-nwu tɔ ńtadi na ńtati lɛla lɛni lɛnɔ na ńtaabla.

Timoteo 1 6:20

Timoteo, nu ka ágyumana ala ani na béti béte-ɔ bɔda kaduɛ. Takya atɛ keeke ku kɔdɔlɔ unyeƒi kenye. Anya na bekyuli badi beeti taatɔlɔ bekyuli banii lɛlati lɛdi kenye.

Tito 1:3

Údie ngba ƒui litemi ɔ́tina-bu na nwuna litemi lɛni mɔɔsu mɛni kemmo na uwi ɔni lɛlɔ na anwu ɔlati úse úse lɛlɔ. Ɔmɛni na úti ɔ́kya-mi enu kemmo na mɔɔkɔ́-ni lɛsa teete kadi. Na Blɔti ɔni ndi bula Ɔƒɔne násu-mi ɔnii nkɔ lɛsa lɛmɛni.

Yakobo 3:1

Banwa, bina pii bitenwini litemi buni ala batinane. Bɛgyi ka abu bani mɔɔtina ala ni, Katɔti ɔdubɔtɛku-bu litemi utulo bakladi.