Bise atu na binu amii kadi batɔnkune ku amii bani na bɛkya kalɔ kammɔ ƒui kemmo. Bɔlɛ na lɛla lɛni na bɛɛnu mɛni lɛ́ɛlɛ na bina uwi iye bina bati kuuku uwi na bínu dii?
Na ala ani ƒui na bénweni bése uwi ɔni návi kemmo ni, bénweni-nya bése kalɛ na batina-bu ala, kalɛ na si búnye lɛbibo biala kenye kpakplaa ɔkɛnku Bunweni Kedee ogya ɔni na ɔɔkya-bu lɛlɔ ni, na bɔkɛ lɛnunsia.
Ala amɛni ƒui álɛku-ma kalɛ na abu bɔnu bɔtɛya. Na bénweni-nya bése kalɛ na buti-nya bɔlɛ lɛlɔ. Ɔsika bula uwi ɔni kemmo na bɔkya mɛni ni, úudu kawɔlɔkɔ.
Binyimo ala ani nébo abavi ku kuuku ala, na biye bina bati na basu-mii ala ani nálɛ dii. Na biye bina benengu bani náabi, na basu-mii ala ani nálɛ dii.
Na amii alati bɛwia bɛsiku uwi ɔni návi asa na báwɔ-mii. Na bɛwia bɛsiku uwi ɔni na Katɔti úti údie ukyuli. Na bɛwia kayawi kammɔ ƒui kemmo si ukyuli ɔdi únu ka ala ebendi amɛni udu álɛ dii.